ʻE lava Ke u Maʻu ha Tohi ʻa Molomona?

Soni Hilitoni, Kalefōnia, USA

Ne u ʻaʻau hake ʻeku kato paʻangá, pea ne ʻi lalo fakataha mo ʻeku paasí, ha tatau ʻo e makasini Ensign ʻo e konifelenisi lahí!

ʻI heʻeku hū atu ki he malaʻe vakapuná heʻeku foki ki ʻapi mei ha ʻaʻahi ki haku kaungāmeʻa fuoloa, ne u ongoʻi loto-foʻi ʻi he ʻikai ke u vahevahe ʻa e ongoongoleleí ʻi heʻeku folau ko ʻení. Naʻá ku faʻo maʻu pē ha Tohi ʻa Molomona ʻi heʻeku kato paʻangá ke fakamanatu kiate au ke u lotua ha taha ʻe lava ke u foaki ia ki ai, ka ʻoku faʻa lahi ʻene moʻutukua ʻi heʻeku kato paʻangá. Ne ʻikai ola lelei mo e folau ko ʻení.

Naʻá ku fakatau ʻeku mānavá peá u lotua fakalongolongo ha kole fakamolemole. Naʻá ku ongoʻi hangē ha mēmipa ngāue fakafaifekau taʻeʻaongá.

ʻI heʻeku lue atu he laine sivi maluʻí (security line), naʻe ueʻi au ke lea ki he fefine ʻi muʻa ʻiate aú. Ne ma talanoa fekauʻaki mo e feituʻu ʻokú ma folau ki aí peá ma māvahevahe leva ki ha laine kehekehe. Ka ʻi heʻeku ʻalu atu ki heʻeku hūʻangá, naʻá ku mamata ki he fefine tatau. Naʻá ne pehē mai. “ʻOiauē, mālō e lelei.” “Fakafiefia ke sio atu kiate koe.”

Naʻá ku fehuʻi ange pe ʻoku mavahe fakakū ʻene vaká. “ʻOku kei toe ha ha ngaahi houa ia—ʻoku vave ʻeku haʻú”

“Peʻi, haʻu ʻo tangutu fakataha mo au!” ko au atu ia.

Ne toe ha miniti ʻe 45 pea toki fakahekeheka ʻeku vaká, ko ia ne ma tangutu ʻi heʻeku matapaá ʻo talanoa fekauʻaki mo ʻema ngāué. Ne u talanoa ki he niʻihi ʻo e ngaahi meʻa kuó u tohi maʻá e Siasí, pea fakafokifā kuó ne malimali.

Naʻá ne fehuʻi mai, “Ko e Māmonga koe?” “Kuo fuoloa ʻeku fie ʻilo lahi ange fekauʻaki mo e kau Māmongá. ʻE founga fēfē haʻaku maʻu ha tatau ʻo e Tohi ʻa Molomoná?”

Naʻá ku pehē ange mo fakaava ʻeku kato paʻangá, “Sai, ʻoku ou maʻu heni ha tohi ʻe taha.”

Naʻá ne pehē mai, “Mālō muʻa.” “ʻOku ou tui mahalo ne pau pē ke ta fetaulaki he ʻahó ni.”

Ne fonu hoku lotó ʻi he houngaʻiá. ʻI he taimi naʻá ne ʻeke mai ai pe ko e hā ʻoku kehe ai e Siasí mei he toenga ʻo e ngaahi tui fakalotu kehé, ne u ongoʻi ne tākiekina au ʻi he meʻa ke lea ʻakí.

Naʻe fanongonongo mai e fakahekeheka homau vaká pea naʻá ku talaange te u kole ki ha kau faifekaú ke nau fetuʻutaki atu ki ai. Ne u fakaava hake ʻeku kato paʻangá ke toʻo hake ʻeku paasi fakahekeheká kuo ʻikai ʻiloa ia. Ne u ʻaʻau hake ʻeku kato paʻangá. Ne u sio hifo ki lalo fakataha mo ʻeku paasí, ki ha tatau ʻo e makasini Ensign ʻo e konifelenisi lahí! Ne u ʻoange ia ki ai peá u fakamālō ki he ʻEikí ʻi he pau ke u fekumi ki heʻeku paasi fakahekeheká. Naʻá ne talamai ʻokú ne faʻa haʻu mo ha nāunau ke ne lau ka naʻá ne ongoʻi ʻoku totonu ke ʻoua te ne fai ia.

Naʻáne pehē mai, “Mahalo ko e ʻai pē ka u lava ʻo lau ʻeni.” Naʻá ku fāʻofua ki ai lolotonga ʻoku ou puke ʻeku paasi fakahekeheká mo u lea fakamāvae kiate ia.

ʻOkú ma talanoa ʻeni he uike kotoa pē, pea ʻokú ne talamai ʻa e faʻa ʻaʻahi ange ʻa e ongo faifekau fefiné. Ko e taʻu eni ʻe taha, pea ʻoku ou ʻamanaki pē te u mamata ki hano papitaiso ia ʻi ha ʻaho. ʻOku ʻikai te u ʻilo pe ʻe hoko ia, ka ʻoku ou kei ofo pē ʻi he ngaahi fokotuʻutuʻu ʻa e Tamai Hēvaní kae lava ke fekolosiʻaki homa halá. ʻOku ou fakamālō kiate Ia ʻi Heʻene fanongo ki heʻeku lotú pea foaki kiate au ʻa e faingamālie faingofua ke vahevahe ʻa e Tohi ʻa Molomoná.