Ko e Ngāue ʻi he Siasí
Ko e Mālohi ʻo e Faiako Fakaʻapí
ʻOku nofo ʻa e tokotaha naʻá ne faʻú ʻi ʻAlesona, ʻIunaiteti Siteití.
ʻE lava fēfē ke tau faiako fakaʻapi ki ha fāmili ʻoku ʻikai pē ke nau tali ke tau hū ange he matapaá?
Naʻe vahe au ke u hoa faiako fakaʻapi mo Misa ʻĒlikisoni, ko ha mēmipa matuʻotuʻa ange ʻi homau uōtí ka ko ha faiako fakaʻapi faivelenga. Naʻá ne tuku mai ke u tokangaʻi ʻema taimi-tēpilé, pea ne ʻikai ke u fuʻu hohaʻa au ki ai.
Ko e taha ʻo e ngaahi fāmilí ke ma ʻaʻahi ki aí, ko e fāmili Laití (kuo liliu e hingoá), naʻe ʻikai ke nau fuʻu mālohi ʻi he Siasí. ʻI he taimi naʻá ku tā atu ai ki he ʻapí, naʻe pehē mai ʻe Misa Laiti, “ʻOua naʻá ke toe tā mai ki hoku ʻapí.”
Ne u talaange kia Misa ʻĒlikisoni e meʻa naʻe hokó. ʻI he māhina hokó, ʻi heʻene kole mai ke u toe tā ki he fāmili Laití, ne u fakamanatu ange ki ai ʻa e ʻikai ke toe fie maʻu ʻe Misa Laiti ke fai ha tā angé. Ne vili mai pē ʻa Misa ʻĒlikisoni ke u tā pē au, pea ne u fai ia. ʻI he tali mai ʻe Misa Laiti e telefoní, ne u kole ange ke ʻoua muʻa te ne tāpuniʻí peá u talaange ki ai ʻa e vilitaki mai hoku hoa faiako fakaʻapí ke u tā angé. Naʻá ku kole ange pe te ma lava pē ʻo faiako fakaʻapi kiate ia ʻaki ʻema tā atu ʻi he māhina kotoa pē. Naʻá ne loto ki ai.
Talu mei ai mo ʻeku tā kia Misa Laiti he māhina kotoa. ʻI he taimi kotoa pē ne u tā atu ai, ne pehe mai ʻa Misa Laiti, “Kuo lava hoʻo tā maí.” Peá ne tāpuniʻi mai leva e telefoní. Naʻe ʻikai ko ha palopalema ia kiate au, pea naʻe ʻikai ke toe ʻeke mai ʻe Misa ʻĒlikisoni ia ha toe meʻa.
Ka ʻi he hili ha ngaahi māhina lahi, ne fokotuʻu mai ʻe Misa ʻĒlikisoni ke ma ʻaukai maʻá e fāmili Laití. Ne u loto ki ai, ko ia ai ne ma lotu mo ʻaukai leva ʻi ha Sāpate ʻe taha ke kumi ha founga ke ma aʻu ai kia Misa Laiti. ʻI he pongipongi hono hokó, ʻi heʻeku fakalaka atu ʻi he ʻapi ʻo e fāmili Laití ke ʻalu ki he ngāué, naʻe hū mai ʻa Misa Laiti kituʻa mei he falé. Ne u lava ʻo sio atu ki ha kiʻi loli meʻavaʻinga ʻi lalo he taha ʻo e ongo vaʻe mui ʻo ʻene kaá, ko ia ne u tuʻu ʻo tuhu atu ki ai. Naʻá ne fakamālō mai kiate au.
Naʻá ku pehē ange ki ai, “Kae kehe, ko hoʻo faiako fakaʻapí au.”
Naʻá ne toe fakamālō mai ʻi heʻeku ʻalu ki he ngāué.
Naʻá ku tā kia Misa ʻĒlikisoni ʻo talaange ki ai ʻa e meʻa naʻe hokó. Naʻá ne kole mai ke u tā kia Misa Laiti ke fokotuʻu ha taimi ke fakahoko ai ʻema faiako fakaʻapí ʻi he efiafi hono hokó, ne u fai ia. Naʻe tali loto hangamālie ia ʻe Misa Laiti. Ne mau maʻu ha taimi fakaʻofoʻofa mo e fāmilí pea fokotuʻu foki mo ha toe taimi ʻe taha. Naʻá ku mavahe mei honau ʻapí mo ha fakamoʻoni mālohi ange ki he ʻaukaí mo e lotú pea mo e mahuʻinga ʻo e hoko ko ha faiako fakaʻapí.
ʻI he konga kimui ʻo e uike ko iá ne mau ʻilo ai ne fakaʻatā ʻe Misa Laiti ʻa e kau faifekau taimi kakató ke nau kamata akoʻi hono ʻofefine taʻu 15. Naʻe lotu e taʻahiné ni ʻi ha ngaahi māhina lahi ke fakamolū ʻa e loto ʻo ʻene tamaí pea fakaʻatā ia ke papitaiso. ʻI he fakalau atu ʻa e taimí, ne kamata ke maʻu lotu ʻa e fāmilí, pea faifai pē pea fakangofua ʻe Misa Laiti ke papitaiso ʻa hono ʻofefiné. Ko hono moʻoní, ko ia pē naʻá ne fakahoko ʻa e papitaisó.
ʻOku ou houngaʻia ko e fakaongoongo ʻa Misa ʻĒlikisoni ki he Laumālié. Naʻe tokoni ʻa ʻene ngaahi fakakaukau lolotonga ʻa e aʻusia ko ʻení ke u maʻu ha fakamoʻoni maʻongoʻonga ange ki he mālohi mo e tuʻunga malava ʻo e faiako fakaʻapi mateakí.