Te Tama are i Karawa e Kaeka Au Tataro
Iai mwaitin taai ake e ongo ao ni kaekai au tataro te Tama are i Karawa. Au moan ururing n te bwai ae riki aei bon ngke I tokara au kaua n ririki. I kabuai taian buraoki ake I tangiria ni kan takakaro iai. Ngaia are I a nako n au ruu ni katorobubu n tataro. I bubutia te Tama are i Karawa bwa e na buokai ni kunei au bwai n tatakaro. E kaekaki au tataro n te tai ae waekoa—I kueni taian buraoki n te ruu are teuana.
Teuana mai buakon taai aika kabanea ni kakawaki are e kaekaaki iai au tataro bon menau ma au utu ae bwanin. Tabeua te namwakaina imwiin banen ana mition natin mwaanen tinau ae Christian, e buti n te bwakanakontai n te kaenion irarikin te maunga. Ngaia ma te kaa tewaana a uaia ni kurati. Te turaiwa n te kaa are tewaana e marurung, ma ai tariu are uotaki nakon te onaoraki n te erikabuta.
E kakaiaki ikoakin Christian ni kabuta rabwatana. E matu n aki namakinaaba, ao a taku taokita bwa e na aki uti. A baireia ara utu bwa a na aki mamatam. Au karo, mwaaneu, tibu, ai tinau, ai tamau, ao ai tariu ni kabane a ikaruoruo n aki mamatam ibukin Christian. I aki mamatam n tain bongin te reirei. I riai ni kabwarabwara nakon au tia reirei ao kaain au kiraati bwa bukin terana I aki katawanou n te bong anne. I aki tabe ma nakou n akea te amwarake n te bong anne ibukina bwa I aki mamatam ibukin ai tariu.
E kaekai ara tataro te Tama are i Karwa, ao n te kabane e a uti Christian man matuna n aki namakinaaba. E bon tuai n tabwanin n oki ana konabwai, ma iai teutana rikirakena. I ataia bwa e na rang maan te tai ibukin Christian n oki bwaninin marurungina. Ti teimatoa n tataro ibukina. A bebete bwaai ni kabane man ana ibuobuoki te Tama are i Karawa.
Kamatata n te korotamnei iroun Dan Burr