Maiuakinna maNanom Raoi
Iroun Randall L. Ridd
E mwakuri n nakoana ae te kauoman ni kauntira n te beretitentii n te Kairake ni Mwaane man 2013 nakon 2015
Man te taromauri ni kabuta te aonaaba ibukiia kairake n ikawai, “Living with Purpose: The Importance of Real Intent,” are e taekinaki iBrigham Young University–ldaho n Tianuare 11, 2015. Ibukin taekana ae bwanin, naako nakondevotionals.lds.org.
Nano raoi nanona karaoan te bwai ae tamaroa ibukin ae tamaroa.
Tamnei iroun Jupiterimages/Stockbyte/Thinkstock
I reiakina kakaawakin te nano raoi ngke te kairake ngai n te tieminari. Ara tia reirei e kaewenakoira bwa ti na wareka ana Boki Moomon. Ni kawakina rongorongon ara waaki, e karaoa te tiati ma arara rikaaki n te itera teuana ao booki inanon ana Boki Moomon ni bangaki ieta. Ni katoa te tai are ti wareka te boki, e katuka te itoi n arara.
N te moan tai I aki kakorakora au kekeiaki inanon te wareware, ao e aki maan imwaain ae I a kunea bwa I a rangi n tiku ibuki ibuki. Kaungakiu man te namakin ni mamaa ao nanou n tamnei ni kan kaboo, I a moanna ni wareware. Katoa tai are I karekea te itoi, I namakina te raoiroi. Ao mwaitin rakan itoi ake I karekea, e karakaa riki kaungakiu ni wareware—imarenan kiraati, imwiin te reirei, ao inanon mwawan miniti.
Aio e na riki bwa te karaki ae korakora ngkana I kona n tuangko bwa mwiin au kekeiaki I a kabanea ni karekea te moanna inanon te kiraati—ma I aki. Ao anne e na bon Tamaroa ngkana I tuangko bwa I karekea te bwai teuana ae tamaroa riki nakon te moanna—te kakoaua n ana Boki Moomon. Ma anne tiaki ngaia ae e riki. I aki karekea te kakoaua. Tera ae I karekea bon itoi. I karekei itoi ibukina bwa I bon wareware. Ni kaboongana ana taeka Moronaai, anne bon “nanou raoi.”
Moronaai e bon mataata raoi ngke e kabwarabwara bwa ko na kanga ni kunea ngkana ana Boki Moomon e bon koaua: “Ao ngkana a reke bwaai aikai iroumi, kaungai nanomi bwa kam na butiia te Atua, te Tama ae akea Tokina, n aran Kristo, ngkana arona bwa a koaua bwaai aikai; ao ngkana arona bwa kam bubuti ma te nano ae koaua, ma nanomi raoi, ao te onimaki iroun Kristo, e na bon kaota te koaua nakoimi, ni mwaakan te Tamnei ae Raoiroi” (Moronaai 10:4; e kairaki katuruturuana).
Bukina aika Eti
N tanrikaaki, I kona n nooria bwa te Uea e bon raoiroi raoi nakoiu. Bukin tera N na riai ni kantaninga ni karekea te bwai teuana nakon are I bon kakaaea? Nano raoin koaua nanona karaoan te bwai ae tamaroa ibukin ae tamaroa; I bon wareka te boki ae eti n aki eti bukina.
E aki ni karokoa ririki imwiina I a wareka ana Boki Moomon ma te nano raoi. Ngkai I ataia bwa ana Boki Moomon e a kakoroa ana kantaninga ae tabu ni kakoauaan maiun ao ana mwakuri Iesu Kristo ibukina bwa I a tia ni warekia ma te nano raoi.
Te reirei are I reiakinna ibukin te nanoraoi ao ana Boki Moomon e kaineti nakoira ni kabanea aron maiura. N angiin te tai ti irii banna ao katei n akea te bwai ae ti karaoia ake a tia ni karikirakeaki rinanon maiura—ti tii aki taraia raoi maiuakin maiura n aki iangoia raoi bwa terana mwiin ara rinerine akanne. Maiuakinna ma nanom raoi e ikota te taratara ao te kantaninga nakon maiura ao ni kona ni karekea te kaokoro iaon maiuia tabeman. Maiuakinna ma nanom raoi nanona ataakina bwae “bukin tera”—te bwai are e karika ara mwakuri. E taku Socrates, “Te maiu ae e aki tuoaki raoi e aki tau ni maiu.”1 Ai ngaia are iangoia raoi bwa ko na kanga ni kabanea am tai, ao titirakiniko n taainako, “Bukin tera?” Aio e na buokiko ni karikirakea te konabwai n noora are iaon ae ngkai. E rangi n tamaroa te taraa are imwaaim ao n titirakiniko, “Bukin tera N na karaoa anne?” nakon are ko na tanrikaaki ao n taku, “Bukin tera, o, bukin tera I karaoa anne?”
