Kunnikain Tinau ni Mare
Angélica Flores Algaba, Querétaro, Mexico
Bon te ataei n aine ngai ngke I moan noora kunnikain tinau ni mare. E bon karauaki ni niiraki inanon te bwaoki, ao I uringnga tinau ngke e kaotinakoa ma te karaurau bwa I aonga n nooria. E bon rang n tikiraoi! I rang n tangiria ni kan bwaina te kunnikai arei ngkana e roko au bong ni mare.
Tinau e karaurau ni kaokia nakon nnena ao e berita nakoiu bwa e na anganai n tai aika a na roko. E taku bwa te kunnikai bon te bwaintangira ae onoti mai iroun tamau. E rang n taraa n tangira ao tamaroa n tamneina ni mare. Au karo, tiaki kain te Ekaretia, ao bon aomata aika tamaroa.
I reiakina taekan te Ekaretia ngke I kaitibo ma te aomata are e na riki bwa kainabau. Te kaitibo anne e kamimi ibukina, e ngae ngke e aki kakaonimaki n te Ekaretia, kaitiboora e kairi ma rongorongon te Moan Kaotioti. I kunea bwa e kakaongora te karaki, ma I tuai n tauraoi ni butimwaia.
Imwiin kakaitiboora inanon 16 namwakaina, e koro bukin miiu ngke I katoka kunnikain tinau ni mare ma bukina ae mwarairai ao n nakonako n te kawai ni kaineta au kabae. I bon rang n tangira naba. A mwaiti aomata ake a taku bwa bon aekakin raoi ngai tinau ngke e mare.
A bwakanako ririki, ao a reke natira uoman mwane. Ngke e kataia ni manga okira te ekaretia kainnabau, I tutuka ana kekeiaki. E ngae ngke I rang kakaonimaki n te ekaretia inanon au tai ni kairake, e bon kanganga irou butimwaean te ekaretia teuana.
Anne n tokina e bitaki imwiin 19 ara ririki ni mare. Kainnabau e okira te ekaretia, ao tabeua te wiiki imwiina I a uaia n airi ma ngaia. E waekoa n rikirake au koaua, ao I bwabetitoaki ao ni kamatoaki. N te tai ae waekoa imwiin nanou ae korakora ibukin katauraoau ni kabaeaki ma kainnabau n te tembora.
Ngke e roko te bong ae kakakukurei ibukin kabaeakira, I a manga bwaina riki kunnikain tinau te mainaina. Raoraou man te ekaretia e a manga karaua ni karaoia riki bwa e aonga n tau ibukin kabonganaakina n te tembora. I bwabwainna ikekei n tai ake imwiina.
Imwiin te tai are e motirawa iai tamau ao tinau e a roko inanon ana kabanea ni bong, e bon teimatoa naba n aki tauraoi ni butimwaea te Ekaretia ae kaokaki. Ma I tuangnga bwaai aika mwaiti aika tamaroa ibukin Kaokan te Euangkerio. I tuangnga naba bwa ngkana e motirawa, e na bon ongo naba taekan te euangkerio ae koaua. I berita nakoina bwa imwiin teuana te ririki, N na kabongana kunnikaina ibukina bwa e aonga ni karekei otenanti n te tembora ao ni kabaeaki ma tamau. Ao I karaoia.
Kunnikaiu e a bon mane ngkai, I ataia bwa n te bong teuana ao N na aki manga kona ni kabongana. Ni karokoa e roko te bong anne, N na teimatoa ni kabongana ma te tangira—ibukin kainnabau, ibukin tinau ao tamau, ibukiia kain au utu ake I a tia ni beku ibukiia inanon te tembora, ibukin te euangkerio ae koaua, ibukin au berita ae tabu, ao ibukin Tamau are i Karawa ao Natina, Iesu Kristo.