Katauraoi n Rin ni Maneaban te Uea
Iroun Unimwaane Kent F. Richards
Man te Itingaun ao Tarekita ni Kakoroi Moti ibukin te Tararua n te Tembora
Moangare ngkana ko iangoa te tembora. Bon te tabo ibukin te mwaaka ao te kakabwaia.
N tain kaukan te tembora, I nooria tabeman ataeinaine n ikoikotaki i akuuia aia karo rinanon te tembora. A wingare ngkai a noori tamneia n te tirotaam n aia ruu ni mare aine. “Uringnga,” e wirikiriki tibuia te aine, “ai kakawakira ngkami ao mwaitira tangirami iroun te Tama ae i Karawa.” Ataeinaine n tatabemaniia a iangoa te tai are ngkana a kona n okira te tembora n aroia aine aika onimaki, ma rikirakeia ae kakateke ma aia konabwai, n tauraoi ni kakoroananon aia mition iaon te aba. Ataeinimwaane ake a ira te kaukuki iai naba aia taratara ibukin kakabwaia ake a na karekei n taai aika a na roko ao katabeaia.
Baikara bwaai ake a na namakinna ataei aikai inanon te tembora bwa e bon koaua. Te Tama are i Karawa e tangiria ni kakabwaiako. A roko ana kakabwaia aika korakora ngkana ko rin n te tembora ni karekei otenanti aika tabu ao ni karaoi ao ni kawakin berita aika tabu. Bon tabem bwa ko na katauraoi ao n tauraoi.
E kakawaki te tembora inanon maium, ai moararariki ngkana ko uarereke: “Te kairake n ataeinimwaaane e kainnanoa riki nnena inanon te tembora nakon ana karo ao tibuna te unimwaane, ake a teimatoa ni baike a rinanona inanon maiuia; ao te kairake n ataeinimwaane e a tibwa rinanon te maiu, e kainnanoa te tamnei, te anainano ao te kairiiri are e roko man karaoan taian otenanti n te tembora.”1 Moanna ngkai ni katauraoa nanom ao am iango bwa e na kona ni kabwaninna ni karekea ao n ota ni kakabwaia aikai (taraa Mataio 13:23; Mareko 4:20).
Karekea Bwaninin te Euangkerio
Ngkana ko katauraoiko i bon iroum n rin n te tembora, ko na kona n “tauraoi ni karekea bwaninin [Ana] euangkerio” inanon te tembora (D&C 35:12; e kairaki ma katuruturuana). Te tembora bon te tabo ibukin te mwaaka ao te kakabwaia. E anga ana kaetieti te Uea nakon te Burabeti Iotebwa Timiti ao Aomata aika Itiaki ake ngkoa bwa a na ikotaki i Kirtland, Ohio, USA, ike a na katea raoi iai te tembora. “Ikanne ane ko na anganaki te mwaaka man ae rietata” (D&C 38:32; e kairaki ma katuruturuana).
N tain kaukan te tembora ae nako, te Abotoro e ikootia ana utu ni katobibia te baonikarea inanon te ruu ni kabaebae. E taku bwa bwaai ni kabane ake ti karaoi inanon te Ekaretia—kiraati, waaki ni kakukurei, burokuraem, ao boowi—a katauaoira n nakon te baonikarea inanon te tembora ni karekei otenanti ni kabaebae. Te tembora e tei ibukin mwakoron ana babaire Tamam ae i Karawa ae moan te kakaawaki ibukin kukureim ao rikirakem ae akea tokina.
Katauraoi ni Karaoi Berita aika Tabu ma te Atua
Am katauraoi n rin n te tembora ao ni karaoi berita aika tabu e aki kona n riki n te tai ae waekoa. E moanaki ma am bwabetito ao kamatoan ana bwaintituaraoi te Tamnei ae Raoiroi ao ngkanne e rikirake ma te tataro, kamatebwaian koroboki aika tabu, ongotaeka, ao te mwakuri n ibuobuoki. E kaoa te itiaki ni katoa wiiki ngkai ko irira waakin te toa. E riki ngkana ko reiakinna n ukoukora te kabwarabure rinanon te rairannano, ngkai ko kawakin kainibaire, ao man kororaoi n uouota te beeba ni kariaia ae tianaki taina. Ana burokuraem te Roronrikirake e na buokiko, ma am katauraoi e bon onoti; ko karikirakea am kororaoi, am koaua, am rairaki. Ana Mwakuri ni Kamaiu te Tia Kamaiu e kaineti nakoim.