Te tamnei ni kamataatairoun Sergey Nivens/iStock/Thinkstock
Tera Ae Tangiria te Uea bwa Ko na Karaoia?
Ngke te kairake ni mwaane ngai, I a tia ni baireia bwa N na aki nako ni mitinare. Imwiin teuana te ririki n te kuura ao teuana te ririki n te aami, I a karekea te mwakuri ae tamaroa n te onaorakin ara tabo bwa te tekinitian n te X-ray. Te maiu ae taraa n nakoraoi, ao te mwakuri ni mitinare e taraa n aki kainnanoaki.
Te boong teuana, Dr. James Pingree, te tia korokoro n te onaoraki, e kaoai bwa ti na katawanou. Inanon ara tai ni maroro, e kunea bwa akea au babaire bwa N na nako ni mitinare, ao e titiraki bukin tera. I tuanga bwa I a ikawai riki ao e a bon rangi n rimwi. E tuangai bwa tiaki bukina ae tamaroa, ao n taku e a tia n nako ni karaoa ana mwakuri ni mitinare imwiin banen ana reirei n te reirei n te bwainaoraki. Imwiina e kaota ana kakoaua ni kakaawakin ana mwakuri ni mitinare.
Ana kakoaua iai mwiina ae kakaawaki iaou. E karaoai bwa N na tataro n aron are I tuai n tataro mai imwaaina—ma te nano raoi. I kona n iangoi bukina aika bati bwa N na aki nako ni mitinare: I bon maama. Iai au mwakuri ae I tangiria. Iai te mwane ae na tauraoi ibukin ana reireiare e na aki reke imwiin ana mwakuri ni mitinare. Te kabanea ni kakaawaki, Iai raou te aine ae e tataningaai ngke I mena n te aami, ao I ataia bwa e na aki ko na tataninga uoua riki te ririki! I tataro ni karekea te kamatoaaki bwa bukin aki kan mwanangau ni mitinare a na kamanenaaki ao bwa I bon eti.
Nakon aki kukureiu, I aki kona ni karekea te taeka ae bebete ae eng ke tiaki te kaeka are I kantaningaia. Ngkanne te iango e roko irou: “Tera ae tangiria te Uea bwa ko na karaoia?” I riai ni kakaaitau bwa E tangirai ni karaoa te mwakuri ni mitinare, ao aio are e a riki bwa te tai are au babaire e na korakora ana mwakuri inanon maiu. N na nako ni karaoa te bwai are I tangiria ni karaoia, ke N na nako ni karaoa ana kantaninga te Uea? Anne bon te titiraki are ti na bane ni karaoia raoi n titirakiniira ibon iroura n taainako.
Ni kakaaitau, I rineia ni karaoa au mwakuri ni mitinare ao ni kanakoaki ni mwakuri n te Mexico North Mission.
Mwiina ae Akea Tokina
Tenibwi ma nimaua te ririki imwiina, natiu te mwaane e kaungaai ni kawara Mexico ma ngaia. Ti kantaningaia ni kuneia tabeman aomata ake I a tia n reireiniia. Ti iira te bootaki n toa inanon te taun ae uarereke are I moana iai au mwakuri ni mitinare, ma akea temanna ae I kinaa. Imwiin te bootaki, ti taetae ma temanna te membwa ao n titirakinna ngkana e ataia araia aomata ake iaon au riti ake I a tia n reiakiniia n ririki aika nako. Ti rinanon te riti n akea te tokanikai, ni karokoa te kabanea n ara: Leonor Lopez de Enriquez.
“O, eng,” e taetae te mwaane. “Te utu aio e mena te uoote teuana, ma a ira te taromauri n te kateitei aio. Aia bootaki n toa are imwiina.”
Ti aki maan tataninga imwaain ae Leonor e roko n rinnako n te kateitei. E ngae ngke e a roko ngkai n ana nuuka n 70, I waekoa ni kinaa, ao e kinaai. Ti tibwaua te irabwati ae maan, ti irabati ao n tang n kukurei.
