Taimi ʻo e Folofolá

Ko e Tala-fakatātā ʻo e Ngaahi Talēnití

Fai ʻe Jean Bingham

ʻOku nofo ʻa e tokotaha naʻá ne faʻú ʻi ʻIutā, USA.

Ako fakataha ʻi he taʻú ni ki he Fuakava Foʻoú!

Naʻe fai ʻe Sīsū ha talanoa, pe tala-fakatātā, kau ki ha tangata naʻá ne nō atu ha ngaahi foʻi paʻanga ki ha kakai ʻe toko tolu naʻe ngāue kiate ia. Hili ia pea ʻalu ʻa e tangatá. Lolotonga ʻene mamaʻó, naʻe ngāue mālohi ha tokoua ʻo kinautolu mo fakaʻaongaʻi ʻena paʻangá ke maʻu ha paʻanga lahi ange ke fakafoki ki he tangatá. Ka ko ha tokotaha naʻá ne tanu pē ʻa e paʻangá koeʻuhí he naʻe manavasiʻi naʻa mole. Ko e taimi naʻe foki mai ai ʻa e tangatá, naʻá ne foaki ha ngaahi pale kiate kinaua naʻá na fakalahi ʻa e paʻanga naʻá ne ʻoange kiate kinauá. Ka naʻá ne toʻo ʻa e paʻanga ʻe taha mei he tokotaha naʻe ʻikai ke feinga ke fakalahi iá. (Vakai, Mātiu 25:14–29.)

Kuo foaki mai ʻe he Tamai Hēvaní kiate kitautolu takitaha, ʻo hangē ko e tangata ʻi he tala-fakatātaá, ha faʻahinga meʻa ʻoku fuʻu mahuʻinga ʻaupito—ʻoku ʻikai ko e paʻanga maka, ka ko ha ngaahi poto pe ngaahi talēniti makehe, hangē ko e hivá, fakahaaʻi ʻo e ʻofá, lelé, pe tokoniʻi ʻo e niʻihi kehé. Pea hangē ko e kakai ʻi he tala-fakatātaá, kuo pau ke ke ngāue ke fakatupulaki ho ngaahi talēnití!

Te ke muimui fēfē ki he ngaahi akonaki ʻa Sīsuú ʻaki hono fakaʻaongaʻi mo fakatupulaki ho ngaahi talēnití? Te ke lava ʻo ongoʻi fiefia ange mo tokoniʻi ʻa e niʻihi kehé ʻi he taimi ʻokú ke fai ai iá.

Ako Lahi Ange

Ko e talēnití ko ha poto makehe, ʻo hangē ko e talēniti ke tā fakatātaá. Ka ʻi he kuonga ʻo Sīsuú, naʻe ʻuhinga ʻa e foʻi lea talēnití ko ha paʻanga naʻe lahi hono mahuʻingá. ʻOku faitatau fēfē ʻa e faʻahinga talēniti ko ʻení ʻe ua?

Talanoa Fakafāmilí

Tokoniʻi ʻa e mēmipa takitaha ʻo e fāmilí ke ne tala atu ha talēniti ʻe taha ʻokú ne maʻu. Te mou fetokoniʻaki fēfē ke fakatupulaki homou ngaahi talēnití? Talanoa fekauʻaki mo e founga hono fakaʻaongaʻi homou ngaahi talēnití ke tokoniʻi ʻa e niʻihi kehé mo fakahaaʻi ki he Tamai Hēvaní hoʻomou loto houngaʻiá. Fakatukupaaʻi ʻa e kau mēmipa ʻo e fāmilí ke nau fakasiosio homou ngaahi talēnití takitaha pea fakamālōʻiaʻi fakamātoato ia ʻi he ʻaho takitaha.

Hiva: “ʻPehē kiʻi Vaitafé,‘ ʻFoaki‘ (Tohi Hiva ʻa e Fānaú, 116)

Potufolofolá: Tokāteline mo e Ngaahi Fuakava 46:11

Vitioó: ʻAlu ki he Biblevideos.lds.org ke mamata ʻi he “The Parable of the Talents”

Tokoni Fakafolofolá

Ko ha founga fakafiefia hono fakatātaaʻi ʻo ha talanoa he folofolá ke ʻilo lahi ange ki ai.

1. Vahe ki ha taha ke ne fakatātaaʻi ʻa e konga takitaha ʻi he talanoá. Te mou lava ʻo fakaʻaongaʻi ha fanga kiʻi teunga mo ha ngaahi nāunau hangē ko e pulupulu kaukaú (bathropes) pe koini pepá.

2. ʻAi ha taha ke ne lau ʻa e talanoá, taʻofi ʻi he ʻosi ʻa e veesi takitaha ke lava ʻe he kau fakafaivaʻí ʻo fakatātaaʻi ʻa e meʻa naʻe toki laú.

3. Toe fakatātaaʻi ʻa e talanoá ke lava ʻa e taha kotoa ʻo fiefia.

Fakaʻaliʻali Talēniti Fakafāmili

Palani ha fakaʻaliʻali ke fevahevaheʻaki ai homou ngaahi talēnití.

1. ʻAi ʻa e mēmipa takitaha ʻo e fāmilí ke ne fakaʻaliʻali ha meʻa ʻokú ne lelei aí, hangē ko e laukonga leʻo lahí, taʻo ʻo ha fanga kiʻi kūkisi, fakahoko ha foʻi hiva, fai ha foʻi tūkuhua, vilo sākisi, pe fai ha foʻi malimali fiefia.

2. Ko e taimi ʻe ʻosi ai hono fai ʻe ha mēmipa ha talēnití, ʻai ʻa e toenga ʻo e kau mēmipa ʻo e fāmilí ke nau talaatu ha faʻahinga meʻa lelei naʻa nau fakatokangaʻi fekauʻaki mo e tokotaha ko iá.

3. Ko e fakaneifuá, fakatahaʻi ʻa e ngaahi fuaʻiʻakau manako ʻo e tokotaha takitaha ke ʻai ha sālati fuaʻi ʻakau ifo!

Vahevahe Ho Talēnití!

Feituʻú:

ʻAhó:

Taimí:

ʻOmai ha konga fuaʻi ʻakau ke tokoni ʻi hono ngaohi ʻo e fakaneifuá!

Te ke lava ʻo paaki ha ngaahi tatau lahi ange ʻo e fakaafé ʻi he liahona.lds.org.

Ngaahi tā fakatātā ʻa Josh Talbot