Te Rongorongo man te Moan Beretitentii
Kabane ma Am Tooti ae Teimatoa n Ura
Iroun Beretitenti Dieter F. Uchtdorf
Kauoman ni Kauntira n te Moan Beretitentii
Tamnei iroun Comstock/Stockbyte/Thinkstock
N rongorongon ngkoa Greece, taan kabobiri mwaaka a kaboo n te uakai ae aranaki bwa lampadedromia.1 N te kaboo, a tau aia tooti taan biri ni baia ao n angan te tia biri are imwiina ni karokoa ae roko te kabanea n tia biri n te tia.
E aki anganaki te tiim ae te kabanea ni birimwaaka te kaniwanga—e anganaki te tiim ae moan roko n te tia ma ana tooti ae teimatoa n ura.
Iai te reirei ae nano ikai, teuana ae reiakinaki irouia burabeti n taai akekei ao ngkai: ngkai e kakawaki bwa e moanaki te kabo, e kakawaki riki bwa ti na roko n te tia ma ara tooti ae teimatoa n ura.
Toromon e Waaki ni Korakora
Te Uea Toromon ae korakora bon ngaia te katoto iroun temanna ae waaki ma te korakora. Ngke e kairake, e “tangira te Uea, n toutou mwin ana tua nako Tawita are tamana” (1 Uea 3:3). E kukurei te Atua irouna ao e taku, “Ko na butiai ae N na anganiko” (1 Uea 3:5).
Irarikin te bubuti ibukin kaubwai ke te maiu ae maan, e titiraki Toromon ibukin “te nano ae ataibwai ba e na motiki taekaia am aomata, ba I aonga n ataa ae raoiroi ma ae buakaka” (1 Uea 3:9).
Aio are e rangin ni kakakureia te Uea are E kakabwaia Toromon tiaki n tii te ataibwai ma te kaubwai ae korakora ao te maiu ae maan.
E ngae ngke Toromon e rangin ni wanawana ao ni karaoi bwaai aika kakawaki aika mwaiti, e aki toki korakorana. Te kananokawaki, imwiina inanon maiuna, “Ao e karaoa ae buakaka i matan Iehova Toromon, ao e aki kabanea nanona n ira Iehova” (1 Uea 11:6).
Kabanean Oin Ara Kabobiri
Mwaitira ae ti a tia ni moana karaoan te bwai teuana ao e aki tia? Taubangin karara? Burokuraem ni kamarurung? Katabeara ni warekii booki aika tabu ni katoaboong? Babaire n riki bwa ana reirei Iesu Kristo aika tamaroa riki?
Manra ae ti karaoi ara babaire inanon Tianuare ao ni karaoi ma te nano ae korakora ibukin tabeua te boong, tabeua te wiiki, ke inanon tabeua te namwakaina n ti kakaea anne n Okitobwa, nanora ni kakoroi katabeara a tia ni mamaara ao n akea?
N te boong teuana I noora tamnein te kamea ae moan te kamanga ni wene irarikin te mwakoro ni beeba ae e a tia n raeraeia. E taekinaki iaon te mwakoro ni beeba, “Ana Beeba ni Bwaati te Kamea-Kataneiai n te Ongotaeka.”
Ti riki n aekan anne n tabetai.
Iai nanora aika tamaroa; ti moa ni waaki n ae korakora; ti tangiria n riki nakon kabanean tamaroara. Ma n tokina ti katikui karaon ara iango n rukurukumaki, n aki boongana, ao ni mwanuokinaki.
Bon anuan te aomata bwa e na kairua, bwaka, ao n tabetai n tangiria ni kerikaaki man te kabobiri. Ma ngkai ngaira ana reirei Iesu Kristo, ti a tia ni berita n aki ti moana te kabo ma ni kabanea naba—ao ni kabanea ma ara tooti ae teimatoa n ura mwaak. Te Tia Kamaiu e berita nakoia Ana reirei, “Ma ane e nanomwaaka ni karokoa te toki, ao e na kamaiuaki” (Mataio 24:13).
N na manga taekina te bwai ae e beritanna te Tia Kamaiu n ara boong: Ngkana ti kawakin Ana tua ao n toki ma ara tooti ae teimatoa n ura, ti na karekea te maiu ae akea tokina, are bon te bwaintituaraoi ae te kabanea ni korakora ibuakon ana tua nako te Atua (taraa D&C 14:7; taraa naba 2 Nibwaai 31:20).
Te Ota Ae Aki Kona ni Mate
N tabetai imwiin kairuara, te konaaki, ke e riki te bwarannano, ti karekea te kerikaaki n nano ao ni kakoaua bwa e a mate ara oota ao ara kabobiri e bua. Ma I kakoaua bwa e aki kona ni katokaki Ootan Kristo. E mena ikekei ibukira n ara tai aika rangin ni kangaanga ao e na buokira ni manga karekei nanora ao katabeakira aika korakora ti ngkana ti rairi nanora nako Ina (taraa 1 Uea 8:58).
E aki kangai bwa n ningai ke manra bwakara, Ootan Kristo e teimatoa ni korakora. Ao riki n ara tai n rawawata ae korakora, ngkana ti kekeiaki n Iria, Otana e na tokanikai iaon te rawawata ao n angan tamneira te korakora.
E kabotauaki ma maiuakinan te maiu kanga maiuia ana reirei Kristo nakon te biri n te kabo. Ao e karika te kaokoro teutana bwa aekara aron waekoan rikirakera. Ni koauana, ti te kawai ae ti kona iai ni konaaki n te kabobiri ti man te taenikai (nakon te kaririaki) ke te bwarannano.
Ni karokoa ae ti teimaota ni karikirakea ara kekeiaki ao n nakon ara Tia Kamaiu, ti na tokanikai (ni maiuakina te euangkerio) ao ni karekea te kaniwanga (are iai iroun te Uea ibukira).
Ibukina bwa ara kekeiaki ni maiuakina te euangkerio tiaki taekara ke taekan te bwai ae ti karaoia.
Bon taekan te Tia Kamaiua te aonaaba.
Ao anne te Oota ae aki kona ni kerikaaki urana. Bon te Oota are e tokanikai iaon te roo, katoki ikuakira n (tamnei), ao e korakora riki n tain te nanokawaki ae moan te korakora ao rawawatan te iango.
Bon te Oota are e aki konaki n ataaki.
I tataro bwa ngaira n tatabemanira ti na reitia ni maiuia ana reirei are ti a tia ni wakinna. Ao ma ana ibuobuoki ara Tia Kamaiu ao te Tia Kabooira, Iesu Kristo, ti na toki ma te kimwareirei ao ma ara tooti aika a teimatoa n ura.