Ngāue Fakafaifekaú pe ko e Paʻangá?
ʻOku nofo ʻa e tokotaha naʻá ne faʻú ʻi Seala, Palāsila.
ʻOku ʻikai ha paʻanga te ne fakatataua ʻa e tāpuaki ʻo ʻete sio ki he teuteu ʻa e ngaahi fāmilí ke ō ʻo sila ʻi he temipalé.
Tā fakatātaaʻi ʻe David Malan
Hili ha taʻu ʻe taha ʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māoniʻoni ʻi he Ngaahi ʻAho Kimui Ní, naʻá ku fakahū ai ʻeku ʻū pepa ke ngāue fakafaifekau taimi kakató. Ne fakafepakiʻi kakato ʻe hoku fāmilí ʻeku ʻalu ʻo ngāue fakafaifekaú pea nau fakakaukau ʻoku totonu ke hoko atu ke maʻu hoku mataʻitohi M.A. Ne toki maʻu ʻeni hoku mataʻitohi B.A, pea naʻá ku fakaʻamu maʻu pē ke maʻu hoku mataʻitohi M.A. heʻeku ʻosí. Naʻe loto lelei ʻeku kau palōfesá ke tokoniʻi au koeʻuhí ne u hoko ko ha tokotaha ako lelei.
ʻI heʻeku teuteu atu ke ʻalu ʻo ngāue fakafaifekaú, ne fuʻu faingataʻia fakapaʻanga hoku fāmilí. Ne mole e ngāue ʻa hoku taʻokete lahi tahá. Hili ha taimi nounou mei ai ne tō lalo fakapaʻanga e kautaha ne ngāue taʻu lahi ai ʻeku tamaí, pea ne tuku fakataimi ia ki tuʻa. Naʻe iku fakaʻaongaʻi kotoa ai ʻe heʻeku tamaí ʻene ngaahi monūʻia he puleʻangá ke tokoniʻi ʻeku kui fefiné, pea ʻi ha pō ʻe taha ne u sio ai ʻokú ne tangi koeʻuhí naʻe ʻikai ke ne ʻilo pe ʻe founga fēfē hano tauhi e fāmilí.
ʻI he taimi ko iá, ne u maʻu ai ha sikolasipi mei ha ʻunivēsiti ne feʻunga hono mahuʻingá mo e vaeua ʻo e vāhenga siʻisiʻi tahá (minimum wage salary). ʻI heʻeku maʻu ʻeku ʻū vahé, naʻá ku ʻuluaki totongi maʻu pē ʻeku vahehongofulú. Ka ʻi heʻeku maʻu ʻeku vahe fakamuimui tahá hili e mole e ngāue ʻa ʻeku tamaí, ne kole mai ʻe heʻeku fineʻeikí ke ʻoua muʻa te u foaki ha paʻanga ki he Siasí koeʻuhí ʻoku mau fie maʻu ia ʻi ʻapi. Naʻá ku fakamatala ange ki ai e vahehongofulú mo hono mahuʻingá peá u fakaʻaliʻali ange ʻa e talaʻofa naʻe fai ʻe he ʻEikí ʻi he Malakai 3:10. Neongo naʻe ʻikai ke ne fiefia, ka naʻá ku totongi ʻeku vahehongofulú pea naʻá ku ʻilo ʻoku totonu ia.
Lolotonga e hokohoko atu ʻeku teuteu ki he ngāue fakafaifekaú, ne u kau ki ha feʻauhi ʻi ha ʻunivēsiti fakalotofonua ke u kiʻi ʻaliaki pē. Ne u lava pea ne foaki mai mo ha tuʻunga te u lava ai ʻo maʻu ʻa e paʻanga meimei lahi tatau ne maʻu ʻe heʻeku tamaí ʻi heʻene ngāué. ʻE lahi feʻunga ia ke tokangaʻi ʻaki hoku fāmilí kae ʻoua kuo maʻu vāhenga mālōlō ʻeku tamaí. Naʻe fakaʻamu hoku fāmilí ke u tali ʻa e ngāue.
Naʻá ku lotu lahi, pea naʻe tali mai ʻe he ʻEikí ʻoku fie maʻu ke u ʻalu ki he malaʻe ngāue fakafaifekaú. Naʻá ku falala kiate Ia pea ne u tali hoku uiuiʻí ki he Misiona Palāsila Sanita Maliá. Naʻe tāpuekina ʻe he ʻEikí hoku fāmilí lolotonga ʻeku ʻalu ʻo ngāue fakafaifekaú. ʻOku ou ʻiloʻi naʻe fakaava mai ʻa e ngaahi matapā ʻo e langí (vakai, Malakai 3:10). Naʻe toe maʻu e ngāue ʻeku tamaí mo hoku tokouá, pea ne lava hoku fāmilí ke tauhi ha fanga pulu ke maʻu ai ha paʻanga hū mai lahi ange.
Kuo tupulaki ʻa ʻeku fakamoʻoni kia Sīsū Kalaisi mo ʻEne ngāué, pea ko ha meʻa mātuʻaki mahuʻinga kiate au ʻeku sio ki he ngaahi fofonga fiefia mo e liliu ʻa e ngaahi loto ʻo kinautolu ne u ngāue ki aí. ʻOku ʻikai ha paʻanga te ne fakatataua ʻa e tāpuaki ʻo ʻete sio ki he teuteu ʻa e ngaahi fāmilí ke ʻalu pea ke silaʻi ʻi he temipalé.