Te u ʻAlu ki Ai ʻi ha ʻAho
I he mei hoko hoku taʻu 12, naʻá ku fuʻu vēkeveke ke ʻalu ki he temipalé. Naʻá ku talanoa mo hoku fāmilí pe ʻoku fēfē ʻa ʻete ʻi lotó, pea naʻá ku vakai foki ki he ngaahi fakatātā ʻo e lotoʻi temipalé.
Naʻe fakahoko ʻe hoku fāmilí ha efiafi fakafāmilli ʻi ʻapi makehe ʻi ha ngaahi uike siʻi kimuʻa peá u ʻalu ke fakahoko ʻa e papitaiso ʻi he temipalé. Naʻa mau fanongo ki ha ngaahi talanoa lelei fekauʻaki mo ʻemau ngaahi kuí mo ako ki he feituʻu naʻa nau nofo aí pea mo e tuʻunga naʻe ʻi ai ʻenau moʻuí. Naʻe aʻu ʻo u ʻiloʻi naʻe taaʻi ʻe ha foʻi fatulisi ʻeku kui tangata hono uá ka naʻe moʻui pē! Ko ha niʻihi ʻo ʻeku ngaahi kuí naʻe omi mei ʻIngilani, ko ia naʻá ku valivali ai mo hoku fototehiná e ngaahi fakatātā ʻo e fuka ʻo Ingilaní. Naʻá ku ongoʻi ʻo hangē kuó u fai ha kiʻi fakafehokotaki mo ʻeku ngaahi kuí.
Naʻe fakaʻofoʻofa tatau pē ʻa loto pea mo tuʻa ʻi he temipalé. Naʻe angelelei ʻaupito ʻa e tokotaha kotoa pē ʻi aí, pea naʻe ʻi ai ha faʻahinga ongo fakafiefia mo nonga ai. Naʻe kehe ia mo ha toe faʻahinga meʻa kuó u ongoʻi kimuʻa. Naʻe tukungamālie moʻoni ʻa e meʻa kotoa. Naʻe ʻoange ʻe hoku mehikitangá ha ngaahi hingoa ʻo ha kau mēmipa ʻo e fāmili naʻe teʻeki ai ke papitaisó. Pea ʻi heʻemau tatalí, naʻá ku fakakaukau mo ʻeku fineʻeikí mo hoku mehikitangá pe naʻe fēfē ʻa e kakai fefine ko ʻení ʻi he taimi naʻa nau moʻui ai ʻi māmani he taʻu ʻe 300 kuo hilí. Naʻe mahuʻinga makehe ke papitaiso au ʻe heʻeku tamaí maʻanautolu.
ʻI heʻeku sio naʻe teunga hina ʻa e tokotaha kotoá ne u ongoʻi hangē naʻe ʻākilotoa au ʻe ha kau ʻāngeló. ʻOku hangē ʻa e temipalé ko ha hēvani ʻi māmaní.
Tā fakatātaaʻi ʻe Jennifer Tolman.