Ko e hā ʻOku Tau Fai ʻi he Temipalé?
Ko e temipalé ko e fale ia ʻo e ʻEikí. ʻI heʻetau hū ki lotó, ʻoku tau ongoʻi ofi ai ki he Tamai Hēvaní mo Sīsū Kalaisi. ʻOku tau lava ʻo ongoʻi ʻa e Laumālie Māʻoniʻoní. ʻOku tau kau atu ai ʻi he ngaahi ouau toputapú, hangē ko e papitaisó. ʻOku tau fai ha ngaahi palōmesi makehe, pe ngaahi fuakava, mo e Tamai Hēvaní. ʻE lava ke tau tokoni ke foaki kiate kinautolu kuo pekiá ʻa e faingamālie ke tali ʻa e ongoongoleleí. ʻE hoko ia ko ha ʻaho mātuʻaki makehe ʻi hoʻo fuofua hū ki aí!
ʻI he hoko ho taʻu 12, te ke lava ʻo feʻiloaki mo hoʻo pīsopé ke maʻu hoʻo lekomeni temipalé. Pea te ke lava leva ʻo ʻalu ki he temipalé ke fai ʻa e ngaahi papitaisó
Vai Faiʻanga Papitaisó
ʻI he hoko ho taʻu 12, te ke lava ʻo papitaiso ʻi he temipalé maʻá e kakai kuo pekia ne teʻeki papitaisó. ʻOku hili ʻa e faiʻanga papitaisó ʻi he tuʻa ʻo ha fanga pulu ʻoku nau fakafofongaʻi ʻa e faʻahinga ʻe toko hongofulu mā ua ʻo ʻIsilelí.
Loki Ouaú
ʻI he ngaahi loki hangē ko ʻení, ʻoku tau ako ai kau ki he palani ʻa e Tamai Hēvaní maʻatautolú, pea tau fai ʻa e ngaahi fuakava ʻoku nau fakaʻatā ke tau toe nofo fakataha mo Ia. ʻOku tau ako fekauʻaki mo hono Fakatupu ʻo e māmaní, fekauʻaki mo ʻĀtama mo ʻIvi, pea kau kia Sīsū Kalaisi. ʻOku tau ako foki ʻo kau ki he ngaahi tāpuaki te tau maʻu ʻi he moʻui ka hokó ʻo kapau te tau faivelenga.
Loki Silesitialé
ʻOku fakaʻofoʻofa ʻa e loki silesitialé! ʻOkú ne fakamanatu mai kiate kitautolu ʻa e nonga mo e fiefia te tau ʻi aí ʻi heʻetau nofo mo e Tamai Hēvaní mo Sīsū Kalaisi ʻi ha ʻaho.
Loki Silá
ʻE lava ke silaʻi fakataha ʻa e ngaahi fāmilí ki he taʻengatá, ʻi he ngaahi loki hangē ko ʻení. ʻOku ʻuhinga ʻeni te tau lava ʻo nofo fakataha ko ha fāmili ʻo taʻe ngata—ʻikai ʻi he moʻuí ni pē.
He ko e fale ia ʻo e ʻOtuá,
Toka ai e ʻofá.
Te u teuteu heʻeku kei siʻí
Ko hoku fatongiá.
(“Fie Siofia Ha Temipale,” Tohi Hiva ʻa e Fānaú, 99)
Ngaahi tā ʻo e loki silesitialé, faiʻanga papitaisó, loki ouaú, loki faiʻanga sila ʻo e Temipale ʻOkiteni ʻIutaá
tā taupotu ki toʻomataʻu ʻi lotomālié ʻe Summer Rachael Derrick; Tā Fakatātaʻi ʻe Bradley Clark