Ha Tokoni! ʻOku Teu Ke Vetemali ha Taha
ʻOku nofo e tokotaha ʻokú ne fai e talanoá ʻi ʻIutā, U.S.A.
ʻI he taimi ʻoku vetemali ai ʻa e ongomātuʻá, ʻoku faʻa ongoʻi ilifia, hohaʻa, halaia, ʻita, puputuʻu, fiemālie, pe mamahi ʻa e fānaú—ko e taimi ʻe niʻihi ʻoku nau ongoʻi kotoa ʻeni he taimi pē ʻe taha. Kapau kuo hoko ia kiate koe pe ko e taha ʻo ho kaungāmeʻá, ko ʻeni ha ngaahi fakakaukau ʻe ala tokoni.
ʻOku ou ongoʻi tuenoa. Hangē ʻoku maʻu ʻe he tokotaha kotoa pē ha fāmili haohaoa tukukehe pē au.
ʻOku ʻikai ha fāmili ia ʻe haohaoa, neongo ʻoku ngali pehē.
Manatuʻi ʻoku ʻofa kotoa ʻa hoʻo mātuʻá, pīsopé, kau faiako Palaimelí, kaungāʻapí, mo e kaungāmeʻa ʻi he uootí ʻiate koe.
Ko e taimi ʻe niʻihi ʻe lea ʻaki ʻe he kakaí ha ngaahi meʻa te ne fakalaveaʻi ho lotó ka naʻe ʻikai te nau ʻuhinga pehē. ʻI heʻene hoko ha meʻa pehē, ʻoua naʻá ke manavahē ke talaange kiate kinautolu ʻa e meʻa ʻokú ke ongoʻí pea tokoni ke nau sio ki ha founga lelei ange ke talanoa atu ai kiate koe fekauʻaki mo e vetemalí.
ʻOku ou loto mamahi ki heʻeku fineʻeikí mo ʻeku tangataʻeikí.
ʻOku faingofua ke ongoʻi ʻita ʻi he taimi ʻoku ʻikai ai ha meʻa te ke lava ʻo fai ʻi he tūkunga ko iá. ʻE ala tō hoʻo loto mamahí ʻau ki he niʻihi kehé. Neongo pē ʻe faingataʻa, feinga pē ke fakahaaʻi ʻa e ʻofa ki ho fāmilí. Lotua ha tokoni ke ke sio ki hoʻo mātuʻá ʻo hangē ko e ʻafio hifo ʻa Sīsū kiate kinauá. ʻOkú Ne ʻofa ʻiate kinaua, mo koe, mo e tokotaha kotoa pē ʻi ho fāmilí.
Kapau ʻoku ʻikai ke ke lava ʻo taʻofi hoʻo ongoʻi ʻitá, talanoa ki hoʻo fineʻeikí pe tangataʻeikí pe ko ha taha kehe ʻokú ke falala ki ai. Te nau lava ʻo tokoni koe ke kumi ha founga lelei ke ke ongoʻi lelei ange ai, hangē ko e fakamālohisinó pe ʻātí.
Te u nofo fakataha nai mo ʻeku ongomātuʻá ʻi langí?
Koeʻuhí ko e Fakalelei ʻa Sīsuú, ʻe lelei ʻa e meʻa kotoa pē hili ʻetau maté. ʻOku ʻikai totonu ke ke hohaʻa. Tatau ai pē pe ko e hā, te ke kei hoko maʻu ai pē ko e konga ʻo e fāmili hoʻo ongomātuʻa fakalangí. Kapau te ke feinga ai pē ke fili ki he totonú, te ke maʻu ʻa e ngaahi tāpuaki kotoa pē kuo palani ʻe he Tamai Hēvaní maʻaú.
Ko hoku foʻui nai e vetemali ʻeku ongomātuʻá?
Mahalo te ke fakakaukau naʻá ke mei lava ʻo tokoniʻi hoʻo ongomātuʻá ke na kei fakataha. Ka ko hono moʻoní ʻoku ʻikai ko ha foʻui ia ʻoʻou. Ko kinaua pē ia ne na fai ʻa e fili ke vetemalí. ʻOku ʻikai ko ha foʻui ia ʻo e fānaú e vetemali ʻoku hoko ʻi he fāmilí.
ʻOku ou ilifia ki he meʻa ʻe hoko maí.
ʻOku fakanatula pē ʻa e hohaʻa ki he kahaʻú, ʻi he taimi ʻoku hoko ai ʻa e ngaahi liliu lalahí. Talanoa ki hoʻo faʻeé mo e tamaí. ʻOkú na fie maʻu ke na ʻilo e taimi ʻokú ke loto-mamahi aí, pea te na lava ʻo tokoni atu ki hoʻo ngaahi hohaʻá mo hoʻo ngaahi fehuʻí. Fakapapauʻi ʻokú ke lotu ke maʻu ha fakafiemālie.
ʻOku ou ongoʻi mātuʻaki loto mamahi he taimi kotoa pē.
ʻOku sai pē ke ongoʻi loto mamahi. Ko e ongoʻi loto mamahi ʻi ha fuʻu liliu lahi peheé ko ha sitepu mahuʻinga ia ki ha ongoʻi lelei ange ʻamui. Neongo pē te ke ngali ongoʻi loto-mamahi he taimi ʻe niʻihi, hokohoko atu hoʻo fai ʻa e ngaahi meʻa ʻokú ke saiʻia hono faí. Fakamoleki ha taimi ʻi tuʻa. Lau ha tohi lelei. Fanongo ki he mūsika fakafiefiá. Feinga mālohi ʻi he akó. Fiefia fakataha mo ho kaungāmeʻá. Lotu ki he Tamai Hēvaní.
Kapau ʻe tolonga ʻo fuoloa ʻaupito hoʻo ongoʻi loto-mamahí pea faingataʻa ai ke ke mohe, kai, tokanga taha ki he akó, pe fai e ngaahi meʻa ʻokú ke angamaheni ke saiʻia hono faí, talanoa ki ha taha lahi ʻokú ke falala ki ai koeʻuhí ke ne lava ʻo tokoni atu ke ke toe ongoʻi lelei ange.
ʻE fakaʻau ke lelei ange ʻa e ngaahi meʻá ni.
Tatau ai pē pe ko e hā ʻokú ke ongoʻi he taimí ni, ʻe fakaʻau pē ke ke ongoʻi lelei ange. Lolotonga ʻení, lotu maʻu pē ki he Tamai Hēvaní ki ha fakafiemālie. Manatuʻi ʻoku ʻafio mai ʻa e Tamai Hēvaní mo Sīsū kiate koe maʻu ai pē pea he ʻikai te Na teitei tuku koe ke tuenoa. ʻOkú Na ʻofa ʻiate koe mo hoʻo mātuʻá pea te Na tokoniʻi ʻa kimoutolu kotoa. Te Na ʻoatu ʻa e mālohi ke ke ongoʻi nonga mo fiefia.
Tā fakatātaaʻi ʻe Katie Payne