Katangitang inanon Maiu
E maeka te tia korokaraki i Manaus, Brazil
I katoka te katangi biaano ibukina I maaku ni karaoa te kairua. Ngkai e a reke Au tai n totokoa maaku.
Te bwai ae I iaiangoia inanon ataei bon te tia katangi biaano. Ngke 12 au ririki, temanna kaain te Ekaretia ae I tatangiria e reireinai katangan te biaano. Imwiina I karekea te kiboote ae maiu man te iti bwa ana bwaintangira tamau. Ma e ngae n anne, kakukurein te katangi biaano e moanna n totonako ibukina bwa e a nako nanou ngke N na katangitang n te bootaki n toa. I karaoi kairua aika mwaiti, namakina te maama, ao n aki tangiria ni manga kan katangitang riki. I taetae i bon irou bwa N na manga kataia riki ngkana tii mwiin au kataneiai ae bati ao ni kona ni katangitang n ae e a nakoraoi riki. Ma e a moanna ni bwara nanou ao n tokina I a kaboonakoa au kiboote ao ni karaba te taarena aei.
Tabeua te ririki imwiina, te Tabati teuana akea te tia katang biaano. Te aine are e katanga te biaano n ara uoote e a tia ni mwaing nakon te tabo teuana. Ngke I nooria kaain te aro n anene n akea te biaano ke n akean te katangitang, I namakina te Tamnei are e kaungaai bwa N na taetae ma te bitiobi. I taku, “E raoiroi ngkana I katangitang?” E butimwaaia.
Imwiin ririki ni katokan te biaano, I tokanikai iaon maaku ni karaoan taian kairua. Inanon miimiu, I moanna ni katangitang n aron ae e aki bati n tau te tai ngke I a toki. I karaoi tabeua kairua iaon tabeua nooti ma e aki mwaiti. Te taneiai anne e anganai te korakora bwa N na tuanga te bitiobi bwa N nai motika nanou ni katang biano ni katoa Tabati.
I kataneiai ni katoa wiiki, ao I reiakina riki tangiran te katang biaano. N te ai are I kataneiai iai, I namakina te Tamnei ae korakora inanon mweengau. N tabetai ngkana I katangitang, kaain au utu ake a karaoi mwakurin te auti a reitia naba n anene. Ti bane ni katiteuanaki, n anenea te kuna n taromauri ae ti teuana.
Angiina kaain te aro n te uoote a noora rikiraken au taarena n te katangi biaano ao a katekeraoai. I bon kakaitau n au anganano ni maiun tamnein bobotakin au uoote ao ni kakaitau ngkai I a okira au taarena are I a tia ni mwaninga taekana.
I a reiakina te kakaitau n te katangitang n te biaano; te rau ae kamiimi are e nako mai iai. Au kantaninga bwa i karawa ti ongo tein te katangitang aei, ao antai ae ataia, N na bae ni mena ikekei ni kaaina te kuaea ni katangitang i karawa!
Aron tein te korobanna iroun Kleyman/iStock/Thinkstock