Ngkai ko karikirakea te nano n ikawai n te maiu n tamnei, e na iai nanom ni katauraoi ibukin ao n rin n te tembora. Ikanne ko na karekei otenanti ao ni karaoi berita aika tabu, ake bon mwaneka aika riai ni kaaniko ma Tamam are i Karawa. Otenanti n te tembora bon “kabanea n rietata … n otenanti ake a tia ni kaotaki nakoia aomata ni kabane.”2
Ngkai ko karekei otenanti n te tembora, ko karaoi berita aika tabu ma Tamam are i Karawa tii teuana te tai i bon ibukim, ao ngkanne ko na kataia ni maiu ni kaineti ma berita ake ko karaoi rinanon maium. Ni katoa tai are ko rin iai inanon te tembora, ko kona n namakina Tamneina ao ni karekei kaotioti aika raka ao te ota ngkai a katauraoaki otenanti aika riai ibukiia tabeman. Ko na ota ao ni karekea te kakoaua ibukin rikim ae akea tokina ao mwaakan am berita aika tabu ae akea tokina. Ngke arona bwa tiaki aomata ngaira aika akea tokia, a na bon akea kakawakin te tembora. Ko rin n te tembora ao ni karaoi berita aika tabu ibukina ko kan maiu n aki toki ao n tangiria ni kan maeka ma Tamam are i Karawa ao am utu n “te aro ni kukurei ae aki totoki” (Motiaea 2:41). Te kakoaua aei e rikirake inanon tamneim ao e kamatoaki iroun te Tamnei ae Raoiroi.
Arom ni Kororaoi
Taben te Tamnei ae Raoiroi e bon koaua. E reireiniko, e kaitiakiko, ao e uota ana tangira te Tama (taraa I-Rom 5:5). Te Tamnei ae Raoiroi n te berita bon kateimatoan mwaakan te Tamnei ae Raoiroi, are e kamatoai berita aika tabu n tatabeua nako n aki totoki.
N te aro bwa ti na karekea te Tamnei, ko riai n rin n te tembora n itiaki ao ni boou, n inaomata man te bure ae tuai ni kabwaraaaki. Ngkana e tokanikai te riaboro n ana anga nako aom, e na totokoiko man te tembora ke ni kamwaneko n nakon tabo ake aki tamaroa.
Ibukin aei, ko kaoaki bwa ko na tekateka ao ni maroro n te tabo ae onoti ma am bitiobi ke am beretitenti n te mwaanga, n iangoa kororaoim ao tauraoim ni karekea te beeba ni kariai nakon te tembora. Bwaina te kokoaua ao onimakinna bwa e na buokiko. Ni bon te koaua, boni ngkoe ae te tia bairea oin am tabo n tei imatan te Uea (taraa D&C 109:24). Ko na tiaaina am beeba ni kariaia moa. Boni ngkoe te tia kakoaua ibukin kororaoim imatan te Uea.3
Te riki ni kororaoi tiaki nanona bwa ko a kororaoi ngkai. E nanonaki bwa nanom e na eti, bwa ko a maiuakin tuua, ao bwa ko tangiria n tamaroa riki ni katoa bong.
Reiakinana man taian Kanikina
Inanon te tembora, n aron koroboki aika tabu, e reirei te Uea aron kamanenan kanikina. Ko kona ni kunei kanikina aika mwaiti ni koroboki aika tabu, n aron te bwaa, te koraa, te uanikai, kai ni kamaiu, ao te kariki ao te ran ibukin te toa (taraa, te katoto, 1 Nibwaai 11; Aramwa 32; Ereman 5:12). Te bwabetito man te kateboaki iaan te ran kanikinaean te maiu ae boou, te manga bungiaki, ao te itiaki (taraa I-Rom 6:3–5). Inanon te tembora ti bane ni kunnikainiira n te mainaina, ni kanikinaean te itiaki, tabu, ota, ao te katitaboaki.
Tabeua kanikina inanon te tembora a rabwata ao a tamnei. Ibukin te katoto, kabonganaan te kamente bon te kauring ae rabwata ni katoa bong ibukin berita aika tabu man te tembora ao kakabwaia ake a tia ni beritanaki. Ngkana a karineaki ma aron kakanatoia, kamente a kamanoira man taian kariiri ao kairoro aika aki raoiroi.
Otenanti n te tembora n tatabeua iai nanona ae tei ibukin te bwai teuana. “Ni karaoan te mwakuri ae tabu, e na kaitiakaki te aomata ao ni kabiraki,”4 ni kauringaaia kiing ao ibonga mai Iteraera ake a tauraoi ni butimwaai nakoaia (taraa 1 Tamuera 10:1; 16:13). Te kaetieti ao berita aika tabu inanon te entaumente e kaota te kunnikaiaki ke n anganaki te mwaaka ao berita aika tabu aika raka mairoun te Atua (taraa Ruka 24:49). Tao te kabanea n tamaroa ni kanikina bon te otenanti ni kabaebae, ike te bumwaane ao te buaine a ikotaki inanon te motinnano ae aki kona n uruakaki are e na teimaan n aki totoki.
Berita ake inanon te tembora a bane ni kakukurei ao ni karineaki A bon “nanonaki n ae korakora” ao “kakabwaia aika mwaiti” (3 Nibwaai 10:18) ake e kawakin Tamara ibukim ae onoti. Ngaia are wingare ngkana ko iangoa te tembora.
E aki kakawaki am ririki, karaoa ae riai n tauraoi ni karekei kakabwaia aika mwaiti ake e na anganiko Tamam are i Karawa. Onimaki bwa e na kanga am namakin ngke te teei ngkoe ae ko uarereke ao ko anenea, “I tangiria n noora te tembora. N na Nako Ikekei n te Taina … N na Katauraoi Ngkai I kairake. Aei au beku ae tabu.”5 E kona ni koaua ibukim.
Tamnein Rexburg Idaho Tembora
MAAKE NI WINTO KIRATI, TE LAIE HAWAII TEMBORA