ʻAve Ia ki Falemahaki!

Gayle Y. Brandvold, Kalefōnia, USA

Ne pehē ʻe ʻĀnita naʻá ne ongoʻi sai pē, ka ne u ʻunu mai mei hono mohengá, tūʻulutui, peá u lotu.

ʻI he taimi ne u kau foʻou ai ki he Siasí, ne teʻeki ke u mali pea ne u ngāue pē maʻaku, ko ia ne ʻi ai ha ngaahi ʻaho ne u ʻataʻatā ai. ʻI he taha ʻo e ngaahi ʻaho ko iá ne u tā ai ki he palesiteni ʻo e Fineʻofá ʻo ʻeke pe ʻoku ʻi ai ha taha ʻokú ne fie maʻu ha tokoni ʻi he hoʻatā ko iá. Naʻá ne talamai ʻoku ʻi ai ha fefine toulekeleka ko hono hingoá ko ʻĀnita (kuo liliu e hingoá) ne toki ʻatā mai pē ki ʻapi mei he falemahakí, pea ʻokú ne taʻelata. Ne u ʻosi feʻiloaki mo ʻĀnita kimuʻa pea ne u fiefia ke u ʻaʻahi ki ai.

Naʻá ku tā ki ai peá u ʻalu leva ki hono ʻapi nofoʻangá. Naʻá ne kole mai ke u ngaohi muʻa ha meʻatokoni hoʻatā maʻana, hili iá ne ma maʻu ha taimi fakaʻofoʻofa ʻaupito. Naʻá ne poto he fakakatá mo manako ke kata mo talanoa fekauʻaki mo ʻene moʻuí.

Hili e maʻu meʻatokoni hoʻataá naʻá ne talamai ʻokú ne helaʻia peá ne kole mai ke u tokoniʻi ia mei hono salioté ki he mohengá. Taimi siʻi pē kuo fakamohemohe ia. Fakafokifā pē kuo lea mai ʻa e kihiʻi leʻo siʻi ne u faʻa fanongo tā tuʻo lahi ʻo kau ki aí: “ʻAve ia ki falemahaki he taimí ni!”

Naʻe fehiʻa ʻa ʻĀnita he falemahakí pea ko ʻene toki foki mai pē ʻeni ki ʻapi. Naʻá ku fehuʻi ange pe ʻokú ne ongoʻi SAI PĒ. Naʻá ne pehē ʻokú ne sai pē ka ʻokú ne ongoʻi helaʻia.

Ne u ʻunu mai mei hono veʻe mohengá ʻo u tūʻulutui hifo. ʻI he taimi naʻe kamata ai ke u lotú, naʻe toe pehē mai ʻa e leʻó, “ʻAve ia ki falemahaki pea ʻave ia he taimí ni pē!”

Naʻá ku kiʻi momou, ʻo u fehuʻi kiate au, “Ko e hā te u talaange ki he toketaá ʻi he falemahakí?”

Naʻá ku telefoni ki haku kaungāmeʻa, naʻe kau mo ia he lotu maí ʻo ne talamai ke u muimui ki he ueʻi ne u maʻú.

Naʻe ʻita ʻa ʻĀnita ʻi heʻeku talaange ʻe ʻave ia ki falemahakí, ka ne u tā pē au ki he meʻalele ʻa e falemahakí. ʻI he taimi ne aʻu mai aí, ne hū ange ha ongo fakahaofi moʻuí ʻo vakaiʻi hono ngaahi fakaʻilonga mahuʻingá. Naʻe ʻikai ke na toe fai ha fehuʻi, naʻá na hiki ia ki ha mohenga teketeké ʻo leleakiʻi fakavave ʻi he meʻalele ʻa e falemahakí.

Naʻá ku muimui atu ʻi heʻeku vēní. Hili ʻeku aʻu atu ki falemahakí, ne u tangutu pē ʻo tatali. Taimi siʻi pē kuo hū mai ha toketā ki tuʻa. Naʻá ne fehuʻi mai, “Naʻá ne tala atu kiate koe naʻe tō kimuʻa peá ke toki ʻalu atu ki hono fale nofoʻangá?”

Ne u tali ange, “ʻIkai.”

Naʻá ne talamai naʻe lavea e ʻatepili ʻo ʻĀnita ʻo fānoa e totó ʻi loto. Naʻá ne pehē, kapau naʻe ʻikai vave e tokoni fakafaitoʻó, mahalo ne ʻosi mālōlō ia.

Ne u ongoʻi ha loto tautea mo ha fiefia—ko e tautea heʻeku toe momoú pea fiefia lahi heʻeku fakafanongo ki he Laumālie Māʻoniʻoní. Ko hono fakakātoá, ne u ongoʻi houngaʻia ʻi heʻeku ʻilo naʻe falala mai ʻa e Tamai Hēvaní kiate au ke u tokoni ki he fefine kafo ko ʻení peá mo e ueʻi fakalaumālie ʻa ʻeku palesiteni Fineʻofá ke ʻave au ki ai.

Talu mei ai mo e hōloa ʻeku tuʻunga moʻui leleí, ka ʻoku kei ueʻi fakalaumālie pē au ʻe he ʻEikí. ʻOku ou lotua maʻu pē ha mālohi ke u muimui ki he ngaahi ueʻi ko iá.