Te Tiketi ni Bwaakena te Kaa

Iroun Nei Fátima Rocha Gutiérrez

E maeka te tia korokaraki i Baja California, Mexico.

illustration of girl walking toward her car.

I nako n tamnei ma tabeman raoraou man te aro. Ngke ti a roko n te kateitei ae bubura ma taabo ni boobwai inanona, ti anganaki te tiketi ibukin ara tabo ni bwaakena ara kaa. Imwiin motin te tamnei, ti a kunea bwa e a bua ara tiketi ni bwaakena ara kaa. N te moan ti iangoia bwa tao ti na tii kabooa te tiketi, ma akea mairoura ae iai ana mwane ae 180 te pesos ae ti kainnanoia ibukin boon te tuaa.

Tokin aki kabwakaan boon ara tabo ni bwaakena ara kaa e na bae n tiku te kaa n te tabo ni boobwai bwa e na karenakoaki, are e a taraa riki ni boobuaka. A taonaki n te raraoma raoraou, ai moararariki are e kabuta te kaa ngkai bon ana kaa tamana. I kararoaai teutana bwa N na tataro. I butiia Tamara are i Karawa ma au onimaki ao au nanorinano ni katauraoa te kawai n taobarai ara kanganga ao n okira mweengara ma te kamanoaki. I bon aki kona ni mwaninga te bwai are e riki tabeua te teekan imwiin motin au tataro.

Ngke I nakonako n oki nakon te kaa, temanna te aomata ae wewetea arau mai ibukiu. Bon te mwaane ae Francisco, raoraou man te reirei n te kauarinan. E titiraki bwa terana ae I karaoia, ao I tuangnga te bwai are e riki. N akean te nanokokoraki, e buuta ana bwauti ni mwane ao e anganai te mwane ae e bon tau ibukin kabooan mwiin te tiketi are e bua. Te mwakuri n akoi aei bon kaekaan au bubuti ae tawe mairoun te Tama are i Karawa.

E bae n aki ataia Francisco bwa mwaitira aron ana ibuobuoki, ma I ataia bwa I riai ni kakaitau inanon boongin maiu.

N tabetai kawai ake e kaekai iai ara tataro te Tama are i Karawa a bon kamiimi, ma baika riki bon bwaai aika a riai n riki. Tamara are i Karawa ao Iesu Kristo a kinaira raoi ao a katauraoi bwaai ni kairii maiura.

I ataia bwa ngkana ti maiu n ae tamaroa, ti na kukurei ni kakabwaia aika aki kona ni warekaki mwaitiia ake e anganiira te Tama are i Karawa, n raonaki ma Ana berita nakoira “bwa ngkana [ti] karaoi bwaai aikai, [ti] na boutokaki n te kabanea ni boong” (Aramwa 37:37).