Elder Allen D. Haynie

Matai ni Kuoramu ni Vitusagavulu

A tokoni me lewe ni iMatai ni Kuoramu ni Vitusagavulu o Elder Allen Decker Haynie ena ika 4 ni Epereli, 2015.

A sucu o Elder Haynie ena 29 ni Okosita, 1958, vei rau o Van Lloyd kei Sarah Lulu Lewis Haynie.

A sucu o koya mai Logan, Utah, ia a dau tiko voli ena veikoro lelevu eso ena vualiku kei Utah vakakina ena Silicon Valley mai California ena nona gauna vakaitabagone. A vuli ena lima na paraimiri duidui, rua na vulitorocake e ra, oti qai vuli ena dua na vulitorocake mai Bountiful, Utah.

Na rabailevu ni veika sotavi oqo “sa vakavulica vei au e dua na lesoni cecere me baleta na vuli me da marautaka na tamata kecega,” e kaya o koya, “baleta ni vaka me veiyabaki kecega dau veisau na vanua au tiko kina ka veisau na itokani. E dua na ka au taleitaka me baleta na Lotu sai koya ni solia vei keda na madigi me da veimaliwai kei ira na tamata ka kunea na vinaka ena duidui ni nodra ivakarau ni bula, veika era sotava, taledi, kei na rawaka.”

A veiqaravi o koya ena Tabana ni Kaulotu na Argentina Cordoba mai na 1977 ki na 1979.

Ni sa rawata tu e dua na diqiri ni bachelor ni political science mai na Brigham Young University, qai laki rawata o Elder Haynie na nona juris doctorate mai na Koronivuli ni Lawa na J Reuben Clark ena univeisiti ena 1985.

A vakacavara e dua na yabaki ni cakacaka vakavunivola ni lawa ena U.S. Ninth Circuit Court of Appeals mai San Diego, California, ni se bera ni qai laki curu ena kabani ni loya na Latham and Watkins, ka veiqaravi mai na valenivolavola e San Diego. Rauta ni lima na yabaki sa oti rau a tauyavutaka vata kei tacina na nodrau kabani ni loya.

Sa veiqaravi oti talega o Elder Haynie vakaperesitedi ni kuoramu ni italatala qase, peresitedi ni Cauravou ena tabanalevu, qasenivuli ni semineri, matabose e cake, bisopi, peresitedi ni iteki, ka Vitusagavulu ni iWasewase.

A sotavi Deborah Ruth Hall o koya ni vuli voli e BYU, ka rau a vakamau ena 19 ni Tiseba, 1983, ena Valetabu e Salt Lake. Erau nodratou itubutubu e ono na gone.

Ni luluvu ena gauna e wasea tiko kina na nona ivakadinadina, e tukuna o Elder Haynie na imatai ni gauna e wilika ka vakatakilakilataka kina na iVola i Momani ena gauna e yabaki 12. “Au sega ni nanuma rawa e dua na gauna au a sega ni vakadinata kina; au sega ni nanuma rawa e dua na gauna au a sega ni masu kina.”