Kiʻi Meʻi Moa ʻe Valu
ʻApikale ʻAlamēlia, Sepū, ʻOtu Filipainí
Naʻe faingataʻa ʻa e feinga ke feau e fie maʻu ʻa ha fāmili mo e fānau ʻe toko nima, ʻi he taʻe ngāue fakataimi hoku husepānití. ʻI ha ʻaho kimuʻa he fakamafola ʻo e konifelenisi lahi ʻo ʻOkatopa 2013, ne mau vakaiʻi ʻemau meʻakaí pea fakakaukau te mau teuteuʻi ha maʻu meʻatokoni hoʻatā faingofua ʻo e moa fakapaku mo e laise lolotonga e mālōlō ʻi he ngaahi fakatahaʻanga konifelenisí.
Ne hoko mai ʻa e Sāpaté, pea ne mau maau. Ne fakataha e toenga ʻo homau kāinga ofí, kau ai ʻa ʻeku ongomātuʻá mo hoku ngaahi tokouá mo honau ngaahi fāmilí ki he siteiki senitaá ʻi ha haafe houa kimuʻa pea kamata ʻa e fakamafolá.
Ko ha fiefia lahi mo ha tāpuaki moʻoni ia ke fanongo ki he vahevahe ʻe he kau palōfita, kau tangata kikite, mo e kau tangata maʻu fakahaá ʻa e ngaahi pōpoaki ki hotau toʻu tangatá ni. ʻI heʻeku fakafanongo ki he faleʻí mo fiefia ʻi he laumālie fakaʻofoʻofa ʻo e melinó mo e ʻofá naʻá ku ongoʻi mei heʻeku Tamai Hēvaní, naʻá ku maʻu ʻa e fakapapau ʻe lelei ʻa e meʻa kotoa pē, ʻe feau ʻa e ngaahi fie maʻu fakalaumālie mo fakatuʻasino ʻa hoku fāmilí, pea kapau te u hokohoko atu ke fakaʻaongaʻi ʻa e tuí pea tuku ke taki hoku Fakamoʻuí, ʻe fakahaofi kimautolu mei he masivesivá mo e ngaahi faingataʻa kehé.
ʻI heʻeku fiefia ʻi he laumālie fakaʻofoʻofa ʻo e ʻaho Sāpate ko iá, ne ngalo ʻiate au ʻa e maʻu meʻatokoni hoʻataá. Ne u toki fakatokangaʻi pē ʻi he hokosia mai ʻa e mālōlō ʻi he ngaahi fakatahaʻangá ʻoku mau toko 17. ʻE vahevahe ʻe he kakai lalahi ʻe toko hiva mo e fānau ʻe toko valu ʻemau meʻatokoni siʻisiʻí ko e konga moa iiki ʻe valu mo ha peleti laise, fakataha mo ha poulu pasitā ne ʻomi ʻe ha taha ʻo hoku ngaahi tokouá.
Naʻe fai ʻe he taʻu valu ko Henelií ha lotu fakamālō mo tāpuakiʻi ʻemau meʻatokoní, ʻo kole ke mākona muʻa ʻa kinautolu kotoa pē ʻe kaí. Hili iá naʻá ku pakipaki leva ʻa e konga moa takitaha ki he ngaahi konga iiki ange pea ʻoange ia ki he fānaú pea ʻoange ʻe hoku tokouá ʻa e pasitā mo e laise ki heʻenau peletí. Ne ʻikai ke u lava ʻo mataʻofi hoku loʻimatá ʻi heʻeku ʻiloʻi naʻe feʻunga pē ki he tokotaha kotoa pea kei toe pē hili hono pakipaki kotoa e ngaahi kongokonga moá mo vahevahe ʻa e pasitaá mo e laisé ʻiate kimautolu kotoá. Ne mau kai kotoa leva—pea naʻa mau mākona.
Naʻá ku talaange ki heʻeku ongomātuʻá mo hoku husepānití naʻá ku ʻiloʻi fakapapau naʻe vahevahe moʻoni ʻe he Fakamoʻuí ʻa e foʻi mā ʻe nima mo e ika ʻe uá pea fafangaʻi ha kakai tokolahi “ko e tangata ʻe toko nima afe nai, kaeʻumaʻā ʻa e kau fefine mo e tamaiki” (vakai, Mātiu 14:14–21). ʻOku pehē ʻe ha kau fakaanga mo e kau taʻetui ʻe niʻihi naʻe heliaki, fakalahi, pe taʻe malava ʻa e maná. Ka kiate au mo hoku fāmilí, ʻoku moʻoni ʻa e fakamatalá ʻo hangē ko ia kuo tohí.
Naʻe fanongo ʻa e Tamai Hēvaní ki he lotu ʻa ha tamasiʻi faivelenga ʻa ia naʻe ʻoatu ʻa e fakafetaʻí mo kole ʻa e tāpuaki kiate kinautolu kotoa pē ʻe kaí ke nau mākona pea maʻu ha ivi.
ʻI heʻemau foki ki he holó ki he konifelenisi lahí, naʻá ku ongoʻi mālohi ʻa e laumālié. Naʻá ku ongoʻi ʻo hangē pē ne u ʻi ai mo e fuʻu kakai tokolahi naʻe fafanga ʻe Sīsuú, ʻi he fakaʻamu ke nofo ai pea ako meiate Ia ʻoku talaʻofa mai kapau te tau talangofua mo fakafanongo, he ʻikai ʻaupito ke tau fiekaia pe fieinua (vakai, Sione 6:35).
Ne mau tangutu fakalongolongo mo ʻemau fānaú ʻi homau nofoʻangá ʻi he loto falelotú pea mateuteu ke fanongo ki he kau tamaioʻeiki kuo fili ʻa e Tamai Hēvaní. Ko ha meʻa ia te mau manatuʻi maʻu pē.