Na Matabete—e dua na iSolisoli Tabu
Mai vei Peresitedi Thomas S. Monson
O keda yadua eda sa nuitaki ena dua na isolisoli vakamareqeti e qai bau soli ki na kawatamata.
E dua na vakanananu se makare vinaka tu sai koya na tiko ena soqoni ni matabete niu se qai tabaki vou me dua na dikoni ka lagasere ena sere idola, “Ni gole mada mai, na matabete kece.”1 Ena bogi nikua, vei kemuni o ni soqoni tiko ena vale ni koniferedi ka vakakina e vuravura taucoko, au vakavoqataka na yalo ni serenilotu oya ka kaya vei kemuni: Ni gole mada mai na matabete kece, me da vakasamataka mada na noda lesilesi; me da vakananuma mada na noda itavi; me da vakatulewataka na noda itavilesi; ka da muri Jisu Karisito, na noda Turaga. Eda na duidui beka ena noda yabaki, ena noda ivalavala, se ena vanua eda lako mai kina, e vakaduavatataki keda na noda ilesilesi ena matabete.
Vei keda yadua, na vakalesui mai ni Matabete i Eroni vei Oliver Cowdery kei Josefa Simici mai vei Joni na Dauveipapitaisotaki sa ka bibi sara. Vakakina, na vakalesui mai ni Matabete i Melikiseteki vei Josefa kei Oliver mai vei Pita, Jemesa, kei Joni e dua na ka vakamareqeti.
Me da taura vakabibi sara na veikacivi, na itavi, kei na itavilesi e sala vata mai kei na matabete eda taura tu.
Au a vakila e dua na itavi bibi ena gauna au kacivi kina meu vunivola ni noqu kuoramu ni dikoni. Au a vakarautaka vakavinaka sara na itukutuku eso au dau vola, niu a vinakata meu cakava na kena vinaka duadua au rawata ena veikacivi oya. Au a doka vakalevu na noqu cakacaka. Meu cakava na veika taucoko au rawa ni cakava ena kena vinaka duadua au rawata, sai koya na noqu sasaga ena itutu kecega au taura.
Au nuitaka ni cauravou yadua sa tabaki ki na Matabete i Eroni era sa vakayadrati vakayalo ki na kena bibi na veikacivi sa tabaki kina, vakakina na veimadigi eso me vakalevulevuya kina na veikacivi oqori. Au a ciqoma e dua na madigi niu se dikoni ni ratou kerei au na matabisopi meu kauta na sakaramede vua e dua na tabusiga ka vakaitikotiko rauta ni dua na maile mai na neitou valenilotu. Ena mataka digitaki ni Sigatabu oya, niu tukituki ena katuba nei Baraca Wright ka rogoca ni kacivaka mai ena domona malumalumu, “Curu mai,” au curu yani sega walega ki na dua na vale ituvaki vakaloloma ia e dua talega na rumu ka vakasinaiti tu ena Yalo ni Turaga. Au lako yani kina yasa ni idavodavo nei Baraca Wright ka biuta e dua na tiki ni madrai ki na tebenigusuna. Au qai taura toka vua na bilo me rawa ni gunu. Niu biubiu mai, au raica na wainimata e matana ni kaya mai, “Me vakalougatataki iko na Kalou, noqu tagane.” A vakalougatataki au dina na Kalou—ena vakavinavinaka me baleta na ivakatakarakara tabu ni sakaramede kei na matabete au taura tu.
E sega ni dua na dikoni, ivakavuvuli, se bete mai na neitou tabanalevu ena guilecava rawa na veisiko guiguilecavi dredre keimami a vakayacora ki Clarkston e Utah, ki na ibulubulu nei Martin Harris, e dua vei iratou na Tolu na iVakadinadina ni iVola i Momani. Ni keimami tuwavolita na duru simede ka ivakatakilakila ni nona ibulubulu, ka ni wilika vei keimami e dua na iliuliu ni kuoramu na vosa veilauti oya mai na “Nodratou iVakadinadina na Lewe Tolu,” ka kunei ena itekivu ni iVola i Momani, keimami sa tara cake e dua na yalo e taleitaka na itukutuku tabu oya kei na veika dina e kunei kina.
