Ngaahi fakakaukaú

Ko e fāmili Lasolo ʻo Madagascar ko e kau paionia kinautolu ʻi honau kiʻi koló.

Fēfē kapau ʻoku ʻikai haʻaku ngaahi kui paionia?

“ʻOku ou ʻofa mo fakaʻapaʻapa ki he tui mo e lototoʻa ʻa e kau fuofua paionia ʻo e Siasí. Naʻe nofo ʻeku ngaahi kuí ʻi ha feituʻu mamaʻo fau he taimi ko iá. Naʻe ʻikai hanau taha ʻe kau he niʻihi naʻe nofo Nāvuú pe ko e Nofoʻanga Fakafaʻahitaʻu Momokó pea ʻikai kau atu ha taha ia ki he fononga ʻo kolosi ʻi he ngaahi fonua tokaleleí. Ka ʻi heʻeku hoko ko ha mēmipa ʻo e Siasí, ʻoku ou talaki ʻoku ʻaʻaku ʻa e tukufakaholo fakaepaionia ko iá ʻi he loto houngaʻia mo e laukau.

“ʻOku ou fiefia ke maʻu ʻa e tukufakaholo tatau pē ʻa e kau paionia fakaeonopooni ʻo e ʻahó ni ʻo e Siasí ʻoku nofo ʻi he puleʻanga kotoa pē, pea ʻoku tānaki foʻou mai ʻenau ngaahi talanoa ʻo e moʻui vilitakí, tuí mo e feilaulaú ki he tukufakaholo maʻongoʻonga he ngaahi ʻaho kimuí ni ʻo e puleʻanga ʻo e ʻOtuá.”

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Tui ʻa ʻEtau Tamaí,” Liahona, Mē 2008, 70.