ʻI heʻeku hoko ko e akonaki taʻu 14, ko e hā te u lava ʻo tokoni ai ki he faiako fakaʻapí?

Fakatatau mo e folofolá, ko e taumuʻa ʻo e kau faiako fakaʻapí ke nau “ʻaʻahi ki he fale ʻo e kāingalotú takitaha, ʻo naʻinaʻi kiate kinautolu ke nau lotu ʻaki ʻa e leʻó pea ʻi he lilo ʻo fai ʻa e ngaahi fatongia fakafāmili kotoa pē” (T&F 20:51). Ko e kau faiako fakaʻapí ʻoku nau “leʻohi … pea ke [nau] ʻiate kinautolu mo fakamālohia” ʻa e kakai ʻoku vahe ange ke nau akoʻí (T&F 20:53). ʻOku nau “fakatokanga, fakamatala, naʻinaʻi, mo akonaki, pea fakaafeʻi ʻa e kakai kotoa pē ke haʻu kia Kalaisi” (T&F 20:59).

Fehuʻi leva he taimí ni kiate koe, “ʻE lava nai ke u fai ʻa e ngaahi meʻa ko iá?” Ko e talí ko e ʻio. Fehuʻi ki ho hoá ʻa e founga ke ke lava ai ʻo tokoní. ʻE lava ʻo tokoni atu ke ke ako ke aleaʻi ʻa e taimí, fai ha fakamoʻoni, fai ha ngaahi lēsoni, pea toe lahi ange. Te ke toki siotonu leva ʻi he founga te ke lava ai ʻo tāpuakiʻi ʻa kinautolu ʻokú mo ʻaʻahi ki aí, pea te ke maʻu ha loto falala fekauʻaki mo hono fakaʻaongaʻi ʻa e ngaahi meʻafoaki kuo foaki atu ʻe he ʻOtuá ke fakahoko ʻaki ʻa e ngāué ni pea mo ha ngaahi fatongia lahi kehe ʻo e lakanga fakataulaʻeikí ʻi he toenga hoʻo moʻuí.