Ngaahi Tali mei he Kau Taki ʻo e Siasí
Founga ke Vakai ai ki he ʻUhinga Totonu ʻo e Kilisimasí
Fai ʻe Palesiteni Dieter F. Uchtdorf
Tokoni Ua ʻi he Kau Palesitenisī ʻUluakí
Mei he Fakataha Lotu Faka-Kilisimasi ʻa e Kau Palesitenisī ʻUluakí ʻi he 2010.
ʻI heʻetau teuteu atu ki he Kilisimasí ʻaki ʻetau fakalaulauloto ki hono ʻuhinga totonú, ʻoku tau teuteu ai ke aʻusia ʻa e Kalaisí mo ʻEne pōpoakí. ʻOku ou fie fokotuʻu atu ha ngaahi meʻa ʻe tolu te tau ala fie maʻu ke ako, fakalaulaulotoa, mo fakaʻaongaʻi ʻi he faʻahitaʻu ko ʻeni ʻo e teuteú.
ʻUluakí, fiefia ʻi he ʻaloʻi hotau Fakamoʻuí. ʻOku tau fakamanatua ʻa e ʻaloʻi ʻo e ʻAlo ʻo e ʻOtuá, ʻa e Tupuʻangá, ko hotau Mīsaiá. ʻOku tau fiefia he naʻe hāʻele mai ʻa e Tuʻi ʻo e ngaahi tuʻí ki he māmaní, ʻo ʻaloʻi ʻi he ʻaiʻanga-kaí, peá ne moʻui haohaoa. ʻI he taimi naʻe ʻaloʻi ai ʻa Sīsuú, naʻe ʻikai kei mapukepuke ʻa e fiefiá ʻi langi (vakai ki he Luke 2:8–14).
Uá, fakalaulauloto ki Heʻene tākiekina ʻetau moʻuí ʻi he ʻaho ní. Ko e Kilisimasí ko ha taimi ia ke tau manatua ai ʻa e ʻAlo ʻo e ʻOtuá mo fakafoʻou ʻetau tukupā ke toʻo kiate kitautolu Hono huafá. Ko ha taimi ia ke toe vakaiʻi ai ʻetau moʻuí pea sivisiviʻi ʻetau ngaahi fakakaukaú, ngaahi ongó, mo e ngaahi ngāué. Tuku muʻa ke hoko eni ko e taimi ʻo e manatu, ʻo e houngaʻia, mo ha taimi ʻo e fefakamolemoleʻaki. Tuku muʻa ke hoko ia ko ha taimi ke tau fakalaulauloto fakatāutaha ai ki he Fakalelei ʻa Sīsū Kalaisí pea mo hono ʻuhingá. Tuku muʻa ke tautefito ʻene hoko ko ha taimi ki he fakafoʻou mo toe fakatukupaaʻi kitautolu ke tau moʻui ʻo fakatatau ki he folofola ʻa e ʻOtuá pea talangofua ki Heʻene ngaahi fekaú. ʻI heʻetau fai ʻení, ʻoku lahi ange ai ʻetau fakalāngilangiʻi Iá ʻi hono ʻai ʻo e ngaahi māmá, ngaahi meʻaʻofá, pe ngaahi fakafiefiá.
Tolú, siofaki ʻEne hāʻele maí. Lolotonga ʻa e hoko ʻa e faʻahitaʻu Kilisimasí ko ha taimi ia ke tau sio atu ai kimui mo fakamanatua ʻa e ʻaloʻi hotau ʻEikí, ʻoku hangē kiate au ʻoku totonu pē ke toe hoko ia ko ha taimi ke tau sio atu ai ki he kahaʻú. Tuku muʻa ke tau sio atu kimuʻa. Tuku muʻa ke tau mateuteu ki he ʻaho monūʻia ko ia ʻo ʻEne toe hāʻele maí. Tuku muʻa ke tau matapoto ʻo hangē ko kinautolu ʻi he kuonga muʻá ʻo siofaki atu ʻEne hāʻele maí.
ʻOku ou lotua ke tau mamata ki he haohaoa ʻo e talanoa ʻo hono ʻaloʻi ʻo e Fakamoʻuí lolotonga ʻa e faʻahitaʻu ko ʻení pea fai atu maʻu ai pē mo ongoʻi houngaʻia moʻoni koeʻuhí ko ʻEne moʻuí, ngaahi akonakí, mo ʻEne feilaulau fakahaofi maʻatautolú. Fakatauange ke ueʻi kitautolu ʻe he houngaʻiá ni ke tau fakafoʻou ʻetau tukupā ke muimui kiate Iá. ʻOfa pē te ne tākiekina kitautolu ke tau toe vāofi ange mo hotau fāmilí, lotú mo hotau kaungā fonongá. Pea fakatauange ʻoku tau siofaki atu ʻa e ʻaho monūʻia ko ia ʻo e toe hāʻele mai ʻa e Kalaisi toetuʻú ʻi he māmaní ko hotau ʻEiki, ko hotau Tuʻi, mo hotau Fakamoʻui kuo tāpuekiná.