Titita Spafford E Taetae Nakoiu

Sandy Howson, Ohio, USA

I takakaro n te keim n te aonrain retituaraonti ni bwakanakon te tairiki teuana ma kainabau ae nakonako irariku ao e katanoata bwa e nang nako ni matu.

“N na rin naba n te tai ae waekoa,” I tuangnga.

“N na onimakinna ngkana I noria,” e taku.

I takakaroa te keim ike I kukan amwarake inanon te retituaraonti aika tamaroa ibukia katitamwa aika tamaroa. I taraa ana tikuriin te kaombiuta ao n taku, “Ni koauana, iai kanau ae na tauraoi inanon 15 te miniti.”

Ni kitana te tai ngke I tabe n tataninga, I kuneia Daughters in My Kingdom: The History and Work of Relief Society, are e a tia n toka iaon te taibora man te tai are I karekea inanon te Bootaki n Aine. I moanna ni wareka te moan ni kabwarabwara. N te kateniua n iteraniba I kunei bwaai aikai iroun Belle S. Spafford, te karuaman ni beretitenti ni kabuta n te Bootaki n Aine.

“Te nuka ni ware ibukiia aine n te boong aei, I kakoaua,” e koroia, “bwa e na karaoa ae raoiroi n rinanoi bwaai aika tatangiri, e rinanoi waaki ni kakukurei aika a irekereke ma ngaai, ao ngkanne e karaoi mwakuri ni kakabetea ni maiuna, ni karinani bwaai aika kakaawaki moa, n te tabo are e korakora riki iai kaniwanga ao n rangin kekeiaki, ao n nakon waaki ni kakukurei aika aki rangin ni kakawaki” (2011, xiii).

Irarikin booki aika tabu, akea te bwai ae I a tia ni warekia ae riingai n ae korakora. Te aine aei ae mate e raka iaon 30 te ririki n nako e taetae nakoiu. Ana taeka a taraa n ae a kakaawaki riki n te boong aei nakon are ngke e taekin nakoia.

I ataia n te tai ae waekoa ae N na aki manga takakaro iaon te rain riki. I tiringa te kaombiuta, nako ni matu, ao n tuanga kain abau au iango. Te boong are imwiina I aki kamaeua te kaombiuta. Irarikina, I kakaea bwa iraua te aoa ae I a tia ni bakataeia iaon keim aikanne ni katoaboong.

I kamwaita teniua te aoa ma 365 (boong n te ririki) ao ni karinaki ma 24 (te aoa n te boongina). I mimi n reiakinna ae I a tia ni bakataea 45.62 te boong ki katoa ririki. Aoa ao boong aika kakaawaki aikanne a nako taia n aki toki. I kona n tia ni kaboonganai ni wareki booki aika tabu, ni kabanea au tai ma kainabau ao natiu, ni beku ibukiia tabeman, ke ni kakorakora au mwakuri.

Aki toki Mataniwi ni Kabuta n taekin bwaai aikai n tain te maungatabu ni kabuta. E ngae n anne ao I aki kona n oota n aia rongorongo, ao I taku bwa e aki kaineti nakoiu.

I kakaitau bwa e buokai te Tamnei ae Raoiroi ni kaotaai bwa Mataniwi ni Kabuta—ao Belle S. Spafford—a taetae nakoiu.