“Ti a tia n tataro ibukin 35 te ririki bwa ko na oki bwa ti aonga ni karabwako ibukin karokoan te euangkerio nakon ara utu,” e taku.
Ngke a roko kaain ana utu ake tabeman n rinnako n te kaiteitei, ti tibwaua te irabwati ao te rannimata. N aki maan ti kunea bwa te bitiobi n te uoote aio temanna mai buakoia natin Leonor te mwaane, te tia kaira te anene bon tibuna te aine, te tia aokan tibuna te mwaane, ao ai aroia naba kairake ni mwaane n te Nakoaniboonga ae te Aaron aika bati. Temanna natina te aine e mareaki ma te kauntira n te titeiki beretitentii. Natina temanna te aine e mareaki nakon te bitiobi n te uoote are e rarikiia. Angiin natin Leonor a tia ni karaoa aia mwakuri ni mitinare, ao ngkai tiibu a tia naba ni karaoi aia mwakuri ni mitinare.
Ti ongo bwa Leonor bon te mitinare ae tamaroa riki nakoiu. N te boong aio natina a kakaitau n uringa ana kekeiaki ae korakora n reireiniia te euangkerio. E reireiniia bwa babaire aika uarereke, inanon te tai ae maan, e na riki bwa te maiu ae onrake, tamaroa, ao kakukurei, ao a tia n reirei bwaai aikanne nakoia tabeman. N tokina, e raka iaon 500 te aomata aika a tia ni kaaina te Ekaretia ibukin teuana te utu ae tamaroa aio.
Ao e kona ni kataneaki rikaaki nakon te maroro n te katawanou. I aki toki n iangoia bwa Dr. Pingree e a tia n rangi ni katurua ana taratara iaon ana mwakuri ke bwain te aonaaba ake tabeua, e na kona n aki titirakinai bwa bukin tera I aki karaoa au mwakuri ni mitinare. Ma ana taratara e katurua iaoia tabeman ao iaon reitakin ana mwakuri te Uea. E unika te koraa are e tia n ikawai rake, e kariki uaana, ao n reitinako ni waekoa ni karawata uaana (taraa Mareko 4:20). Au mwakuri ni mitinare e reireinai te bwai ae e na riki ae akea tokina man te babaire ae teuana ni karaoa ana kantaninga te Uea.
Uringa Am Kantaninga are Akea Tokina
I aki toki n tanrikaaki iaon maiu ao ni miiakinna bukin tera e rangi ni kangaanga ibukiu bwa N na karaoa au babaire n nako ni mitinare. Ebon matoatoa ibukina Au iango e kabwakeaki; I mwaninga taekan au kantaninga ae akea tokina—oin bukina bwa bukin tera ti mena ikai.
Nanou ma au kantaninga a aki katiteuanaaki ma ana kantaninga te Uea; bwa e aonga, n ae te babaire e na rangi ni bebete riki. Ao bukin tera a aki katiteuanaaki? I nako n taromauri ao ni kana te toa n te Taabati, ma I aki katurua taraan nanona. I tataro, man angiin te tai I aki iangoa te bwai are karaoaki. I wareki booki aika tabu ma tii n tabetai ao n akea te nano ni koaua iai.
I kaungai bwa kam na maiuakina te maiu are kam ataa ami rinerine ao ami babaire n taraia raoi—e ngae ngkana ko tuai ni kakaraoia n taai aika nako. Tai kabwara nanom man iango are ko a tia ni karaoia ke ko tuai. Kariaia te Tia Kamaiu ni kaitiakiko. Uringa tera are E a tia n taekinna: “Ma ngkana aki toki n rairinanoia man ukoukora kabwaraan aia bure, ma nanoia ni koaua, a bon kabwaraaki aia bure” (Moronaai 6:8; katuruturuana e kairaki).
Moanna Ngkai Maiuakina te maiu n nanoraoi, n ataia bukin tera ko karaoi bwaai are ko karaoia ao e na kairiko nakea. Ngkana ko karaoi bwaai aikai, ko na kunea bwa te kabanea ni kakaawaki “bukin tera” ibukin bwaai ni kabane ake ko karaoi bon tangiran te Uea ao ni kinaa Ana tangira ae kororaoi ibukim. Ko bia kunea te kimwareirei ae korakora inanon am kakae ibukin te kororaoi ao n ataia ao ni karaoa Ana kantaninga.