Kautaha Tokoni ʻOfa ʻa e LDS: Taʻu ʻe 30 ʻo e Faifatongiá

ʻOku ʻikai ke foʻou ʻa e tefitoʻi moʻoni ʻo e tokoni ki hotau kāingá. ʻI he ngaahi kuonga kotoa pē, kuo tukupā ai e Siasí ke tokoni ki he masivá mo e faingataʻaʻiá.

ʻI he taʻu ʻe tolungofulu kuo hilí, ʻi he ʻaho 27 ʻo Sānuali 1985, naʻe fakafōtunga mai e mateaki ko iá lolotonga ha ʻaukai makehe naʻe foaki ai ʻe he kāingalotu ʻo e Siasí ha paʻanga ʻAmelika ʻe US $6 miliona ke tokoni ki he kau faingataʻaʻia he honge ʻi ʻItiōpeá. Naʻe fakaʻilongaʻi ʻe he meʻá ni e kamataʻanga ʻo e Ngaahi Kautaha Tokoni ʻa e Siasí. ʻI he taʻu tatau pē ko iá, naʻe toe maʻu ha paʻanga ʻe $5 miliona mei ha ʻaukai naʻe fai ʻi Nōvema ke tokoni ki he fiekaiá. Ne hanga ʻe he ongo ʻaukai ʻe ua ko iá ʻo fakavaveʻi moʻoni e ngāué ʻi hotau kuongá ni.

Hili ha taʻu ʻe 30 mei he ongo ʻaukai ko iá, kuo ʻoatu ʻe he Siasí ha tokoni ʻoku ʻi he paʻanga ʻe $1.2 piliona ki he kakai faingataʻaʻiá. ʻOku kau ai ʻa e meʻakai, nofoʻanga, nāunau fakafaitoʻo, vala, mo e ngaahi tokoni kehe. ʻIkai ngata aí, kuo foaki ʻe he Kautaha Tokoni LDS ha tokoni taimi lōloa ʻo fakafou ʻi ha ngaahi polokalama ʻoku foaki ai ha ngaahi sea-teketeke, huhu maluʻi, vai maʻa, meʻakai fakatupu moʻui lelei maʻá e fāmilí, tokangaekina ʻo e matá, mo tokoni ki he fāʻelé mo e fānau toki fāʻeleʻí. ʻOku ngāue fakataha e Siasí mo ha ngaaahi kautaha tokoni ʻofa fakaetangata falalaʻanga ke fai ha konga lahi ʻo e ngaahi foakí.

Kuo faʻa akoʻi mai ʻe Palesiteni Tōmasi S. Monisoni, ʻi heʻetau hoko ko e kāingalotu ʻo e Siasí, ʻoku ʻi ai hotau tufakanga ke tokoniʻi ʻa e fiekaiá, tukuhāusiá mo e loto-mamahí. Kuo tuʻu hake e kāingalotu ʻo e Siasí ʻo fakahoko e tukupā ko ʻení. Pea neongo ʻoku ʻikai tala fakahāhā pe ʻoatu fakahangatonu he fakamālō, ka kuo nau tokoni fakalongolongo pē ʻi ha ngaahi houa ʻe laui miliona pea foaki mo ha paʻanga ʻe laumiliona. Makehe mei he tokoni ki he paʻanga tokoni ʻofa fakaetangatá ʻi he laʻipepa foakí, kuo foaki ʻe he kāingalotú ki he Ngaahi Kautaha Tokoni ʻa e Siasí, ngāue fakafaifekau, hoko ko ha kaungāmeʻa mo ha kaungāʻapi lelei, tokoni ʻi he ngaahi fale uelofeá pe tukui koló pea foaki honau taimí mo ʻenau ʻofá ki ha ngaahi kautaha lelei mo falalaʻanga ʻe lau kilu.

ʻI heʻenau fai iá, ʻoku nau kamata fakahoko ai e meʻa naʻe akoʻi ʻe he Fakamoʻuí ʻo kau ki hono tokangaekina ʻo e masivá mo e faingataʻaʻiá:

“He naʻá ku fiekaia, pea naʻa mou foaki ʻa e meʻakai kiate au; naʻá ku fieinua pea naʻa mou foaki ʻa e inu kiate au; ko e muli au pea naʻa mou fakaafeʻi au:

“‘… Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú’ (Mātiu 25:35, 40).