Me Tiki ni Noda Bula na Koniferedi

Tovolea mo vakayagataka eso na itaviqaravi oqo kei na taro me tekivu kina na veitalanoa vakamatavuvale se noda vuli yadudua.

Me Baleti Ira na Gone

A wasea o Elder David A. Bednar e dua na italanoa ni yalorere ni oti na nona voroka tawa nakita na katubaleka ni dua na sitoa volekata na nona itikotiko (tabana e 46). A qai vakatavulica okoya ni gauna eda rai kina kivei Jisu Karisito ka muri Koya, sa rawa ni da yalovakacegu ka sega ni rere. Na cava o rawa ni cakava ena siga yadua mo vukei ira kina na luvemu mera rai kivua na iVakabula? O na vakatavulici ira vakacava mera toso ki liu ena vuku i Karisito kevaka sara madaga e dredre na veigauna?
A tukuna o Sisita Linda K. Burton, na peresitedi raraba ni iSoqosoqo ni Veivukei, me baleta e dua na matavuvale ka a toki ki na dua na vale vou e sega tu na kena bai wavolita na lomanibai (tabana e 29). A makataka o tama na iyalayala ni lomanibai ena wa ka tukuna vei ira na luvena ni ra na taqomaki voli kevaka era tiko eloma ni laini. Era a talairawarawa na gone, ena gauna sara madaga a tau kina ena tautuba ni wa e dua na polo. E rawa vakacava vei ira na itubutubu me ra vukei ira na luvedra me ra taqomaki voli? Na veivakalougatataki cava e lako mai na vakarorogo kivei ira na noda itubutubu? Na iyalayala cava soti e dau solia vei keda na Tamada Vakalomalagi?
O Bisopi Gérald Caussé, na iMatai ni Daunivakasala ena Matabisopi Vakatulewa, a talanoataka e tolu na turaga ni Aferika ka ratou a taubale voli ena rua na macawa ena salatu soso me ratou tiko rawa ena dua na soqoni ni tikina (tabana e 98)! Ratou a tiko me dua na macawa me rawa ni ratou vakayagataka na sakaramede ni bera na ilakolako lesu ki vale. Ratou sa qai kau kateni iVola i Momani ena uludratou mera veisoliaki kivei ira na tamata ena nodratou koro. O nanuma li ni kosipeli e sa dua na ka totoka? Na solibula cava soti e sa lomamu mo cakava mo bulataka kina na kosipeli?

Me Baleti Ira Na iTabagone

E vuqa na vosa ena koniferedi oqo era a veivakadreti ena bibi ni matavuvale kei na itikotiko. Me ivakaraitaki, o Sisita Bonnie L. Oscarson, na peresitedi raraba ni Goneyalewa, a kerei ira na lewe ni Lotu mera “taqomaka na itikotiko me vaka e sa ikarua ni vanua duadua ga ki na valetabu ena kena vakatabui” (tabana e 14). Na cava o rawa ni cakava mo taqomaka kina na itikotiko? O rawa ni veivuke vakacava ni cakava na nomu itikotiko me dua na vanua vakatabui?
A vakatavulica o Elder Russell M. Nelson ena Kuoramu ni iApositolo Le Tinikarua ni noda ivakarau ni bula kei na itovo ena Siga ni Vakacecegu e sa dua na ivakatakilakila ni Tamada Vakalomalagi kei keda (tabana e 129). Ni ko wilika na vosa nei Elder Nelson, sa rawa ni o vakasamataka toka na Sigatabu mai oqo ka tarogi iko, “Na ivakatakilakila cava au vinakata me’u solia kivua na Kalou?”
A vosa o Elder Ulisses Soares ena Vitusagavulu me baleta e dua na dikoni ka a muria na ivakaraitaki nei Kavetani Moronai (tabana e 70). Ni raica na cauravou ni ra sarava voli eso na itokani ni kalasi na iyaloyalo vakasisila ena nodra talevoni tuberi, a tukuna okoya kivei ira ni ra sa cakacala tiko ka sa dodonu mera muduka. E muduka rawa e dua na itokani. Eda na rawa kaukauwa vakacava ni digitaka na dina?” Eda kila vakacava na ka e sa bulati meda na rekitaka?
Na veigacagaca vakalivaliva eso sa rawa ni vakavu veivakaukauwataki baleta ni ra vakayacoka ki na itukutuku kei na kena e veikauyaki e via tawayalani. Ia o sa bau tu mada vakadua ka vakananuma ke ra sa lewai iko tiko? A kaya o Elder José A. Teixeira ena Vitusagavulu, “Sa veivakabulabulataki dina meda biuta vakatikitiki toka mada vakawawa na noda gacagaca vakalivaliva eso” (tabana e 96). Vakatovolea mada. So na gauna digitaka e dua na siga mo vakagalalataki iko mai na veigacagaca. Ena rairai vaka na iotioti ni ka o na via cakava, ia o na kidroa mai na levu cake tale ni gauna o na vakayagataka ni veivosaki ka veivakananumi voli vata kei ira na itokani kei na matavuvale.
Na lolo sa dua na sala vinaka sara ni kena vakabibitaki na kaukauwa vakayalo. A vakananumi keda o Perersitedi Henry B. Eyring, na iMatai ni Daunivakasala ena Mataveiliutaki Taumada, ni lolo kei na masumasu a vakaukauwataki Jisu me vorata na veitemaki nei Setani ni a tiko voli ena lekutu na iVakabula (tabana e 22). Ena Sigatabu ni lolo ka tarava, tovolea mo vakamuria na ivakaraitaki i Jisu ka lolovaka e dua na inaki. O na ciqoma na veivuke vakalou ka taqomaki talega.

