Titiraki & Kaekaaia
“Ngke e aoraki tinau, ti tataro ao ti aki mamatam ibukina, ma irarikin anne e a boni mate. N na kanga ni karaoa anne ma te rau?”
Aei bon te tai ae kananokawaki inanon maiu. E tataneiai te aba n tangira te kakoaua ao te kaeka nakon am titiraki aika mwaiti: “Bukin tera ngkai e aki maiu? I kona ni manga nooria? N na kanga n teimatoa ni maiu n akea ngaia?”
Ana euangkerio Iesu Kristo e nga te karaunano ao taian kaeka. E berita te Uea, “A na kakabwaiaki ni kabane akana a nanokawaki, bwa a na kabebeteaki nanoia” (3 Nibwaai 12:4). Ukoukora te Tamnei ae Raoiroi, bwa boni Ngaia te Tia Ibuobuoki.
Ko miimi ngkana a kaekaaki am tataro. Ko Kona ni Kakoaua: te Tama are i Karawa n taainako e kaekai ara tataro. Booki aika tabu ao burabeti aika maiu a berita nakoira bwa a boni koaua. Te bwai are e taekinna te Uea e kaineti nakoimi naba: “Ami tataro ao aia tataro tarim a roko i taningau” (D&C 90:1). Ma ti riai n uringnga bwa te Tama are i Karawa e kaekai ara tataro ma te taratara ae akea tokina n te nano (taraa Itaia 55:8–9). Anne bukina ae ti iriira iai ana katooto te Tia Kamaiu ni bubuti ibukin taian kakabwaia ma ngkanne ni bubuti ma nanora ibukin ana kantaninga te Tama bwa e na karaoaki (taraa Ruka 22:42).
E ngae n anne e boni matoatoa, te kakatai aei e kona n riki bwa karikirakeam. Ko kona n reiakina karekean am onimaki n ana kantaninga te Atua, e ngae ngke e aki marurung tinam. E koaua ko tangiria bwa e na maiu. Ma te kakatai n te maiu ae mamate aei bon onimakinan te Atua n taai nako―ai moararariki ngkana e matoatoa. Ngkana ko onimakinna, a na bane n nakoraoi bwaai ni kabane ibukim (taraa D&C 90:24).
Te Mate bon Mwakoron te Babaire
Ni kaineti ma ana babaire ni kakukurei Tamara are i Karawa ibukira, okira nakon Mweengana e boboto iaon te mate ao te mangauti, are e na buokiira ni bitaki man te maiu ae mamate aei nakon te maiu are aki mamate. Ko riai n tii butimwaea te koaua are te mate boni mwakoron te babaire ao ni kakoaua bwa n te boong teuana ko na boni kona ni manga kaitibo ma tinam. Ataia bwa tinam e bon mena n te aonaaba n tamnei ao e bon tataningaiko.
David M., ana ririki 18, Western Kasai, Tautaeka Ribwabiriki mai Congo
E mena n te Aonaaba n Tamnei
E kuneaki tinau bwa e kaentia imwiin tuoana uoua te ririki n nako. I aki tangiria bwa N na nooria ni maraki, ao au kantaninga bwa e na iai te bwai ae N na kona ni karaoia. Ao e ngae ngke e a marurung tinau, bon te namakin ae kanganga. Tinam e mena n te tabo ike e na aki namakina te maraki ke te korakai iai. E boni matoatoa aki manga noorana, ma ko aki maroaa. E tangiriko n taainako, ao Tamara are i Karawa e na mena ikekei n taainako ni boutokaiko ngkana ko rawawata. Ko na bon aki mwanuokinaki E rinanon te maraki Iesu Kristo ibukin te aonaaba; E ataa aron am namakin ao te bwai are ko rinanona. Karaoa are I karaoia n au tai ni kataaki: Nakoina ao E na kabebetea uotam.
Shiloh W., ana ririki 18, Chihuahua, Mexico
Ana Manga Ikotaki Am Utu
E mate tinau ngke ai tibwa 12 au ririki ni maiu. N te tai anne I tuai kaaina te Ekaretia. Ngke e aoraki, I kabatiaa te tataro bwa e na marurung tinau. E rang korakora au onimaki, ao I onimakina te Atua n te kantaninga are e na manga oki marurungina. Te kananokawaki bwa e aki marurung. I titiraki bwa bukin tera e mate n au ririki n ataei ao ni kitanai ngkai te kairake ngai. I bon un ao I a roko n te iango ike I nanououa bwa iai te Atua. Ngkai Ngai kaain te Ekaretia, I ota n te babaire ni kamaiu. I ataia bwa e tatanigai ao ara utu a na manga bon ikotaki.
Inaê L., ana ririki 19, Minas Gerais, Brazil
Kakatai A Reireiniira
Tinau e mate teniua te ririki n nako. Am reitaki ma Tamam are i Karawa ao te Tia Kamaiu e na rikirake ngkana ko taraiia n am tai ni kainnano. Ko na kunea bwa te kakatai aei, e aki karaunano n aron taraakina, e kona n riki bwa te kakabwaia. Tataro nakon Tamam are i Karawa ibukin te rau ao te raunnano. Onimakina ana babaire te Uea ibukim. Butimwaea bwa te Tama are i Karawa e ataia bwa ti na nakea ao tera ae ti kainnanoia n roko ikekei. E tangiriko te Uea ao n tangiria bwa ko na karekea te kukurei. Kataakira iai nanoia ibukin reireiara ao ni kakorakoraira riki.
Meghan B., ana ririki 18, Ontario, Canada
Ko na Manga Nooria
Tinan tinau e mate ngke 17 ana ririki tinau. A karaoa aia aki mamatam te utu ao a tataro ibukina inanon tabeua te wiiki imwaain matena E anganaki naba te kakabwaia man te nakoaniboonga. Te bwai raoi are e anga te rau nakon tinau bon ataakina bwa e kona ni manga noora tinana n te maiu are imwiina. Ana kouru tinau bwa e na maiuakina ae raoiroi bwa e aonga n tau ibukin te kakabwaia anne. I nanokawaki bwa N na bona aki kona ni kaitibo ma ngaia n te maiu aei, ma I kakantaninga te tai are ti na manga kaitibo iai n te kabane.
Cari R., ana ririki 15, Utah, USA