Ko ha Lēsoni mei heʻeku Tamaí

Fai ʻe ʻEletā David A. Bednar

ʻO e Kōlomu ʻo e Kau ʻAposetolo ʻe Toko Hongofulu Mā Uá

Ne u ako ha lēsoni maʻongoʻonga mei heʻeku tamaí fekauʻaki mo e mafai mo e mālohi ʻo e lakanga fakataulaʻeikí.

Naʻá ku tupu hake ʻi ha ʻapi ne ʻi ai ha faʻē faivelenga mo ha tamai lelei. Naʻe ʻikai ke kau ʻeku tangataʻeikí ki he Siasí ka naʻá ne kei haʻu pē ki he ngaahi fakatahaʻanga ʻa e Siasí mo homau fāmilí. Naʻá ne faiako ʻi he timi kilikiti homau uōtí mo tokoni ki he ngaahi ʻekitivitī ʻa e Sikautí.

Ne tuʻo lahi ʻeku ʻeke ʻi he uike takitaha ki heʻeku tangataʻeikí ʻi heʻeku kei tamasiʻí pe ʻe papitaiso fakakū. Naʻe tali mai ʻe heʻeku tamaí ʻi he taimi kotoa pē, “Tēvita, te u kau ki he Siasí ʻi he taimi te u ʻiloʻi ko e meʻa totonu ia ke faí.”

ʻI ha Sāpate ʻe taha ne u ʻeke ai ki heʻeku tangataʻeikí pe ko ʻafē nai ʻe papitaiso aí. Naʻá ne malimali pē peá ne fehuʻi mai kiate au. “Tēvita, ʻoku akoʻi homou siasí naʻe ʻave ʻa e lakanga fakataulaʻeikí mei māmani he kuonga muʻá pea toe fakafoki mai ia ʻe ha kau talafekau fakalangi. Kapau ʻoku maʻu moʻoni ʻe hoʻo siasí ʻa e lakanga fakataulaʻeikí, ko e hā ʻoku tokolahi ai e kakai tangata ʻi homou Siasí ʻoku tatau pē ʻenau fakahoko honau fatongia fakataulaʻeikí mo e kakai tangata ko ia ʻi homau siasí?”

Naʻe hē ʻeku fakakaukaú. Ne ʻikai haʻaku tali ki heʻeku tangataʻeikí.

Ne u ʻilo ʻoku totonu ke makehe ange ʻa e kakai tangata ʻoku nau maʻu ʻa e lakanga fakataulaʻeikí ʻi he kakai tangata kehé. ʻOku totonu ke ʻoua naʻa ngata pē ʻi hono maʻu ʻe he kau maʻu lakanga fakataulaʻeikí ʻa e mafai ʻo e lakanga fakataulaʻeikí ka ke nau faivelenga foki mo moʻui taau ke fakaʻaongaʻi e mālohi ʻo e ʻOtuá.

Ne u fakapapauʻi ai ʻa e ʻikai ke u teitei loto ke u hoko ko ha sīpinga kovi ki heʻeku tamaí. Ne u loto ke u hoko ko ha tamasiʻi lelei. Ko e finangalo ia ʻo e ʻEikí kiate kitautolu kotoa ʻoku tau maʻu ʻa e lakanga fakataulaʻeikí ke tau anga fakaʻeiʻeiki, anga māʻoniʻoni, pea hoko ko ha tamaiki tangata lelei ʻi he taimi kotoa pē, pea ʻi he feituʻu kotoa pē.

Hili ha ngaahi taʻu lahi mei ai naʻe papitaiso ʻeku tamaí. Ne u maʻu ʻa e faingamālie ke u foaki kiate ia ʻa e Lakanga Taulaʻeiki Faka-ʻĒloné mo e Lakanga Taulaʻeiki Faka-Melekisētekí. Ko e taha ʻo e ngaahi ʻausia maʻongoʻonga ʻo ʻeku moʻuí ko ʻeku vakai ko ia ki heʻeku tangataʻeikí ʻokú ne maʻu ʻa e mafai mo e mālohi ʻo e lakanga fakataulaʻeikí.