Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe Founga Fēfē ʻEnau ʻIlo ʻEku Fie Maʻú?
Hannah Eiselin, ʻAlisona, USA
Tā fakatātā ʻa Stan Fellows
ʻI he meimei taʻu e 20 kuohilí ne u maʻu ai hoku uiuiʻi ngāue fakafaifekaú ke ngāue ʻi Siapani. Naʻá ku vēkeveke ʻaupito mo kiʻi puputuʻu ʻi heʻeku teuteu atu ke u mavahe ʻi Sanuali ki heʻeku ngāue fakafaifekaú. ʻI he taimi tatau ne mole ai mo e ngāue ʻeku ongo mātuʻá.
Naʻá ku maʻu ʻa e paʻanga ki heʻeku ngāue fakafaifekaú ʻi heʻeku aʻu maí, ka naʻe faingataʻaʻia fakapaʻanga hoku fāmilí. Naʻe ʻikai ke u ʻilo pe te u maʻu mei fē ha paʻanga ki heʻeku ngaahi fakamole muʻa maí hangē ko e vala ki he ngāue fakafaifekaú, katoleta, mo e ngaahi fie maʻu kehé. Naʻá ku ngāue fakataimi (part-time) pē ka naʻe ʻikai feʻunga. Naʻá ku hohaʻa tautautefito pe ʻe anga fēfē haʻaku maʻu ha paʻanga ke u tohi kole leva ki haʻaku paasipoti ke aʻu kei taimi mai kimuʻa peá u mavahe ki Siapaní.
ʻI ha efiafi ʻe taha, naʻá ku ʻalu ai ki hoku lokí ʻo tautapa ki he Tamai Hēvaní ʻi he holi lahi. Naʻá ku vahevahe ʻa ʻeku holi ke ngāue ʻi Siapaní mo ʻeku houngaʻia ko e ʻamanaki ke hoko ʻo moʻoni ʻa ʻeku misí ke u ʻalu ʻo ngāue fakafaifekau. Naʻá ku fakamaʻumaʻu pē hoku loʻimatá, ʻo u talaange kiate Ia ʻa ʻeku fuʻu fie maʻu ha $75 ke ʻai ʻaki ʻeku paasipootí. ʻI heʻeku tuʻu hake mei heʻeku lotú, naʻá ku ʻilo ʻe lelei pē ʻa e meʻa kotoa. Naʻe ʻikai te u ʻilo pe ʻe founga fēfē, ka naʻe fakapapauʻi mai ʻe ha ongo nonga mo fiemālie ʻe tokonaki ia ʻe he ʻEikí.
ʻI he ʻaho ko iá, ne u fakaava hake ʻemau puha meilí ʻo ʻilo ai ha kaati Kilisimasi ʻi loto. Naʻe ʻikai ke hiki ʻe he tokotaha naʻe ʻomi mei aí hono hingoá. Naʻe ʻikai ha sitapa ai; naʻe tuku mai pē ia ʻe ha taha ki ai.
ʻI loto ʻi he kaatí ʻoku tohi ai, “Fakamonūʻia atu! Ko koe ʻa e tokotaha ʻokú ke monūʻia ʻi he kiʻi angaʻofa faka-Kalisitiane ko ení. Fakatau ange ke ke maʻu ha Kilisimasi Fiefia, Hena. Talamonū atu ki hoʻo ngāue fakafaifekaú.”
Naʻe ʻi loto ʻi he kātí ha $100. Naʻá ku tuʻu ʻi homau matapā muʻá ʻo tangi. Ko hai naʻá ne fai ʻení, pea naʻe founga fēfē ʻenau ʻilo ʻeku fie maʻú?
Hili ha ngaahi taʻu lahi mei ai naʻe teʻeki pē ke u ʻilo ʻa e tokotaha naʻá ne ʻomi ʻa e paʻangá ki hoku ʻapí ʻi he ʻaho ko iá. Naʻá ku fakakaukau tā tuʻo lahi ki he tokotaha, pe kakai ko iá, talu mei ai. ʻOku ou tui naʻá nau fakahaaʻi ʻa ia ne ʻuhinga ki ai ʻa ʻEletā Siosefa B. Uefilini (1917–2008) ʻo e Kōlomu ʻo e Toko Hongofulu Mā Uá ʻi heʻene pehē: “ʻOku hanga ʻe he manavaʻofa ʻa e ngaahi kaungāmeʻa anga faka-Kalaisí ʻo ueʻi mo liliu ha ngaahi moʻui. … ʻI he Siasi ko ʻení, ʻoku faʻa tali mai ʻe he ʻEikí ʻa e ngaahi lotu kole tokoní ʻo fakafou ʻi ha fanga kiʻi ngāue tokoni fakaʻaho ʻo ha ngaahi tuongaʻane mo e tuofāfine ʻofa. ʻI he angalelei ʻa e ngaahi kaungāmeʻa funganí, kuó u mamata ai ki he ʻaloʻofa ʻa e ʻEikí.”1
Naʻe liliu au ʻe he tōʻonga angaʻofa ko iá, ʻo tokoniʻi au ke u ʻalu ki heʻeku ngāue fakafaifekaú ʻi he taimi totonú mo ueʻi au ke u fakasio ha ngaahi founga ke u hoko ai ko e tali ki he ngaahi lotu ʻa e niʻihi kehé.