Kakaean te Ibuobuoki
E maeka te tia korokaraki i Utah, USA.
Bon imwiin te nuukaniboong, ma e ataia Tate bwa ana tai n taetae.
“Te Tama are i Karawa, ngkai I tataro, kairai ao ni kawakinai ni katoa boong” (Aia Boki n Anene Ataei, 19).
E wene ni matu taratara Tate inanon te roo, e kataia n aki tang. E tataro ibukin buokana, ma e taraa n ae te nang ae roo ae tinebu e taonna nako, n tuka te Tamnei.
“Tera ngkana I aki mwaninga te tamnei ae buakaka n te TV?” e raraoma.
Tabeua te boong n nako, e a ti a ni moantaai ni katiaa ana bwai n reirei ni mweengana ao ni kamaiua te TV. Ma e aki kantaningaia bwa e na noora te aekaki anne iaon te tikuriin. E rang tounako Tate n te aro are e a mwaninga n tiringa te terewition n te tai ae waekoa n aron ae e bon riai ni karaoia.
Bon te kanganga ae karina. Bon akea ana iango bwa e na mataku n te aekaki n tamnei arei, ma ngkai e aki kona ni mwaninga taekana. N tabetai e rin n ana iango inanon nuukan te reirei, n te taibora n amwarake―n tain naba te taromauri. N aron aekakin taai akanne, e kukurei bwa Tinana ma Tamana a aki kona n ataa ana iango. E reireinaki Tate irouia ana karo bwa e na aki tarai tamneia aomata n akea aia kunnikai. E ataia bwa a kantaningaia naba bwa e na totokoi bwaai ni kamataku n te TV aika kakiriwe, taian tamnei, ao taian takakaro n te witeo.
“Ngkai I ataia bwa bukin tera,” e wirikiriki inanona Tate.
E ruo man ana kainiwene Tate ao ni manga katorobubua riki i aon bubuan waena. Tera ae e kona ni karaoia?
“Te Tama are i Karawa,” e wirikiriki Tate. “Taiaoka buokai ni katoka iangoan te bwai are I nooria.” E kaoa ranin matana are a waanako inanon matana ao ni kakaungo. E bukibuki mwanawana. E taku bwa e namakina te Tamnei ae Raoiroi ni wirikiriki nakoina, ma tiaki te kaeka are e tangiria.
E riai n tuangiia ana karo.
“Bukin tera?” E miimi Tate. E namakinna kanga te ataei ae uarereke n rin inanon aia ruu ana karo n te nuukaniboong. Ao ni kaotia nakoia? E namakina te maama ao n taraa riki n aoraki.
Ngkanne e a kaoti te iango ae itiaki n ana kantaninga: E tangiria te Tama are i Karawa bwa e na kukurei. E tangiria te Tama are i Karawa bwa e na manga namakina riki te Tamnei, n iangoi bwaai aika raoiroi, ao ni kokoaua nakon ana utu. E tangira riki Tate bwa e na riki bwa kaain te Nakoaniboonga n te Aaron ngkana e koro 12 ana ririki inanon tabeua namwakaina. E nooria Tate bwa ngkana e teimatoa n taua te bwai are e nooria ao ni kawakinna, bwa te bwai ae raba, e na tiku n nanokawaki iai.
E ataia Tate bwa e kainnanoa te ibuobuoki—ao te Tamnei ae Raoiroi e bon tuangnga te tabo ae e na kunea iai.
E taraa Tate nambwan te tai are e maiu n te iti are irarikin ana kainiwene. E a kan boo 1:00 n te karangaina. E teirake ao n toua kawain nanon te ruu nakon aia ruu ana karo. N ongan bawarena ma te nako n nano, e karebwerebwe iaon aia mataroa.
“Tinau? Tamau?”
“Tate, ngkoe anne?” e roko bwanaan Tinau ae nimatutu.
“Iai te bwai ae riki?” E titiraki Tamau.
“Eng,” e taku Tate. “Ti kona ni maroro? Ao tao I kona ni karekea te kakabwaia?”
E kamaiua tauran ana kainiwene Tamau ao e kaoa Tate bwa e na rin. N te moan tai inanon boong, Tate e namakina te rau, te kantaninga, ao te ota.
Kamatata iroun Mark Robison