ʻOku Fakafiefia ʻa e ʻAho Sāpaté
Ko ha founga ʻe nima ke toe mahuʻingamālie ange ai ho ngaahi ʻaho Sāpaté.
ʻI he ngaahi faingataʻa ʻoku tau fekuki mo iá, ʻoku ʻi ai hono mahuʻinga makehe ʻo hono fakaʻapaʻapaʻi ʻo e Sāpaté he te ne tokoniʻi kitautolu ke tau mālohi fakalaumālie. ʻOku vahevahe ʻe he toʻu tupu ko ʻeni mei ʻIulope Hahake ʻenau ngaahi fakakaukau fekauʻaki mo e founga ʻoku fakamālohia ai kinautolu ʻe he ʻaho Sāpaté—mo e founga ʻe lava ke fakamālohia mo koe foki.
Toe Ofi Ange ki he ʻEikí
Ko e ʻaho Sāpaté ko ha ʻaho ia ʻoku ou lava ke foaki kakato ai au ki he ʻEikí. ʻOku ou feinga ke ʻoua te u maumauʻi e taimí kae fakaʻaongaʻi ia ke u hoko ʻo lelei ange pea ke u toe ofi ange ai ki he Tamai Hēvaní. ʻI he ʻaho Sāpaté ʻoku ou fiefia ʻaupito ke tokoni ki he kāingalotu ʻo e Siasí ʻaki ʻeku tangutu ofi kiate kinautolu ke fakahaaʻi kiate kinautolu ʻoku ʻikai te nau liʻekina. ʻOku ʻomi ʻe he tokoni ki he niʻihi kehé ʻa e fiefia kiate au.
Kiate au, ko e ʻaho Sāpaté ko ha ʻaho ʻo e ako, fiefia, mo e nēkeneka ʻi heʻeku ako ke ngāue maʻá e ʻEikí. ʻOku ou tauhi e ʻaho Sāpaté ki he māʻoniʻoni taha te u ala lavá. ʻOku ʻomi ʻe he falala ki he Tamai Hēvaní ʻi he meʻa kotoa pē ʻa e nēkeneka mo e fiefia ʻi he māmaní pea ʻi he langí mo Ia mo Hono ʻAlo, ko Sīsū Kalaisí.
ʻĀvisi B., taʻu 18, Lativia
Maʻu e Sākalamēnití
Ko e ʻaho kotoa pē ʻoku ou ʻamanaki atu ki ha ʻaho te u lava ai ʻo ʻalu ki he lotú ʻo maʻu ʻa e sākalamēnití. ʻOku ʻikai ke u faʻa tatali ke tui hoku vala lotú, teuteuʻi au, ʻalu ki he lotú, pea toe fakafoʻou ʻa ʻeku ngaahi fuakava mo e ʻOtuá.
ʻOku ou faʻa ʻiteʻita, he taimi ʻe niʻihi ʻi heʻeku faʻa ʻā hake he pongipongí. Ka ʻi he taimi ʻoku ou ʻalu ai ki he lotú pea maʻu ʻa e sākalamēnití, ʻalu ki heʻeku ngaahi fakatahá, mo ako e folofolá, ʻoku ou ongoʻi ʻa e Laumālie Māʻoniʻoní, pea ʻokú ne langaki hake hoku laumālié. ʻOku mahuʻinga ke maʻu ʻa e sākalamēnití he uike kotoa pē, he kuo fakahā tonu mai ʻe hotau Fakamoʻuí ʻa e meʻa ʻoku fie maʻu ke tau faí.
