Drau Vakaluveni, ka Tubu me Lewe Vuqa, ka Vakatawai Vuravura

Mai Vei Elder Joseph W. Sitati

Ena Vitusagavulu

Sa vakaroti keda ka vakalougatataki keda na Tamata Vakalomalagi meda vakaluveni, ka tubu me lewe vuqa, ka vakatawai vuravura me rawa ni da vakataki Koya.

Sa vakavinavinaka tiko, ki na Tabernacle Choir, ena vuku ni sere kamica sa vakalagilagi kina na iVakabula kei vuravura.

Na siga a kaciva kina na Luvena e Duabauga ka Vakatubura na Kalou na Tamana, me bulia na tamata me itovo vata kei Rau ka ucui Rau, a vakalougatataki ira na Luvena, ka kaya, “Drau vakaluveni, ka tubu me lewe vuqa, ka vakatawai vuravura, ka vakamalumalumutaka ka lewa … kei na veika bula kecega sa qasi voli e delai vuravura.”¹ Sa vaka oya, e tekivu na noda ilakolako ena bula oqo ka toka kina e dua na ivakaro lagilagi kei na dua na veivakalougatataki. A solia vei keda na Tamada dauloloma e dua nai ivakaro kei na dua na veivakalougatataki meda vakaluveni, ka vakamalumalumutaka ka lewa, me rawa nida tubu ka yaco me vakataki Koya.

Kemuni na taciqu kei na ganequ, au sureta na nomuni vakabauta kei na masu ena yakavi nikua niu wasea vei kemuni eso na vakasama me baleta na tolu na itovo bibi ni noda ituvaki vakalou. Sa noqu masu meda na kila deivaki ka vakayacora taucoko na noda itavi tabu—na iVakaro i Tamada—meda vakavinakataka na noda ituvaki vakalou me rawa nida muataka vakavinaka na noda salatu ka rawata na noda icavacava vakalou.

iMatai, a Vakaroti keda na Kalou Meda Vua

E dua na tiki bibi ni noda vua ka dau raibaleti ena so na gauna sa ikoya na kena vakavotukanataki mai na matanitu ni Kalou e vuravura. A vakavulica na iVakabula:

“Oi au na vaini, koi kemudou na tabaqu: ko koya sa tu vei au, koi au talega vei koya, sa vua vakalevu: ke dou sa tawase tani vei au, dou na sega ni rawata e dua na ka. …

“Kevaka dou sa tu vei au, ka sa tu vei kemudou na noqu vosa, dou na kerea na ka dou sa vinakata, ia ena yaco vei kemudou.

“A ka oqo sa vakarokorokotaki kina ko Tamaqu, ni dou sa vua vakalevu; ka dou na qai noqu tisaipeli.”²

Eda na vua kevaka eda tu vei Karisito ka vakakina ni da “taura [vei keda na Yacana] [ka] … qaravi koya me yacova na i vakataotioti”³ ena noda vukei ira tale eso mera lako yani Vua.

Ena noda veisiga oqo, era tomana tikoga na noda parofita kei na iapositolo dina na kacivi keda yadudua tiko ena veisureti meda vakaitavi vakataucoko ena cakacaka ni veivakabulai me salavata na ka eda rawata kei na noda veimadigi.

Na itekitekivu ni talairawarawa ka na rawati vakalevu kina na vua oqo sai koya na “yalomalua kei na yalomalumalumu.”⁴ Sa da na qai rawa ni gole vakataucoko vei Karisito ena noda vakarorogo kina domo ni Yalo Tabu ka vakayacora na veiyalayalati kece sara eda sa cakava.⁵ Sa da na qai rawa ni vakasaqara ka ciqoma na isolisoli ni loloma uasivi ka noda kina na kaukauwa meda sureti ira na noda dui matavuvale, noda qase eliu, ira na lewe ni lotu kei ira era sega ka da tiko veitikivi vakakina o ira na noda itokani mera ciqoma na kosipeli i Jisu Karisito.

