Pōpoaki ʻa e Kau Palesitenisī ʻUluakí
Hoko Ko ha Maama
Kuo lahi ha ngaahi kātoanga fakafonua ne fakahoko fakataha mo hono fakatapui ʻo ha ngaahi temipale ne u lavengamonū ke kau atu ki ai. Ne u saiʻia ʻaupito ʻiate kinautolu kotoa, kau ai ʻa e temipale fakamuimui taha ne u kau ki aí ʻi Fīniki, ʻAlesona, ʻIunaiteti Siteití, ʻi Nōvema ʻo e taʻu kuo ʻosí.
ʻOku fakahoko ʻe he toʻu tupu ʻo e Siasí ʻoku kau ki he ngaahi kātoanga fakafonuá, ha ngaahi polokalama fakaholomamata mo fakangalongataʻa. Kimuʻa ʻi he kātoanga ʻi Fīniki he taʻu kuo ʻosí, naʻá ku talaange ki he toʻu tupú, “Ko e fānau kimoutolu ʻo e māmá.”
ʻOku ou loto ke ʻilo ʻe he toʻu tupu kotoa ʻo e Siasí, ko e fānau kinautolu ʻo e māmá. ʻI heʻene peheé, ʻoku ʻi ai honau fatongia ke nau hoko ko ha “ngaahi maama ʻo māmani” (Filipai 2:15). ʻOku ʻi ai honau tufakanga ke vahevahe ʻa e ngaahi moʻoni ʻo e ongoongoleleí. ʻOku ʻi ai honau uiuiʻi ke hoko ko ha maama ʻo e temipalé, fakafōtunga atu e maama ʻo e ongoongoleleí ki ha māmani ʻoku fakautuutu ʻene fakapoʻulí. ʻOku nau maʻu ha tufakanga ke tutu ʻenau māmá ke ulo pea ke ulo lahi.
Ke tau lava ʻo “ʻi he kakai tuí ko e fakaʻilonga” (1 Tīmote 4:12), kuo pau foki ke tau tui mo kitautolu. Kuo pau ke tau fakatupulaki ʻa e tui ʻoku fie maʻu ke tau hao fakalaumālie aí pea fakaulo atu ha maama ki he niʻihi kehé. Kuo pau ke tau tanumaki ʻetau fakamoʻoní kae ʻoua kuo hoko ia ko ha taula ki heʻetau moʻuí.
ʻOku kau ʻi he ngaahi founga ola lelei taha ke maʻu mo tauhi ai ʻa e tui ʻoku tau fie maʻu ʻi he ʻaho ní, ʻa hono lau mo ako e ngaahi folofolá pea lotu maʻu pē. ʻOku ou pehē ki he toʻu tupu ʻo e Siasí, kapau kuo teʻeki ai ke ke fai ia, fakatupulaki he taimí ni ha tōʻonga moʻui ko hono ako fakaʻaho ʻo e folofolá mo e lotú. Ka taʻe fakahoko ʻa e ongo founga mahuʻingá ni, ʻe lava ke hanga ʻe he ngaahi ivi tākiekina mei tuʻá mo e ngaahi moʻoniʻi meʻa faingataʻa ʻo e moʻuí ʻo ʻufikaua pea aʻu pē ʻo ne tamateʻi hoʻo māmá.
ʻOku ʻikai faingofua ʻa e vahaʻa taʻu ʻo e hongofulu tupú. Ko e ngaahi taʻu mahuʻinga ia ʻe hanga ai ʻe Sētane ʻo ʻahiʻahiʻi koe pea fai hono tūkuingatá ke fakataueleʻi koe mei he hala ko ia te ne tataki koe ki ho ʻapi fakalangí. Ka ʻi hoʻo lau mo lotuá pea ʻi hoʻo ngāue mo talangofuá, te ke ʻilo lelei ange ai ʻa e “maama ʻoku ulo ʻi he fakapoʻulí” (T&F 6:21), ʻa hotau Faʻifaʻitakiʻangá pea mo hotau mālohingá—ʻa e ʻEiki ko Sīsū Kalaisí. Ko Ia ʻa e Maama ʻoku totonu ke tau hiki hake ke tuli atu ʻa e fakapoʻuli ʻoku lolo maí (vakai ki he 3 Nīfai 18:24).
ʻOkú ke maʻu ha ngaahi faingamālie taʻe faʻalaua ke ulo atu, ʻaki e fakamoʻoni mālohi ki he Fakamoʻuí mo ʻEne ongoongolelei kuo toe fakafoki maí. ʻOku nau ʻākilotoa koe ʻi he ʻaho kotoa pē, ʻo tatau ai pē pe ko e hā e tūkunga te ke ʻi ai. ʻI hoʻo muimui ki he sīpinga ʻa e Fakamoʻuí, te ke maʻu ai ha faingamālie ke hoko ko ha maama, ʻi he moʻui ʻa kinautolu ʻoku mou feohí—ʻo tatau ai pē pe ko e kau mēmipa ho fāmilí, kaungā-ako, kaungā-ngāué, ngaahi mahení, pe ko ha sola.
ʻI he taimi ʻokú ke hoko ai ko ha maama ki he māmaní, ʻe ongoʻi ʻe he kakai ʻoku mou feohí ha laumālie makehe te ne ngaohi kinautolu ke nau fie feohi mo koe pea muimui ki hoʻo sīpingá.
ʻOku ou kole atu ki he mātuʻá mo e kau taki ʻo hotau toʻu tupú ke tokoni kiate kinautolu ke nau tuʻu maʻu ʻi he moʻoní mo e anga māʻoniʻoní. Tokoni ke fakalahi ange ʻenau vakaí ki he ngaahi faingamālie ki he akó, mahinó, mo e ngāue tokoní ʻi he puleʻanga ʻo e ʻOtuá. Langaki ʻiate kinautolu ha mālohi ke fakaʻehiʻehi mei he ngaahi ʻahiʻahi ʻo e māmaní. ʻOange kiate kinautolu ʻa e holi ke nau ʻaʻeva ʻi he angamaʻá mo e tuí, faʻa lotu, mo falala ki he langí ko honau taula paú ia.
ʻOku ou pehē ki hotau toʻu tupú, ʻoku ʻofa ʻa ʻetau Tamai Hēvaní ʻiate kimoutolu. Fakatauange pē ʻoku mou ongoʻi foki mo e ʻofa ʻoku maʻu ʻe he kau taki ʻo e Siasí kiate kimoutolú. ʻOfa pē te mou maʻu ha holi ke tokoni ki hoʻomou Tamai Hēvaní pea mo Hono ʻAló. Pea fakatauange te mou ʻaʻeva maʻu ai pē ʻi he moʻoní pea hoko ko ha maama ʻi he lotolotonga ʻo e fānau ʻa e ʻOtuá.
Fakatātā ʻo e maama kamó fai ʻe he dzm1try/iStock/Thinkstock