Kiʻi Tohi Fakamatala ʻo e Konifelenisi ʻo ʻEpeleli 2015

“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).

ʻI hoʻo toe vakaiʻi ʻa e konifelenisi lahi ʻo ʻEpeleli 2015, ʻe lava ke ke fakaʻaongaʻi ʻa e ngaahi pēsí ni (mo e Ngaahi Tohi Fakamatala Konifelenisi ʻi he ngaahi makasini he kahaʻú) ke tokoni atu ki hoʻo akó mo hono fakaʻaongaʻi ʻa e ngaahi akonaki fakamuimuitaha ʻa e kau palōfitá mo e kau ʻaposetolo moʻuí mo e kau taki kehe ʻo e Siasí.

Ke lau, mamataʻi pe fanongo ki he ngaahi lea ʻo e konifelenisi lahí, vakai ki he conference.lds.org.

“Ko e Fāmilí: Ko ha Fanongonongo ki Māmani”

“ʻOku ʻi ai ha tefitoʻi moʻoni ʻe tolu ʻoku akoʻi ʻi he fanongonongó ʻoku ou pehē ʻoku nau fie maʻu moʻoni ha kau taukapo tuʻu taʻeueʻia. …

“… Tau tokoni muʻa ʻi hono langa e puleʻanga ʻo e ʻOtuá ʻaki ʻetau tuʻu lototoʻa ʻo taukapoʻi ʻa e nofomalí, tuʻunga fakaemātuʻá pea mo e ʻapí. ʻOku fie maʻu ʻe he ʻOtuá ke tau lototoʻa, tuʻu maʻu mo taʻeueʻia ʻo taukapoʻi ʻEne palaní pea akoʻi ʻEne moʻoní ki he ngaahi toʻu tangata ka hokó.”

1. Ko e malí, ke fai ʻe ha tangata mo ha fefine.

2. Ko e ngaahi fatongia ʻo e tamaí mo e faʻeé.

3. Ko e toputapu ʻo e ʻapí.

Bonnie L. Oscarson, palesiteni lahi ʻo e Kau Finemuí, “Kau Taukapo ʻo e Fanongonongo ki he Fāmilí,” Liahona, Mē 2015, 15, 16.

Ki ha fakamatala lahi ange fekauʻaki mo e nofomalí mo e fāmilí mei he fakataha lahi ʻa e kakai fefiné ʻi he konifelenisi ʻo ʻEpeleli 2015, vakai kia Cheryl A. Esplin, “Ko Hono Fakafonu Hotau ʻApí ʻaki e Māmá mo e Moʻoní,” 8, pea mo Carole M. Stephens, “Ko e Fāmilí ʻa e ʻOtuá,” 11.

Ngaahi Talanoa Mālie mei he Konifelenisí

Ko e hā ha meʻa te ne toe puke ʻetau tokangá, ka ko ha talanoa mālie? ʻOku ʻoatu heni he talanoa ʻe tolu mei he ngaahi talanoa lahi naʻe fai lolotonga e konifelenisí:

• ʻI he talanoa fakatātā ʻo e tangata tūtūʻí, ko e faʻahinga kelekele fē koe? ʻE liliu fēfē hoʻo moʻuí ʻi hoʻo ʻiloʻi e meʻa ko iá? —Vakai, Dallin H. Oaks, “Ko e Talanoa Fakatātā ʻo e Tangata Tūtūʻí,” 32.

• Ko e hā ha ngaahi aʻusia naʻe tokoni ke toe foki ai ha faʻē kei talavou ki he ongoongolelei ʻo Sīsū Kalaisí? —Vakai, Rosemary M. Wixom, “Ko e Toe Foki ki he Tuí,” 93.

• Ko e hā ha founga ʻoku hanga ai ʻe ha talanoa fakaʻofa ki he ongo tautehina ne na fihia ʻi ha pā maka, ʻo fakalahi ange ʻetau mahino ki he Fakalelei ʻa Sīsū Kalaisí? —Vakai, Jeffrey R. Holland, “Feluteni Ai e Fakamaau Totonú, ʻOfá mo e ʻAloʻofá,” 104.

Laʻitā ʻo e Temipale Metuliti Sipeiní, faitaaʻi ʻe Garrett Wesley Gibbons; laʻitā ʻo ha ongomeʻa mali ne faitaaʻi ʻe Jenn Jones; laʻitā ʻo ha taha kaka moʻunga, ne faitaaʻi ʻe David Winters.

• Ngaahi Tāpuaki Fungani ʻo e Temipalé

• Ngaahi Makatuliki ʻo e Tauʻatāina Fakalotú