Ko Ha Fili Faingataʻa
ʻOku nofo e tokotaha ʻokú ne fai e talanoá ʻi ʻIutā, USA.
ʻE lava nai ʻi ha vaʻinga vitiō kovi ʻo ʻai ke mole ai hono kaungāmeʻa foʻoú?
“Fili ʻa e moʻoní [ʻo ka ke ka fai ha fili]” (Ngaahi Himí, fika 146).
Ne lue māmālie hake ʻa Tieko ʻi he tafungofungá ʻi heʻene foki ki ʻapi mei he akó. Naʻe meimei ko e konga lelei taha ʻo e ʻahó ʻa e taimi mālōloó. Ka naʻe fakamamahi ia ʻi he uiké kotoa! Naʻe ʻikai ha taha ʻe fie vaʻinga ʻakapulu mo ia, ko ia naʻá ne luelue tokotaha holo pē ʻi he malaʻe vaʻingá ʻo aʻu ki he tā ʻa e fafangú.
“ʻE faʻē, Ko au ʻeni!” Ko e kaila atu ia ʻa Tieko ʻi heʻene hū atu ʻi he matapaá ʻo ne tangutu hifo ʻi peitó.
“Naʻe fēfē akó?” Ko e ʻeke ange ia ʻe heʻene fineʻeikí.
“ʻIkai ke fuʻu lelei.” Ne toʻo mai ʻe Tieko ha foʻi ʻāpele. “Naʻe ʻikai fie vaʻinga ha taha ia mo au ʻi he mālōlō siʻí.” Naʻe kamata ke ne ongoʻi ʻe tangi, ko ia naʻá ne kuikui.
Ne pehē ange ʻe he fineʻeikí, “ʻOku faingataʻa e ongoʻi tuenoá pe liʻekiná.” Naʻá ne ala atu ki he uma ʻo Tiekó. “Mahalo pē te ke lava ʻo fai ha lotu ki ha tokoni.”
Ne milimiliʻi ʻe Tieko hono matá. Ne pehē ange ʻe Tieko, “Mālō, Fineʻeiki,” peá ne lele ki hono lokí. Naʻe tokanga moʻoni nai ʻa e Tamai Hēvaní pe ʻoku ʻi ai hano kaungāmeʻa ke vaʻinga mo ia ʻi he taimi mālōlō siʻí? Naʻe tūʻulutui hifo ʻa Tieko ʻo lotu ke ne lava ʻo maʻu hano kaungāmeʻa. ʻI he ʻosi ʻene lotú, naʻá ne ongoʻi lelei ange, ka naʻe teʻeki pē ke ne ʻilo e meʻa ke faí.
ʻI he tuku ʻa e akó ʻi he ʻaho hono hokó, ne tatangi mai e fafangu e matapaá. Naʻe lele ʻa Tieko ke fakaava e matapaá. Naʻe tuʻu ai ha kiʻi tamasiʻi foʻou mei he kaungāʻapí. Naʻe fakatokangaʻi ia ʻe Tieko ʻi he malaʻevaʻingá he ʻahó ni.
Naʻá ne pehē mai, “Mālō e lelei, ko Lūpeni au. ʻOkú ke fie vaʻinga ʻi hoku ʻapí?”
Naʻe mamali ʻa Tieko. Ko ha kaungāmeʻa ke vaʻinga mo ia? Ko ha tali ia ki heʻene lotú!
Ne na lue atu ki he ʻapi ʻo Lūpení peá na tangutu hifo ʻi he seá. Naʻe vaʻinga vitiō mai ʻa e taʻokete ʻo Lūpení. Naʻe ʻikai ke ʻilo ʻe Tieko pe ko e hā e meʻa ke fakakaukau ki ai ʻi he kamataʻangá. Naʻe fuʻu fulikivanu pea palakū ʻa e ngaahi ʻatá, ka naʻe hangē naʻe saiʻia pē ai ʻa Lūpeni ia mo hono taʻoketé. “Maʻu ia!” Ko e kaila atu ia ʻa Lūpeni lolotonga ʻenau sió.
Naʻe ongoʻi ʻe Tieko ʻokú ne maʻemaʻekina, pea naʻá ne sio fakamamaʻu ki hono vaʻé. Naʻá ne ʻiloʻi naʻe ʻikai totonu ke ne sio ki ha ngaahi keimi vitiō hangē ko ʻení.
Ka ko e hā te ne lava ʻo faí?
Naʻe ʻikai ke ne loto ke pehē ʻe hono kaungāmeʻa foʻoú ʻokú ne fuʻu taʻeoli ke vaʻinga ʻi ha keimi vitiō fakafiefia. ʻE fakakaukau nai ʻa Lūpeni ʻokú ne faikehe kapau te ne lea hake?
Naʻá ne sio takai he lokí pea feinga ke fakakaukau ki ha ngaahi meʻa kehe te nau lava ʻo fai.
Ne fakatau ʻe Tieko ʻene mānavá. Naʻá ne pehē ange, “ʻE lava ke ke fakahā mai kiate au e toenga homou falé? Pe ko ʻeta vaʻinga pē ʻi ʻolunga?”
Ne sio hake ʻa Lūpeni kia Tieko ʻi ha kiʻi taimi siʻi. Ne longomate pē ʻa Tieko. ʻE pehē nai ʻe Lūpeni ʻoku ʻikai ke ne toe fie vaʻinga ia?
Ne fofonga fiefia hake ʻa Lūpeni. “ʻOleva, ʻokú ke saiʻia he kaá? ʻOku ou maʻu ʻa e ʻū kā oma tahá. Te ke fie ʻai ke nau lova?”
Naʻe malimali ʻa Tieko mo ne kamo ange. Naʻá ne muimui atu ʻia Lūpeni ki ʻolunga. Naʻe mavahe atu ʻa e ongoʻi faingatāʻiá—naʻá ne ongoʻi hangē ʻokú ne ʻalu ʻea hake pē ʻi he sitepú! Naʻá ne fiefia kuo maʻu hano kaungāmeʻa foʻou, pea naʻá ne fiefia foki ko e ʻikai te ne sio ki ha meʻa ʻoku kovi.
Ne pehē ange ʻe Lūpeni, “Ko e kā kulokulá ia ʻaʻaku, ka te ke lava ʻo fakaʻaongaʻi e kā lanu puluú pe ko e lanu matá. Ko fē te ke fie maʻú?”
Naʻe ala atu ʻa Tieko ki he kā lanu matá—ʻene lanu manakó. Ko ha fili faingofua ʻeni ke fai.
Ngaahi tā fakatātā ʻa Jan Leifering