Baleti Ira Na Qase

Era cauraka e vica ka vosa ena koniferedi na bibi ni vakawati kei na matavuvale ena bula vakaveimaliwai ka vakakina ena yavu ni veivakabulai. Sa rawa ni o sauma na lima na taro e taroga tiko o Sisita Burton ena tabana e 31 ka vakasamataka vagumatua ena masumasu na iwalewale o na rawa ni laveta cake ka lomani ira vinaka cake kina na voleka kivei iko. Vakamatavuvale, veivosakitaka na iwalewale dou na rawa ni vakadeitaka cake kina na nomudou itikotiko kivei Jisu Karisito kei na nomudou rawa ni veitokoni cake vakaikemudou
A vakananumi keda o Peresitedi Thomas S. Monson me baleta na veivakalougatataki e basika mai na sokalou ena valetabu, oka kina na bula vakayalo, vakacegu, kei na kaukauwa me ulabaleti kina na veitemaki kei na veivakatovolei eso (tabana e 91). “Ni da curuma na valetabu,” a kaya okoya, “e rawa ni lako mai vei keda e dua na ivakarau ni bula vakayalo kei na yalovakacegu ka na lakosivita na veivakanananu tale eso e rawa ni basika mai ki na loma ni tamata.” Na cava o rawa ni cakava me vakaibalebale vakalevu cake kina na nomu tiko ena valetabu?
Na vakabauti Jisu Karisito sa dua na ivakavuvuli ni cakacaka. “Eda na sega ni mai vakadinata vakailoa tale na iVakabula kei na Nona kosipeli mai na noda masu se saumi ikatini vakailoa,” a kaya o Elder L. Whitney Clayton ena Mataveiliutaki ni Vitusagavulu. “Eda digitaka meda vakadinata” (tabana e 36). Ni o wilika na nona vosa kei na vosa mai vei Elder Dallin H. Oaks ena Kuoramu ni iApositolo Le Tinikarua (tabana e 32); Rosemary M. Wixom, peresitedi raraba ni Lalai (tabana e 93); Bisopi Gérald Caussé (tabana e 98); kei Elder Kevin W. Pearson ena Vitusagavulu (tabana e 114), navuca ni cakava e dua na ituvatuva ni sala eso mo vaqaqacotaka kina na nomu vakabauti Jisu Karisito kei na Nona kosipeli. Qai cakava e dua na ituvatuva ni veivakalougatataki yalataki eso e basika mai ena vakalevutaki ni vakabauta.
A vakatavulica o Elder Jeffrey R. Holland ena Kuoramu ni iApositolo Le Tinikarua ni Veisorovaki kei na Tucaketale ni iVakabula a yavutaka “na vakatakilai cecere levu duadua ni loloma dina me qai bau vakaraitaki ena itukutuku makawa ni vuravura oqo” (tabana e 104). E rawa vakacava ni vakacilava vinaka cake na taleitaki ni veika e sa cakava na iVakabula na nomu vakasama, ivosavosa, kei na cakacaka eso?
A vakamacalataka o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada, na isolisoli veivakurabuitaki ni loloma soliwale kei na bibi ni talairawarawa kei na veivutuni. A kaya okoya “Na kena tovolei me kilai vakamatata na isolisoli ni loloma soliwale ni Kalou ena lomada kei na vakasama taucoko sa solia vei keda vakalevu cake na vuna meda lomana ka talairawarawa kina kivua na Tamada Vakalomalagi ena yalomalua kei na vakavinavinaka,” (tabana e 107). Navuca ni tomana na nomu vulica tikoga na loloma soliwale ena wiliki ni Roma 3:23; 6:1–4; 2 Nifai 25:23, 26; Mosaia 2:21; 5:2; 27:25; Alama 34:10, 15; Ica 12:27; kei na Moronai 10:32.