Rongorongo ni Kakawari n Reirei
Katein Iesu Kristo Mairoun te Atua: E Kaonaki n te Akoi ao te Tangira
Tataromwaaka ni kamatebwaia te bwai n reirei aei ao ukoukoria ni kan ataia bwa tera ae ko na tibwauaia. E na kanga atakin katein te Tia Kamaiu mairoun te Atua ni kakorakora am onimaki Irouna ao ni kakabwaiaia naake ko tararuaia rinanon te kakawari n reirei? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Aia Kairoro Aine Aika Raoiroi, iroun Julie Rogers
Te Kairi nakon Booki aika tabu e kabwarabwara te tangira ae kororaoi bwa “te kabanea n rietata, te kabanea ni kakanato, te kabanea ni korakora n tangira” (“Te Tangira ae Kororaoi”). Bon ana tangira Iesu Kristo ae itiaki. Ngkana ti reirei aron Iesu Kristo ao ni kekeiaki n riki n ai Arona, ti na moanna n namakina Ana tangira ae itiaki inanon maiura ao ni waekoa n tangiria ao ni beku ibukiia tabeman n aron ae E na karaoia. “Te tangira ae itiaki bon karekean te taotaonaki n nano ma temanna ae a tia ni uotiira rikaaki,” e taku Beretitenti Thomas S. Monson. “E totokoa aron reken te nano ni kakai un. Bon butimwaean taian mamaara ao kabwakaia aika uarereke. Bon butimwaeaia aomata n aroia ae ngkai. Bon te taratara are riaon tarakia n rabwata nakon katei aika a na aki kauarerekea rinanon te tai. Bon totokoan karaoan te bwai n aki iango moa ni kaokoroia tabeman.”1
N Ana Boki Moomon, ti reiakina te koaua ae tamaroa ae ti na “tataro nakon te Tama ma korakoran nanora ni kabane, bwa [ti] na kaonaki n te tangira aio, are e a tia ni katokaa iaoia ni kabane ake taan iriira Natina, are Iesu Kristo ni koaua; bwa [ti] aonga n riki bwa natin te Atua mwaane [ao aine]; are ngkana e kaoti ti na riki n arona, bwa ti na nooria n arona ngkai; bwa ti aonga ni karekea te kantaninga aio; bwa ti aonga ni kaitiakaki n arona ae e itiaki” (Moronaai 7:48).
Rakan riki Booki aika Tabu
Ioane 13:34–35; 1 I-Korinto 13:1–13; 1 Nibwaai 11:21–23; Ita 12:33–34
Man Ara Rongorongo ni Kawai
“Te aine ae tibwa mate buuna e rangin ni kakaitau ibukiia taan reirei n te mweenga ake a tang ma ngaia ao a karaua nanona. E koroia: ‘I rangin ni kainnanoa temanna ae n na kona ni kawaria ibukin te ibuobuoki; temanna ae na kakauongo nakoiu. … Ao a kakauongo ana tia reirei ni kakawari. A karaua nanou. A tang ma ngai. Ao a rabwatai … [ao] e buokai n te rawawata ae korakora ao te nanokawaki inanon moan namwakaina aikanne n nanokawaki.’
“Temanna riki te aine ae e kabwarabwara ana namakin ngke ngaia te tia karekea te tangira ae koaua mairoun te tia kakawari n te mweenga: ‘I ataia bwa I raka riki nakon ae ti kawaran temanna bwa e aonga ni karekea te nambwa ae tamaroa n te kakawari n te mweenga. I ataia bwa e tabe ibukiu.’”2
N aroia aine aikai, a mwaiti Aika Itiaki ni Boong Aika Kaitira ni kabuta te aonaaba aika a kona ni kakoaua nakon koauan te rongorongo aei mairoun Beretitenti Boyd K. Packer (1924–2015), te Beretitenti n aia Kooram n te Tengaun ma Uoman Abotoro: “E rangin ni kamweraoi atakina bwa akea te kanganga ngkana [e na nakea te utu], ana riki bwa kaain ana utu te Ekaretia. Man te tai are a roko iai, te bumwane ao te tama a na riki bwa kaain te kooram n te nakoaniboonga ao te buaine ao te tina a riki bwa kaain te Bootaki n Aine.”3