Taiana D., taʻu 14, Lativia
Ako e Folofolá mo e Niʻihi Kehé
ʻOku hanga ʻe he ʻalu ki he lotú he Sāpaté mo hono maʻu ʻo e sākalamēnití ʻo fakafonu kitautolu ʻaki ʻa e Laumālié ʻi he uiké kotoa. ʻOku tau maʻu ha fakamatala lahi ange meí he folofolá, mo tokoniʻi kitautolu ʻe he ngaahi aʻusia ʻa ʻetau kau faiakó ke mahino lelei ange ʻa e folofolá. ʻI he taimi ʻoku tau ako fakataha ai e folofolá, ʻoku tau lava ʻo maʻu ha ngaahi fakakaukau foʻou mo feakoʻaki.
Antonina B., taʻu 18, Vahefonua Fetulolo Lotolotó, Lūsia
Fili ʻa e ngaahi ʻEkitivitī ke PAOTOLOAKI ʻa e Laumālié
Naʻe ongo ki hoku lotó ʻa e kole ʻa Sīsū ke nofo mo leʻo mo Iá (vakai, Mātiu 26:38) peá ne tākiekina au ki he ʻilo ko e ʻaho Sāpaté ko ha ʻaho ia te tau lava ai ʻo maʻu ʻa e sākalamēnití ko ha fakamanatu ʻo ʻEne ngāué maʻatautolú.
Ko e lahi ange ʻeku fakakaukau ki he meʻá ni, ko e lahi ange ia ʻeku fie ʻilo kiate Iá. ʻOku tokoni ʻa e faʻahinga vilitaki ko ʻení ke u fili ki he ngaahi meʻa ʻoku totonú ʻi he ʻaho ʻoku tauʻatāina mei he ngaahi hohaʻa kotoa pē ʻo e māmaní: ʻa e ʻaho Sāpaté. ʻOku kau ʻi he ngaahi meʻá ni ʻa hono lau mo ako e folofolá, tokoni ki hoku fāmilí, sio he ngaahi faiva langaki moʻuí, vahevahe ʻo e ngaahi ʻilo fakalaumālié mo e kaungāmeʻá, mo e faʻa lotu. Ko e lahi ange ʻa e tafoki hoku lotó kia Sīsuú, ko e lahi ange ia ʻeku ʻilo mo toe ofi ange kiate Iá. ʻOku ʻikai ke u ʻilo ha toe tāpuaki ʻe fakaʻofoʻofa ange ka ko ʻeni.
Sisitā ʻAlekisanitatovina C., taʻu 25, Misiona Lūsia Novosipēkí
Langaki Hake Koe ʻe he Laumālié
Kiate au, ko e ʻaho Sāpaté ko ha faingamālie ke ako lahi ange ki he ongoongolelei ʻo Sīsū Kalaisí. ʻOku ʻikai ha toe veiveiua, ʻoku maʻu ʻe ha tokotaha ʻoku haʻu mateuteu ki he lotú mo holi ke maʻu ʻa e sākalamēnití mo feinga ke akó ʻa e ngaahi tāpuakí pea mo langaki hake ʻe he Laumālié, ʻo ʻikai ʻi he ʻaho Sāpaté pē ka ʻi he toenga ʻo e uiké.
ʻOku lahi ha ngaahi faingamālie ʻi tuʻa ʻo mavahe meí he ngaahi holisi ʻo e falelotú te tau lava ai ʻo tauhi e ʻaho Sāpaté ke māʻoniʻoní: feohi mo e fāmilí, tokoniʻi e kau faifekaú, tokoni ʻi he uōtí, mo hono lau e ngaahi tohi ʻa e Siasí. Ko e ʻaho Sāpaté ko ha taimi ia ke mahino ʻa e ngaahi fono ʻa e ʻOtuá. ʻI he taimi ʻoku fakatokangaʻi ai ʻení mo e fakafetaʻi ki he ʻOtuá ko e faingamālie ko ʻení, he ʻikai ke tau faingatāʻia ʻi hono tauhi e ʻaho Sāpaté ke māʻoniʻoní.
ʻEletā Valatimia ʻĀlekisānitolovisi Z., taʻu 18, Misiona Lūsia Novosipēkí
Ngaahi tā fakatātā ʻa J. Beth Jepson