Ena veiyabaki oya na neimami inakinaki me keimami yaco me vaka na luve i Mosaia. A tukuni kina me baleti ira:
“Io sa kaukauwa sara na nodratou vakabauta na ivakavuvuli; eratou sa tamata yalomatua ka dau wilika vagumatua na ivolatabu, me ratou kila kina na vosa ni Kalou.
“Ia e sega ni o koya walega oqori; eratou sa gumatua sara ena masumasu kei na lolo, ka sa tu vei iratou na yalo ni parofisai ka ratou tukuna na veika ena yaco, ia ni ratou sa vunau, eratou sa vunau ena kaukauwa kei na ilesilesi ni Kalou.”2
Au sega ni vakasamataka rawa e dua tale na takete kilikili cake me nona e dua na cauravou mai na nona vakamacalataki me vakataki iratou na luvena yaloqaqa ka buladodonu o Mosaia.
Niu sa volekata yani na yabaki 18 ka vakarau meu curu ki na veiqaravi vakaivalu lavaki vei ira kece na cauravou ena iKarua ni iValulevu, sa vakaturi meu ciqoma na Matabete i Melikiseteki, ia meu qiria rawa mada na noqu peresitedi ni iteki, o Paul C. Child, me dua na veivakatarogi. O koya e dua e dau taleitaka ka kila na ivolanikalou tabu, ka sa nona inaki me vakakina na nodra taleitaka ka kila na tamata kecega. Niu sa rogoca oti mai vei ira eso noqu itokani na nona dau veivakatarogi vakamatailalai, au sa nanuma meu kakua ni vakatakila vakalevu na noqu kilaka vakaivolanikalou; o koya gona, ena gauna au qiriti koya kina au vakatura me keirau qai sota ena Sigatabu ka tarava ena gauna me vaka na noqu kila ni sa vo ga e dua na auwa me tekivu nona soqoni ni sakaramede.
Na kena isau mai vua: “Isa, Baraca Monson, oqori ena sega ni veirauti kina na gauna vei kedaru me daru dikeva na ivolanikalou.” Sa qai vakatura mai o koya e dua na gauna ni se vo e tolu na auwa mai na nona gauna ni sakaramede, ka dusimaki au meu kauta tiko yani na noqu ivolanikalou vakatakilakilataki.
Niu yaco yani ki na nona vale ena Sigatabu, au kidavaka vakavinaka, ka sa tekivu sara na veivakatarogi. A kaya o Peresitedi Child, “I Baraca Monson, o sa taura tu na Matabete i Eroni. Era sa bau qaravi iko mada na agilosi?” Au sauma vua ni se bera. Ni taroga mai kevaka au kila ni dodonu talega meu vakaivotavota kina, au sauma tale niu se sega ni kila.
A dusimaka mai, “Baraca Monson, cavuqaqataka mai na 13 ni iwase ni Vunau kei na Veiyalayalati.”
Au sa tekivu sara, “Oi kemudrau na noqu itokani, au sa lesi kemudrau ena yaca ni Mesaia ki na itutu ni bete i Eroni, ka solia vei kemudrau na kaukauwa kei na lewa ni ilesilesi oqori, io na nodra cakacaka na agilosi dauveiqaravi …”
“Cegu mada,” e vakarota mai o Peresitedi Child. Oti, ena domo vinaka ka malumu, a qai vakasalataka mai, “Baraca Monson, kua ni guilecava me vaka ni o Matabete i Eroni o sa vakaivotavota ena nodra veiqaravi na agilosi.”
E vaka saraga ni tiko ena rumu oya e dua na agilosi ena siga oya. Au sega vakadua ni se bau guilecava na veivakatarogi oya. Au se vakila tu ga na yalo ni gauna tabu oya ni keirau wilika vata na itavi, na itavilesi, kei na veivakalougatataki ni Matabete i Eroni kei na Matabete i Melikiseteki—na veivakalougatataki ka na sega ni yaco ga mai vei keda ia vei ira talega na noda matavuvale kei ira tale eso ka na noda na galala dokai me da veiqaravi ena vukudra.
Au a tabaki meu italatala qase, ena siga meu biubiu kina ena laki vakaitavi ena mataivalu e wai, a mai duavata kei iratou na noqu matavuvale kei ira noqu itokani e dua na lewe ni matabisopi ena siteseni ni sitimanivanua me ra mai talaci au. Ni se bera na gauna ni sitimanivanua, a biuta e ligaqu e dua na ivola lailai ka yacana na iVolavakarau ni Kaulotu. Au dredre ka kaya niu sega ni lako ki kaulotu.
