Kakaean te Kawai ni Kabwarabure
E maeka te tia korokaraki i Utah, USA.
Ti na bane n iai ara taai ni kaitarai kaangaanga ngkana iai temanna ae karaoa te bwai are e na kamarakira iai. N tabetai iai namakinan ae kaangaanga kabotoan nanom iaon marakim. Ma e ngae ngkana ti kamarakaki n ae korakora, e a tia n reireiniira te Tia Kamaiu bwa ti na kabwarai aia bure aomata ni kabane. Te kabwarabure bon te mwakuri ae matoatoa, ma man karaoan bwaai ake e na kaanira iai ma Kristo, ti kona ni butimwaea te rau are e katauraoa te kabwarabure. Mai inano, uoman kairake n ataeinaine a tibwauai baike a tia n rinanona ma kabwaraan aia bure tabeman.
Kabwaraan ana bure Raom
Ngke Renee* e mwaing nakon te reirei ae boou i Belgium, e kukurei ngke a reke raoraona aika boou. Ngkanne temanna raoraona e karaoi baika e na karekea iai te kaangaanga. E kamataata Renee:
“Raoraou ae Nora e karaoa ana akaunti n te Facebook ao e kabongana aran raoraona temanna, Kate. E moanna ni bwainikiriniia aomata ni kabongana aron karinan anuan te aomata anne, ao aomata a bukina Kate bwa e kakauna ikuna. E bwabwaningareai Nora n te reirei, ni kukua au aro ao kateiu ae onoti. I kataia n totokoi kaangaanga aikai ma I aki kona, ngaia are I a moanna n nanako ma tabeman aomata.
“Ngke e a kaota ana bure Nora ibukin te rongorongo ae kewe, a bane n un aomata irouna. E anganai ana reta Nora ni kabwarabure, ma I taku bwa I aki kona ni kabwara ana bure. I a bon rangin un.
“Te bong teuana I tabe ni wareki koroboki aika tabu, ao I kunea bwa e reirei te Uea bwa taraa Doctrine ao Covenants 64:9–10: ‘Ti riai n i kabwara bure. E taku bwa naake a aki kabwara aia bure taria a na tei ni kabuakakaki imatan te Uea; ao te bure ae korakora e teimatoa ni mena inanona. E taku te Uea bwa E na kabwarai aia bure ake E taku bwa E na kabwarai, ma E kantaningaira bwa ti na kabwarai aia bure aomata ni kabane.’
“N te tai ae waekoa I ianoga taekan Nora. I ataia bwa e aki raoiroi irou bwa N na namakina te un. I tataro ao ni butia te Tama are i Karawa ngkana E kona ni buokai ni kabwara ana bure. E bon aki bebete, ma I kataia bwa N na kona ni karaoia. I moanna man kanakoan au rongorongo nakoina n titirakinna bwa e uara ana bong, ao n tabetai ti a maroro n tain te katawanou. I ataia bwa taman Nora e a tia ni mate aua te ririki n nako. E matoatoa maiuna, ao e taku n ana iango bwa e riribaaki irouia aomata. I kukurei bwa I aki rangi ni kamaana uniu irouna. Kate ao tabeman riki a aki ota bwa I kanga ni kona ni kabwara ana bure Nora, ma I ataia bwa te bwai are I a tia ni karaoia e bon eti, ao I ataia bwa e bon kakatonga irou te Tama are i Karawa”
E reiakinaki Renee bwa te Atua e tuangiira bwa ti na kabwarai aia bure aomata ni kabane. Man irakin te tua anne, e karekea nanoangakin ao mataatana ibukin Nora bwa e a kona ni kabwara ana bure n aki manga uringnga.
Kunean te Rau ni Kaineti ma Maten Mwaaneu ae Uarereke
Ngke e mate mwaanen Janet ni kabuanibwain te kaa are e riki mairoun te turaiwa ae tebwitabun ana ririki ae manging ma ana bwatintia, e ataia bwa e riai ni katoka te namakin n nanobuaka are inanona, ma e aki ataia bwa e na kanga ni karaoia.
“E boni kaangaanga taekinana bwa tera are e karika marakiu ae moan te korakora—uniu irouia ataei aika tebwitabun aia ririki aikai ke nanou ae korakora ibukin kaokan maiun mwaaneu. I aki kona ni kabwarabwara aron iangoan buburan te kanganga anne inanon maiu. I uringa au tataro ma nanou ae korakora are e nakon te maan ae iraua te aoa. Bon te bwai are I tangiria bwa e na oki maiun Nathan.
“I namakina nanoangaakia ataeinimwaane ake a bukinaki ibukin maten Nathan ibukina I ataia bwa a namakina ae a bon bure iai. Ma I namakina naba te un ao te nanobuaka. E nang bebete bukinakiia n te bure. I taku n au iango bwa I kabwarai aia bure kairake n ataeinimwaane aikai, ma e teimatoa n un inanou ngkana e I tabe n iangoa aron te kabuanibwai. N angin te tai I titirakinai i bon irou, ‘N na kanga raoi ni kabwarai aia bure kairake n ataeinimwaane aikai, ao N na kanga n ataia ngkana I a tia ni kabwaraia aia bure?’
“E aki riki ni karokoa mwiin tebubua te tataro, te aki mamatam ae koaua raoi, ao te kamatebwai ma iangoakina raoi are n tokina I a namakinna bwa I kabwarai raoi aia bure. I uringnga iangoakina raoi e bong teuana. I taku, ‘I kabwarai aia bure. E aera bwa N na aki kabwarai aia bure? Aomata a bane ni karaoi kairua, ao N na kanga ni motika taekaia? Bon akea te bwai ae I kona n taobaraia ngkana I kateimatoa uniu, ngaia are I a kabwarai aia bure.’ E bon kamiimi te namakin! I teimatoa ni kan ataia bwa I a kabwaraia raoi aia bure kairake n ataeinimwaane aikai, ao ni koauana I ataia (bwa I kabwarai aia bure). I aki kona ni bita te bwai are e riki nakon Nathan, ma I kona n rineia ni mwakuri ma te kabwarabure ao te tangira nakon te un.”
E reiakinna Janet bwa te kabwarabure raoi e bon anaa te tai ao te kekeiaki. E taku te Tia Kamaiu bwa ngkana ti kaan ma Ngaia, ao E na kaan ma ngaira ( taraa D&C 88:63). E a kaan Janet ma te Uea rinanon te aki mamatam, te tataro, kamatebwaian koroboki aika tabu, ao tabeua riki konabwai. Ngkana ti karoa naba are e karaoia, ti kona n oneamwiin unra ma marakira ma te namakin n rau ao te kabwarabure.
Kaonaki ma te Tangira
N ai aron Janet ma Renee, te kabwarabure e buokiira n namakina te nanoanga, atatai, ao te taotaonaki n nano. Ngkana ti kabwarai aia bure tabeman, te Uea e na kaoniira ma Ana tangira ae e tiaki ao ti na riki n Ai arona.