Mateuteu Nai ke Maʻu ʻa e Lakanga Taulaʻeiki Faka-Melekisētekí?
“Ko kinautolu kotoa pē ʻoku maʻu ʻa e lakanga fakataulaʻeikí, ʻoku nau tali ʻa e fakapapau mo e fuakava ko ʻení mei heʻeku Tamaí, ʻa ia ʻoku ʻikai te ne lava ʻo maumauʻi, pea ʻoku ʻikai lava foki ke ueʻi ia” (T&F 84:40).
Tā fakatātaaʻi ʻe John Kachik
ʻOku maʻu ʻa e Lakanga Taulaʻeiki Faka-Melekisētekí ʻi he fakapapau naʻe fai ʻe he Tamai Hēvaní pea mo ha fuakava naʻe fai ʻi ho vā pea mo Iá, ʻo ʻikai tatau mo e Lakanga Taulaʻeiki Faka-ʻĒloné, ʻa ia ʻoku maʻu taʻe fai ha fakapapau. ʻE tokoni ʻa e ngaahi foʻi fakakaukau ko ʻení ke mahino kiate koe ʻa e ngaahi kupuʻi lea mahuʻinga ʻi he Tokāteline mo e Ngaahi Fuakava 84:33–44, ʻa ia naʻe fakahā ai ʻe he ʻEikí ʻa e fakapapau mo e fuakava ʻo e lakanga fakataulaʻeikí.
Ko e hā ʻa e fakapapau naʻe fai heʻetau Tamai Hēvaní?
“ʻOku hanga ʻe he feinga ke taau mo e fakapapau mo e fuakava ko iá, ʻo ʻomi ʻa e meʻaʻofa maʻongoʻonga taha ʻa e ʻOtuá: ʻa ia ko e moʻui taʻengatá. Ko ha taumuʻa ia ʻo e Lakanga Taulaʻeiki Faka-Melekisētekí. ʻI heʻetau tauhi ʻa e ngaahi fuakavá ʻi hono maʻu ʻa e lakanga fakataulaʻeikí pea mo fakafoʻou kinautolu ʻi he ngaahi ouau fakatemipalé, ʻoku talaʻofa mai ai kiate kitautolu ʻi ha fakapapau meia ʻElohimi ko ʻetau Tamai Hēvaní, te tau maʻu ʻa e fonu ʻo Hono nāunaú ʻi heʻetau moʻui ʻo tatau mo Iá.”
Vakai, Henry B. Eyring, “Tui mo e Fakapapau mo e Fuakava ‘o e Lakanga Fakataulaʻeikí,” Liahona, Mē 2008, 61.
Ko e hā ho fatongia ʻi he fuakavá?
“Ko e fuakava ʻi he tafaʻaki ʻa e tangatá ko ʻene fakahoko totonu hono uiuiʻi ʻi he lakanga fakataulaʻeikí [vakai, T&F 84:33], pea te ne moʻui fakatatau mo e foʻi lea kotoa pē ʻe tō mei he fofonga ʻo e ʻOtuá, pea te ne tauhi ʻa e ngaahi fekaú.”
Palesiteni Joseph Fielding Smith (1876–1972), “Magnifying Our Callings in the Priesthood,” ʻi he conference Report, Apr, 1970, 59.
ʻOku ʻuhinga ki he hā ke fakafoʻou ho sinó?
“Kuó u mātā hono fakahoko ʻo e talaʻofa ko iá ʻi heʻeku moʻuí pea mo ha niʻihi kehe. Naʻe ʻi ai haku kaungāmeʻa naʻe palesiteni fakamisiona. Naʻá ne fakahā mai ʻi he fakaʻosinga ʻo e ʻaho takitaha lolotonga ʻene ngāué, naʻe tātātaha ke ne lava ʻo aʻu ki ʻolunga ki hono mohengá mo ʻene fifili pe te ne maʻu nai ha mālohi ke toe fehangahangai mo ha ʻaho foʻou. Ka ʻi he hoko mai ʻa e pongipongí, te ne ʻiloʻi ai kuo toe fakafoʻou hono mālohí mo ʻene lototoʻá. Kuó ke mātā ia ʻi he moʻui ʻa e kau palōfita toulekeleká, ʻa ia naʻe hangē naʻe fakafoʻou maʻu pē ia he taimi kotoa pē ne nau tuʻu ai ke fakamoʻoniʻi ʻa e ʻEiki ko Sīsū Kalaisí mo e ongoongolelei kuo toe fakafoki maí. Ko ha talaʻofa ia kiate kinautolu ʻoku laka atu ʻi he tuí ʻi heʻenau ngāue ʻi he lakanga fakataulaʻeikí.”
Vakai, Henry B. Eyring, “Tui mo e Fakapapau mo e Fuakava ‘o e Lakanga Fakataulaʻeikí,” Liahona, Mē 2008, 62.
ʻOku ʻuhinga ki he hā ke tali ʻa e ʻEikí?
“Ko e kakai tangata ko ia ʻoku nau maʻu moʻui taau e lakanga fakataulaʻeikí, ʻoku nau maʻu e ʻEiki ko Sīsū Kalaisí, pea ko kinautolu ʻoku nau maʻu e ʻEikí ʻoku nau maʻu e ʻOtua ko e Tamaí. Pea ko kinautolu ʻoku nau maʻu [ʻa e Tamaí] te nau maʻu ʻa e meʻa kotoa pē ʻokú Ne maʻú. ʻOku tafe mai ha ngaahi tāpuaki fakaofo mei he fakapapau mo e fuakavá ni ki he kakai tangata mo fafine moʻui taau mo e fānau kotoa pē ʻi he māmaní.”
ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ngaahi Fuakavá,” Liahona, Nōvema 2011, 88.
Ngaahi Potufolofola Fakahokohoko: Ko Hono Tali ʻo e ʻEikí
Ko hono tali ʻo e lakanga fakataulaʻeikí ko ha founga ia ʻe taha hono tali ʻo e ʻEikí. Lau ʻa e ngaahi vēsí ke ʻilo ha meʻa lahi ange: Sione 13:20 mo e Tokāteline mo e Ngaahi Fuakava 112:20.
Ngaahi Lēsoni ʻo e Sāpaté
Tefito ʻo e Māhina Ní:
Ngaahi Ouaú mo e Ngaahi Fuakavá