Kairake n Ataeinimwaane Aika Kamiimi ao Kairake n Ataeinaine ni Booki aika Tabu
Te tia korokaraki, ae te tia reirei n te tieminari, e maeka i Tiaman ao e mate n 2012.
Ko kona n reiakinaki man ao n irii aia katooto kairake aika mwaiti aika raoiroi ake a kawakinaki rongorongoia ni booki aika tabu.
Kamatata iroun Andrew Bosley
Te Uea e tangiriia kairake n te Ekaretia. E korakora onimakinami irouna. Ni katoa tai, e a tia te Uea ni kaungaia kairake n ataeinimwaane ma ataeinaine aika kakaonimaki ni kairiia ao ni kakabwaiaiia Ana aomata. E kainnanoa aia kakau iango, ninikoriaia, ao rikia. E bon riiriki n taainako ao e na teimatoa n riki.
Angiin aia katooto taian boto aika kairake kanga bon te botoniango ae kona ni kuneaki rinanon booki aika tabu. E ngae ngke a maeka n taai ake ngkoa, ko kona n irii aia katooto ao rongorongon maiuia. Iai aia kanganga n aia utu, a maeka n ibuakoia aomata aika aki raoiroi, a kaitara ma “taian Koria,” ma ninikoriaia, ongotaekaia, ao aia onimaki iroun Iesu Kristo a buokiia n tokanikai iaon aia kanganga―n ai aron anua a kona ni buokiko naba.
Aberaam
Ana kekeiaki Aberaam, ninikoriana, ao nanona n tabeka bwanaana ni kaitara te buakaka e boni kamiimi―n aron ae e a kamiimi riki n iangoakina bwa tamana e taromauri boua n anti. Ngke e kairake, e tei ni matoatoa ibukin te raoiroi bwa e kuri n tiringaki bwa te karea. Taraa Abraham 1:2–7.
Iotebwa mai Aikubita
Bon 17 ana ririki ni maiu ngke e kaboonakoaki irouia tarina bwa te toro, ma ana kakabwaia te Uea, e a kona n anga ae e raoiroi man te kanganga aei are e rinanona. E aki konaaki, ibukina bwa e aki bwara nanona. E reitinako Ana onimaki iroun te Uea. Nanon Iotebwa ae korakora e kaotia i bon irouna n te anga ae kakannanto ni kabwarai buren mwakuri aika buakaka ake a karaoaki nakoina. (Taraa Karikani Bwaai 37; 45.)
Tawita
Ngke te kairake Tawita ao bon te tia kawakin tiibu ngaia, ao e un ma te bea ao te raian bwa e kamanoia ana tiibu tamana. Onimakinana i bon irouna e aki reke man ana konabwai ngkai te tia kawakin tiibu, e roko man ana onimaki iroun te Tama are i Karawa, are e kaota boona n un ma Koria. (Taraa 1 Tamuera 17:32–54.)
Etita
Iai ana kekeiaki n anga maiuna inanon te kanganga bwa e aonga ni kamauia ana aomata. Tiaki n tamaroan Etita ma anuan maiuna n tamnei are e a karikia bwa te aomata ae kakannato. (Taraa Etita 4–5.)
Taniera
Kamatata iroun Andrew Bosley
E ongotaeka n ana tua te Uea iaon te marurung n aki tabe ma aomata ake irarikina ake a bon aki karaoia. E tataro, e ngae ngke te tataro nakon te Tama are i Karawa e kaitara ana tua te uea. Ni kaineti ma raoiroina ao tatauraoina nakon ana kairi te Tamnei, e a kakabwaiaki Taniera iroun te Uea ma te bwaintangira n raira nanon te mii ao te kaotioti. E karekea te mwaaka ao te rabakau mairoun Tamana are i Karawa n ae rangin mwaiti are n taai ni kanganga, e kona ni wetea mwaakan karawa. (Taraa Taniera 1; 6.)
Nibwaai
Nibwaai bon te katoto ae kamiimi ngke e taku, “N na karaoi baike e a tia n tua te Uea” (1 Nibwaai 3:7). Iai te ninikoria irouna ni karaoa te bwai are e butiaki bwa e na karaoia. E maeka n te mweenga ae kamweengaraoi? E aki, e maeka n te rereua inanon ririki aika mwaiti. A nakoraoi bwaai ibukina? A aki, angin te tai a un tarina ao n tabetai a kataia n tiringnga. Rinanon bwaai akanne ni kabane, e ongoeaba n ana tua te Uea.
Ua Ngaa Kairake aika Amonaite
Ataeinimwaane aikai a ikawairake irouia kaaro aika kakaonimaki, ao a kakabwaiaaki n onimakinan aia taeka tinaia. A reiakinna ni kakauongo ao n ongeaba n irii raoi nanon kaetieti, ao n aia buaka aki nanououa bwa Tamaia are i Karawa e na kawakiniia. (Taraa Aramwa 56:45–48.)
Moomon
Ngke 15 ana ririki, e kawaria te Uea ibukina bwa e nanorinano, itiaki, aki bareka, e ngae ngke e korakora buakakaia aomata ake irarikina. N ana ririki naba ae 15, e a riki Moomon bwa te tia kairiiri n te tanganibuaka. Imwiina e onimakinaki ma kawakinan booki aika tabu. (Taraa Moomon 1–2.)
Iotebwa Timiti
N ana ririki 14 e ukoukori booki aika tabu ao n tataro ni kan ataia bwa e nga te aro ae e na kaainna. E weteia te Uea bwa e na kaoka ana euangkerio ana Ekaretia Iesu Kristo. Iotebwa e katabua maiuna ae bwanin ni kakoroa nanon te mwiokoaki anne, n aki ongei bwaai aika a tutuki ao kanganga. N ana ririki ae 17 e kawaraki iroun te anera Moronaai, are e kaota nakoina bwaatua aika koora. E ngae ngke n ana ririki ni kairake, Iotebwa Timiti bon te tia reirei ae mwaaka ao te katooto ae kakannato nakoia naake irarikina. (Taraa Joseph Smith―History 1.)
Am Boong
Kam karekei aia boong kairake n ataeinimwaane ao ataeinaine aika kamiimi ake ngkoa? Tiaki! Te anera Moronaai e tuanga Iotebwa Timiti bwa ana taetae ni burabeti Ioera e nang koro bukina:
“Ngai [te Uea] N na urakina tamneiu nakoia aomata ni kabane; ao natimi mwaane, ao natimi aine a na taetae ni burabetiaki, ami mwaane aika kara a na miia taian mii, am ataeinimwaaane a na noori mii ni burabeti:
“Ao iaoia tooro ao iaoia taan touaiti inanon boong akekei N na urakina tamneiu” (Ioera 2:28–29; taraa Joseph Smith—History 1:41).