Elder Von G. Keetch

Matai ni Kuoramu ni Vitusagavulu

E dua na gauna veivakadeitaki ena bula nei Elder Von G. Keetch na gauna e vakacavara tiko kina na cakacaka vakavunivola ni lawa vei Turaganilewa levu Warren E. Burger kei Turaganilewa Antonin Scalia ena Mataveilewai e Cake kei Amerika ka vakavakarau tiko me sa veiqaravi vakaloya tudei.

A rawa ni cakacaka ena dua ga na siti e rawa mai Amerika ena veikabani lelevu ni loya e vuqa. Ia, erau a masuta kei na watina o Bernice Pymm Keetch, na veivakauqeti me rau kila na ka me rau cakava. Ni oti e dua na gauna ni vakekeli, erau a lesu tale na veiwatini ki Salt Lake City, Utah, ka laki cakacaka kina ena kabani ni loya nei Kirton McConkie.

Ena gauna oya, a nanuma o Elder Keetch ni sa solibulataka tiko na nona rawata me qarava na veikisi dredre eso me rawa ni voleka tikoga kina ki na nona matavuvale. Ia, me vaka ni loya liu e taudaku ni Lotu, sa dau veibataka o Elder Keetch na yavu ni vakavulewa kei na veikisi eso me baleta na galala vakalotu. Sa matataka oti o koya voleka ni veimatalotu lelevu kecega ena matanitu. “Au sa taleitaka ni rawa meu qarava na kasitama cecere vaqo vakakina meu walia eso na leqa cecere vaqo,” e kaya o koya.

A sucu ena 17 ni Maji, 1960, mai Provo, Utah, vei rau o Gary kei Deanne Keetch, O Elder Keetch e qase duadua vei iratou e va na gone. A vakaitikotiko mai Orem, Utah, na nona matavuvale ni bera ni ratou qai toki ki Pleasant Grove, Utah—ka rau veiqaravi vata kina kei na goneyalewa ena qai watina e muri ena matabose ni semineri ena vulitorocake.

A veiqaravi o Elder Keetch ena Tabana ni Kaulotu na Dusseldorf e Jamani ka yaco me taleitaki ira sara na kai Jamani. Ni lesu mai ena buturara ni kaulotu, a vakamautaki Bernice Pymm ena Valetabu e Salt Lake ena 21 ni Noveba, 1981; e ono na luvedrau A taurivola mai na Brigham Young University ena 1984 o Elder Keetch ena dua na diqiri ni political science ka rawata e dua na diqiri ni lawa mai na univesiti ena 1987.

E na loma ni veiyabaki sa veiqaravi oti o Elder Keetch, ka a tokoni ena 4 ni Epereli, 2015, ki na Matai ni Kuoramu ni Vitusagavulu, ena matabisopi, matabose e cake, peresitedi ni iteki, ka Vitusagavulu ni iWasewase.