E dau ka rekitaki ka sega ni vaka me itavi na cakacaka ena yalololoma uasivi. Sa yaco na veibolebole mera madigi ni taraicake ni vakabauta. Eda yaco meda “ivakadinadina ni [vinaka] ni Kalou ena veigauna kecega, kei na veika kece, kei ena veivanua kecega [eda] sa tu kina, me yacova na mate.”⁶

O keda kece eda rawa ka sa dodonu meda vakaitavitaki keda vakataucoko ena cakacaka ni veivakabulai. Sa solia tu vei keda na veitavi oqo ka salavata kei na kena yalayala na iVakabula: “Au sa digitaki kemudou, ka lesi kemudou, mo lako, ka vua, ka me tiko talega na vuamudou: me solia kina vei kemudou ko Tamaqu na ka kecega dou na kerea vua ena yacaqu.”⁷

iKarua, Sa Vakaroti Keda na Kalou meda Tubu ka Lewe Vuqa

Na yagoda e veivakalougatataki mai vua Kalou. Eda ciqoma meda vakayacora kina na taucoko ni nona inaki na Tamada Vakalomalagi “io mera tucake tale mai na mate na tamata kece ga, ka rawata na bula tawamudu.”⁸ Na yago sa ikoya na sala eda rawa ni rawata kina na noda inaki vakalou.

Na yagoda ena vakatara vei keda na luvena vakayalo talairawarawa na Tamada Vakalomalagi meda mai tovolea na bula e vuravura.⁹ Na vakaluveni ena solia vei ira na luvena vakayalo tale eso na Kalou, na madigi mera mai rekitaka talega na bula e vuravura. O ira kece era sucu mai ena bula oqo sa nodra na madigi mera torocake ka mera vakalagilagi kevaka era muria na ivakaro ni Kalou.

Na vakamau ni dua na tagane kei na yalewa sa ivakarau ka lesia na Kalou me vakayacori vakataucoko kina na ivakaro ni tubu me lewe vuqa. Ena sega ni rawa na tubu me lewe vuqa ena vakawati vakamataqali vata.

Na vakamau vakalawa ka vauci e valetabu ka rokovi na kena veiyalayalati ni veivauci e solia vei rau na itubutubu vakakina vei ira na gone na madigi me vakilai na loloma uasivi duadua ka vakavakarau kina dua na bula vuavuai vinaka. E solia vei ira na vanua totoka duadua ka rawa ni ra bulataka kina na nodra veiyalayalati era sa vakayacora vata kei na Kalou.

Ena vuku ni Nona loloma vei keda, sa vakarautaka kina vei ira kece sara na luvena yalodina na Tamada Vakalomalagi era sega se sega ni rawa vei ira me rekitaka na veivakalougatataki ni dua na vakamau ena veiyalayalati, kei ira na gone, se na taucoko ni veivakalougatataki oqori ena so na vuna ka sega ni nodra lewa, ena kena gauna ga sa lesia na Turaga, era na rekitaka talega na veivakalougatataki oqori.¹⁰

Era sa vakasalataka tiko na parofita bula kei na iapositolo mera curuma na veiyalayalati ni vakamau tawamudu o ira kece sa nodra na madigi ka mera vakayacora ena yalomatua kei na vakabauta. E sega ni dodonu vei keda meda vakatikitikitaka na gauna ni siga vakalou oya ena vuku ni veisasaga vakavuravura se nanamaki tikoga ki na dua na itokani e veiganiti cake ena dua na ivakatagedegede ka ra vakasuka kina o ira kece e rawa ni ra veiganiti.

Na yalayala baleti ira kece era sa vauci ena veiyalayalati ni vakamau tawamudu, ka ra vuavuai vinaka tiko ena nodra maroroya tiko na nodra veiyalayalati, ena sega vakadua na nona kaukauwa na vunica me vakarusa na yavu ni nodrau veitokani tawamudu.

iKatolu, sa Vakaroti keda na Kalou, meda Rawai Vuravura

Meda vakamalumalumutaka na vuravura ka lewa na ka bula kecega sa ikoya meda lewa na veika, mera vakayacori kina na lewa ni Kalou¹¹ ni ra vakayacora na ka era gadreva na Luvena. Na vakamalumalumutaka oqo, e oka talega kina na noda lewa vinaka vakaikeda na yagoda.¹² E sega ni okati kina, na noda sega ni lewa rawa na kena vakayagataki se kena vakayagataki me veibasai kei na lewa ni Kalou.¹³

Na vakatuburi na veika e ganiti me vakamalumalumutaki kina na vuravura e tekivu ena noda kidava na noda malumalumu vakatamata vakakina na kaukauwa e rawa ni noda ena vukui Karisito kei na Nona Veisorovaki. Me “vaka a kaya o Karisito: Kevaka dou sa vakabauti au, dou na kitaka na ka kece ga e na vukuqu.”¹⁴ Ena noda na kaukauwa oqo ena gauna eda digitaka kina meda talairawarawa ki na Nona iVakaro. Eda vakalevutaka na noda rawata, ena vakasaqarai ni isolisoli ni Yalotabu vakakina na noda vakalevutaka na noda veitaledi.

