N na bon Aki Tatarabwai
Joanna Mae Rangga, Southern Leyte, Philippines
Ngke I riki bwa kain te moan ririki n te reirei, N tabetai e maraki nanou irouia raou n reirei. Anne bukina bwa a mwaiti ibuakoia ae a tarabwai n tain te ukeuke. Tabeman a karabai n uoti aia bebwa inanon te kiraati. Tabeman a kanakoi reeke n te tekiti nakoia tabeman. Tabeman a katotonga aia bebwa n ukeuke raoia n reirei.
Naake a tatarabwai n tainako a rereke aia bwi ae rietata riki nakoiu. E ngae n anne, I bon aki kaririaki bwa N na raoniia. I katikua n au iango ao inanou n tainako bwa e tamaroa riki bwa N na karekea te koaua ae 0 te betienti nakon iraean te 100 te betienti.
Ngkana I tatarabwai, N na bon katea te banna ni katotoo ibukiia. N na bon aki maiuakina te kawai are I kona iai n tibwa ana euangkerio Iesu Kristo ma ngaiia. N na bon aki kona ni kaotia nakoiia bwa te Ekaretia e koaua.
N te bwakantaai teuana I nakon ana aobiti te tia mwane n te reirei ni bubuti ibukin au baeranti n nikiran roou. N na kabwakai roou ni kabane imwain ae I karaoa te kabanea n ukeuke n te wiiki are imwiina. Ngke I tabe n nakonako, I raraoma bwa N na kareka ia te mwane are N na kainnanoia. Ngkai bon ataein te reirei ae I bon kabakamwane ibukiu, bon akea tataran au mwane.
Ngke I roko n te aobiti, I titirakina te tia mwane bwa iraua riki ae I riai ni kabwaka.
“Akea riki ae ko na kabwaka ni karokoa ko anga beebwa,” e taku neiei.
Ma te mimi, I titiraki ngkana e koaua ke ngkana e takakaro.
“Eng, I koaua, ao I taua ma nanou” e taku. “Te mataniwi ni kauntira e karaoa te beebwa ibukim bwa e na reke iroum te tikaoratibu mairoun te tienita. E a reke ngkai iroum te tikaoratibu.”
Ongorau n taeka akanne e kakukureiai. I kaitaua neiei ao I biri nakon ana aobiti te kauntira ni karabwa te aomata are e karaoia.
“Ko aki riai ni kaitauai,” e kaeka te kauntira imwiin are e tuangnga aron ana kakaitau ao kukureina. “I bon tii ira ana kaetieti temanna.”
Ngke I nako, I uringa te kibu n booki aika a tabu are I tatangiria n tibwaia: “Ao e na kakabwaiaki are e kuneaki ni kakaonimaki nakon arau n te kabane ni bong, bwa e na tabekaki rake bwa e na maeka n te aba n uea are e katauraoaki ibukina ma ni katean te aonaaba. Ao nooria bon Ngai ae [Iesu Kristo] ae I a tia n taekinna” (Ita 4:19).
Man karaoan ae eti, I a tia ni kaota au kakaonimaki ni kawakinan ana tua Tamara are i Karawa—riki inanon te tai are e kakaraoaki te aki kokoaua. I ataia bwa ngkai I tei ni matoa inanon au onimaki, E bon aki kona ni kitanai.
I kukurei bwa I a kona ngkai ni kamatebwai n akea te bwakamwane ae N na raraoma iai; I kaungaaki naba bwa n a reitinako ni karaoa ae eti, tiaki ibukin te kanuanga ao kakabwaia ake I kona ni karekei ma ibukina bwa I tangira Tamara are i Karawa ao Natina, Iesu Kristo, are e katea te banna ni katoto nakoiu.