A sauma mai, “Kauta tu ga. De na bau laki yaga.”
A vakakina. Au a gadreva e dua na ka retequla me biu ena boto ni noqu kato ni lakoiwai me rawa ni davovinaka kina na noqu isulu ka kua ni sasanokinoki vakalevu. Na ka sara ga au gadreva na iVolavakarau ni Kaulotu ka yaga sara vakavinaka ena noqu kato ni lakoiwai ena loma ni 12 na macawa.
Ena bogi ni bera na vakacagicagi ni Kirisimasi, sa tu mai vale na neimami vakanananu. E vakanomodi na bareki, ia qai kasere na vakanomodi mai vei noqu itokani ena idavodavo tarava—e dua na gonetagane Momani, o Leland Merrill—sa tekivu me osi ena mosi. Au taroga se cava na vuna, qai kaya ni sa tauvimate dina saraga. E sega ni via lako ki na valeniwai ni keba, ni kila kevaka e vakayacora oqori ena rawa ni tarova nona lako ivale ena siga ka tarava.
Sa vaka me torosobu tikoga na kena ituvaki ni sa toso tiko na gauna. Oti, ni kila niu dua na italatala qase, a kerei au meu solia vua e dua na veivakalougatataki ni matabete.
Se bera vakadua niu bau solia e dua na veivakalougatataki ni matabete, se bera vakadua niu bau ciqoma e dua na veivakalougatataki, ka se bera vakadua niu bau raica na kena soli e dua na veivakalougatataki. Niu masuta lo na veivuke, au qai nanuma na iVolavakarau ni Kaulotu ena boto ni noqu kato ni lakoiwai. Au vakalala vakatotolo na kato ka kauta na ivola ki na cina ni bogi. Au qai wilika kina na ivakarau me vakalougatataki kina e dua na tauvimate. Ni ra vakararai tu e vuqa na dausoko, au vakayacora na veivakalougatataki. Ni se bera mada ga niu biuta lesu tale na veika kece ena loma ni kato, sa mocelutu me vaka e dua na gonelailai o Leland Merrill. A yadra cake mai ena mataka ka tarava ni sa vinaka cake sara. E vakaitamera na vakavinavinaka keirau dui vakila ena mana ni matabete.
Sa kauta mai na veiyabaki na veimadigi e vuqa meu veivakalougatataki kina vei ira era gadreva kau sa sega ni wilika rawa. Na veimadigi oqori sa kunei au ena vakavinavinaka titobu ni sa nuitaki au na Kalou ena isolisoli tabu oqo. Au rokova na matabete. Au vakadinadinataka na kena mana ena veigauna e vuqa. Au sa raica na kena kaukauwa. Au sa qoroqoro ena veicakacaka mana sa vakayacora.
Kemuni na taciqu o keda yadua eda sa nuitaki ena dua na isolisoli vakamareqeti e qai bau soli ki na kawatamata. Ni da rokova na noda matabete ka bulataka na noda bula me da kilikili tikoga ena veigauna, ena drodro yani mai vei keda na veivakalougatataki ni matabete. Au dau taleitaka na veimalanivosa e kunei ena Vunau kei na Veiyalayalati, wase 121, tikina e 45, ka tukuna vei keda na veika me da vakayacora me da kilikili tiko kina: “ia me uasivi sara na nomu loloma vei ira na tamata kecega, kei ira era sa veitokani ena vakabauta, mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi.”
Ni da taura tu na matabete ni Kalou, eda sa vakaitavi ena cakacaka ni Turaga o Jisu Karisito. Eda sa rogoca na Nona kaci; eda cakava tiko na Nona cakacaka. Me da vuli mai Vua. Me da muria na imawe ni Yavana. Me da bula ena Nona ivakavuvuli. Ni da sa vakayacora vakakina, eda na vakarau tu ki na veiqaravi cava ga ena kacivi keda kina ko Koya. Oqo na Nona cakacaka. Oqo na Nona Lotu. E dina sara, o Koya na noda kavetani, na Tui ni Lagilagi, io na Luve ni Kalou. Au vakadinadinataka ni bula tiko o Koya ka wasea na ivakadinadina oqo ena yaca i Jisu Karisito, emeni.