Ko Hono Tauhi ha Lekōtí

ʻOku fakatatau ʻe Palesiteni ʻUkitofa ʻa hotau kuongá ki he kuonga ʻo e kau paioniá. Neongo ne ʻikai ke ke kolosi ʻi he teleʻá, ka ʻoku mahulu hake hoʻo tatau mo e kau paioniá ʻi he meʻa ʻokú ke fakakaukau atu ki aí! Te ke toe lava foki ʻo fakahaaʻi ʻa e manavaʻofá, ngāue mālohí, mo e fakatuʻamelié. Pea hangē ko ia ʻoku tau ʻilo naʻe fakahaaʻi ʻe he kau paioniá ʻa e ngaahi ʻulungaanga ko ʻení koeʻuhí ko e ngaahi lekooti ne nau tauhí, ʻe lava ke ʻilo koe ho hakó ʻi hoʻo tohinoá.

Toʻo ha ngaahi miniti siʻi ke hiki ha kiʻi meʻa fekauʻaki mo koe ʻi hoʻo tohinoá. Te ke lava ʻo tohi fekauʻaki mo e ngaahi meʻa fakalaumālié, ʻo hangē ko e founga naʻá ke maʻu ai hoʻo fakamoʻoní pe ikunaʻi ʻa e ngaahi faingataʻá ʻi he tokoni ʻa e Tamai Hēvaní. Te ke lava foki ke tokoniʻi ho makapuna tolú (ʻa ia te nau ala lau hoʻo tohinoá ʻi ha ʻaho!) ke nau ʻiloʻi pe naʻe fēfē ho moʻui fakaʻahó. Ko e hā ha ngaahi ngāue ʻokú ke fai ʻi he akó? ʻOku fōtunga fēfē ho lokí? Ko e hā hoʻo manatu melie ki ho fāmilí?

ʻI hoʻo kamata tohi ha meʻa siʻi ʻi he ʻaho kotoa pē, he ʻikai ngata pē ʻi hoʻo lava ʻo sio lelei ange ai ki he founga ʻoku tokoniʻi koe ʻe he Tamai Hēvaní ʻi hoʻo moʻui fakaʻahó, ʻo hangē pē ko ʻEne tataki ʻa e kau paioniá, ka te ke tuku foki ai ha tukufakaholo ki ho hakó ʻi he kahaʻú.