Tera Ae Ti Kakoaua
Bootakin te Ekaretia Bon Mairoun te Atua
Aki toki membwa aika boou n te Ekaretia n ongo taeka aika a tuai ongongo mai imwaina: kiingin te nakoanibonga, te kaokoroaki, katoka bai, bwabetito ibukiia maate, Miutuo, Bootaki n Aine, ao a mwaiti riki. Ao a ongo taeka aika atai ma a kabonganaki ni kawai aika aki atai: rikan, tamanuea, bitiobi, taian kauntira, te toa, te wewete, kamotirawaki, koaua, otenanti, ao a mwaiti riki.
Ngkana ko kaitara ma kangaanga aikanne, tai raraoma. Rawatan am tai n roroko n taromauri, kamatebwaian booki aika tabu ao bwaai n reirei, ao n reitaki ma kaain te Ekaretia, ao ko na kai ota n nanon taeka aikai. Ni karokoa te tai are ko a ota riki iai, tai rawa n titirakinia membwa n am uoote ke mwaanga; a na rangin ni kukurei ni kabwarabwarai bwaai aika aki rangin n ota nakoim.
Taeka n aron aikai a kakawaki ibukina bwa a kabwarabwarai reierein, tuana, bwaai aika kakaraoaki, ao bootaki, aika a roko man booki aika tabu ao man te kaotioti nakoia burabeti ni boong aikai. E kaira Ana Ekaretia te Tia Kamaiu n te bong aei man kaotan Ana kantaninga nakon te Moan ni Beretitentii (te Beretitenti n te Ekaretia ma ana kauntira aika uoman) ao te Kooram n te Tengaun ma Uoman n Abotoro. E baireaki te Ekaretia n te bong aei n te kawai naba are e baireia te Uea ngke E mena iaon te aba (taraa Taekan te Onimaki 1:6). N aron taai ake rimoa, iai ara burabeti, abotoro, membwa n te Itingaun, mitinare aika a nanakonako ni kakauoman, ao bitiobi ao taan kairiiri riki tabeman.
Ni kabane ake a beku n te Ekaretia bon aomata aika anganano. A weteaki (tuangaki bwa ana beku) man aia kairi aia tia kairiiri. N te tai are ko na anganaki te mwakuri—te tabe, te tai ni beku. Ngkana ko butimwaeia ma nanon ni koaua ao ni kakoroa nanona nakon am kabanea ni kona, e na kakabwaia am kekeiaki te Uea ni mwakuri ibuokia Natina. N aki tabe bwa aekara am baekiraun, ko kona n anga bwaintangira n tamnei aika uaana. Ngkai kaain te Ekaretia ngkoe, ngkoe bon mwakoron te “rabwata inanon Kristo” (taraa 1 I-Korinto 12). Am anganano e rangin ni kakawaki ibukin kabutan te Ekaretia.
Kamatata n te korotamnei iroun David Habben
Taan kairiiri n am uoote a beku inanon te beretitentii (te beretitenti ao uoman kauntira):
Te bitiobi ao uoman ana kauntira a katea te bitiobiriki ao n tararua iaon te uoote.
Te beretitentii n te Bootaki n Aine a buokia ainen te uoote ao ni buokia ni kakorakora aia utu.
Te beretitentii n te kooram n unimwaane ao taan ni kairiiri n ibonga aika rietata a buokia mwaane n aia uoote ao ni buokia ni kakorakoraia aia utu.
Te beretitentii n te Buraimwari a beku ibukiia ataei, ao te beretitentii irouia Kairake n Ataeinimwaane ao Ataeinaine a beku ibukiia te roronrikirake n te ririki ae 12-18.
Te Beretitentii n te Reirei n Tabati e tararua te kiraati n te Reirei n Tabati ao n ibuobuoki ni kankoraoa kamatebwaiakan ao reiakinan te euangkerio inanon te uoote.