Au a sucu ka tubu cake mai ena vanua kei na ituvaki malumalumu me vaka e vuqa sara na matavuvale e Aferika. Au a rawata, meu vueti au cake mai na veituvaki oqori ena noqu vakasaqara ka vakayagataka vinaka na vuli vinaka ena veivuke kei na veikaroni nodrau na noqu itubutubu. Na noqu saga meu raivotutaka rawa na ka au rawa ni na yacova a yaga sara vakalevu kina noqu tubu cake. Keirau qai kunea kei watiqu o Gladys ena dua na gauna e muri vaka dua na veiwatini gone na kosipeli vakalesui mai, ka sa dau tomana tikoga me vakalougatataka na neirau bula ena veidusimaki vakayalo. Vaka ga na veimatavuvale kece, sa tu na nona veivakatovolei kei na bolebole. Ia ni da raica yani na veivuke ni Turaga, eda sa kunea na kena isau ka dau kauta mai na vakacegu kei na veimaroroi ka da sega kina ni kuitaki ena veika oqori.

Sa tubu cake tikoga na veibolebole sa sotava tiko ena gauna oqo na kawa tamata, oka kina na ivakarau butobuto, iyaloyalo vakasisila, na veiraravui ena iyaragi, vakabenubenu, waigaga ni veivakametenitaki kei na dravudravua, baleta ni levu e vuravura era sa digia tiko mera vuki “ki na lewa ni tevoro kei na gagadre vakayago”¹⁵ ka segai ki na na lewa ni Kalou. “Era sa sega ni vakasaqara na Turaga ka vakadeitaka na nona yalododonu; ia era sa dui muria ga na lomadra na tamata yadua ka qarava na kalou era sa dui bulia ga vakavuravura.”¹⁶

Ia, na Kalou sa sureti ira kece tu na Luvena mera ciqoma na Nona veivuke mera vorata ka vosota rawa kina na veibolebole ni bula oqo ena veivosa oqo:

“Ko i au na Kalou; raica au a bulia na vuravura kei na tamata, ni bera ni ra mai sucu vakayago.

“… Mo saumaki mai vei au ka rogoca na noqu vosa ka vakabauta sara; io mo veivutunitaka na nomu ivalavala ca ka papitaisotaki e na wai e na yaca ni Luvequ e Duabauga … , ko na rawata na isolisoli ni Yalo Tabu, ka kerea na ka kecega ena yacana, ia na ka kece ko sa kerea e na yacana, ena soli vei iko.”¹⁷

Na Yalododonu Edaidai yalodina era kila vinaka tu na kedra ituvaki vakalou era dau vakararavi tu e yalodra taucoko ki na kaukauwa sa tu ena Veisorovaki ni Turaga o Jisu Karisito era dau vakaukauwataki ena nodra malumalumu vakayago ka yaco mera “rawa ni kitaka na ka kecega.”¹⁸ Ena yaco mera dau vorata rawa na veitemaki ki na ca ka dau vakabobulataka e lewe vuqa vua na vunica. A vakavulica o Paula:

“Ia sa yalodina na Kalou o koya ena sega ni laivi kemudou mo dou dauveretaki vakalevu cake, me vaka ga na nomudou kaukauwa ka na cakava talega kei na vere na sala mo dou dro kina, mo dou vosota rawa.”¹⁹

“Ni sa vosota na ka ca ko koya, ni sa dauveretaki, sa qai rawata kina me vukei ira era sa dauveretaki.”²⁰

Sa vakaroti keda ka vakalougatataki keda tu na Tamada Vakalomalagi meda vuavuai vinaka, ka tubu, ka vakatawai vuravura ka yaco me vakataki Koya. Sa vakarautaka tu na veivuke vei keda yadudua me rawa kina, me vaka na noda dui digidigi vakataki keda, meda tubu meda vakataki Koya. Sa noqu masu nida na bulataka na noda bula ena sala meda dusimaki kina ena rai ni keda ituvaki vakalou, ka taura me noda na veimadigi kece vakalou me baleti keda, ka rawata vinaka yani na noda icavacava vakalou.

Au vakadinadinataka ni rau sa bula dina tiko na Kalou na Tamana kei na Luvena Lomani, o Jisu Karisito na noda iVakabula; kei na Nona ituvatuva lagilagi ni marau; kei na idola kece sa vakatikora tu mai vua e dua na parofita bula e vuravura nikua, o Thomas S. Monson eda sa lomana ka tokona. Sa noqu masu me noda na kaukauwa meda rekitaka kina na taucoko ni Nona veivakalougatataki ena yacai Jisu Karisito, emeni.