Maʻá e Fānau Īkí
Kelela mo e Polokalama ʻa e Palaimelí
ʻOku nofo ʻa e tokotaha naʻá ne fai e talanoá ʻi Kololato, USA.
Ne toki papitaiso ʻa Kelela mo hono fāmilí. Naʻe saiʻia ʻa Kelela ʻi he ʻā hake ʻi he ʻaho Sāpaté ʻo ʻalu fakataha ki he lotú.
ʻI ha Sāpate ʻe taha ne pehē ai ʻe he Palesiteni ʻo e Palaimelí ʻe vavé ni mai hano fakahoko ha Polokalama ʻa e Palaimelí. Naʻe ʻikai ke fuʻu fakapapauʻi ʻe Kelela pe ko e hā e polokalama ʻa e Palaimelí. Ka naʻá ne ʻiloʻi naʻá ne fie maʻu ke kau ki ai.
Ne fehuʻi ange ʻe heʻene faiakó ki ai, “Te ke lava ʻo lau ha potufolofola pea fai hoʻo fakamoʻoní ʻi he polokalama ʻa e Palaimelí?”
Naʻe kamokamo ʻa Kelela. Naʻá ne fuʻu fiefia! Naʻá ne fie ako ki he ongoongoleleí ʻi he lahi taha te ne ala lavá. Ka naʻá ne manavasiʻi foki. Fēfē kapau te ne fai ha fehalaaki?
Naʻe akoako ʻe Kelela ʻene kongá he pō kotoa pē. Naʻe teʻeki ai ke ne ʻilo ʻa e ngaahi lea kotoa pē ʻi he folofolá.
Ne pehē ange ʻe heʻene Fineʻeikí, “Te ke tō tō atu koe ia.”
Naʻe ʻikai ke fuʻu fakapapauʻi ia ʻe Kelela. Ko ʻene fuofua polokalama Palaimelí ʻeni. Ko e kotoa ʻo e tamaiki kehé ne nau ʻosi fai ia ʻe kinautolu kimuʻa.
Ne talaange ʻe heʻene tangataʻeikí, “Manatuʻi, kapau te ke fai ho lelei tahá, ʻe fai ʻe he Tamai Hēvaní e toengá.”
ʻI he pō kimuʻa pea fai e polokalamá, ne lotua ʻe Kelela ha tokoni ke fai hono lelei tahá. Naʻá ne tūʻulutui pē ʻo fakakaukau ki heʻene kongá. Naʻá ne ongoʻi fiemālie ki ai.
ʻI he pongipongi Sāpaté, naʻe lotu ʻa Kelela ke ʻoua naʻá ne ilifia.
ʻI he hokosia hono taimí, ne lue atu ʻa Kelela ki muʻa. Naʻá ne fai ha kiʻi fehalaaki ʻi ha taha ʻo e ngaahi lea ʻi he folofolá. Ka naʻá ne manatuʻi lelei ʻa e ongo fakaʻofoʻofa naʻá ne maʻu hili ʻene lotú. Naʻá ne malimali mo fai ʻene fakamoʻoní. Naʻá ne fakamatala fekauʻaki mo e lahi ʻo ʻene ʻofa he Fakamoʻuí.
Naʻe malimali ʻa Kelela ʻi heʻene tangutu ki laló. Naʻá ne ʻiloʻi naʻe ʻikai tokanga mai ʻa e Tamai Hēvaní ia ki he ʻikai haohaoa ʻa e meʻa kotoa pē naʻá ne lea ʻakí. Naʻá Ne tokanga mai ki he meʻa naʻe ʻi hono lotó.
Ngaahi Tā Fakatātā ʻa Kristin Kwan