Ko ha Tokotaha Fiefoaki koe pe Maʻu Mai?

ʻOkú ke faʻa tuʻu nai ʻo fakakaukau ki he ʻuhinga ʻokú ke tokoniʻi ai e niʻihi kehé mo tauhi e ngaahi fekaú? Ko ha māhina lelei ʻeni ke ke fakahoko ai ia lolotonga hoʻo ako ki hono langa hake e puleʻanga ʻo e ʻOtuá ʻi hoʻo ngaahi lēsoni ʻi he lotú. Fehuʻi hifo kiate koe, ʻoku ou vēkeveke ange koeʻuhí ko e meʻa ʻoku lava ke u maʻú pe ko e meʻa ʻoku lava ke u foakí?

ʻE tokoniʻi koe ʻe he ongo fehuʻi ʻi ʻolungá ke ke sio pe ʻokú ke hehema ki loto (fakakaukau pē kiate koe) pe ki tuʻa (fakakaukau ki he niʻihi kehé).

Ko e hā nai ʻa e fakalāngilangi te u maʻu ʻi heʻeku ngāue ʻi he fatongia ko ʻení?

ʻE tāpuekina fēfē au ʻi heʻeku totongi vahehongofulú mo e foaki ʻaukaí?

ʻE tāpuekina fēfē au mei heʻeku faitotonú?

Ko e ha te u maʻu ʻo kapau te u maʻulotu?

ʻE founga fefē nai hono tokoniʻi au ʻe he ngāue fakafaifekaú?

Ko e hā ʻa e ngaahi tāpuaki te u maʻu mei he mali temipalé?

ʻOku fakaʻatā fēfē au ʻe hoku uiuiuʻí ke u tokoni ki hono fakamālohia e niʻihi kehé?

ʻE tokoni fēfē ʻeku vahehongofulú ki hono langa hake e puleʻanga ʻo e ʻOtuá?

ʻE faitāpuekina fēfē ʻe heʻeku faitotonú e niʻihi kehé?

ʻOku fakahaaʻi fēfe ʻe heʻeku maʻulotú ʻeku mateaki ki he ʻEikí?

Ko e hā ha ngaahi founga te u lava ai ʻo tokoni ki he niʻihi kehé ʻi he ngāue fakafaifekaú?

ʻE founga fēfē hano ʻomi ʻe he mali temipalé kiate au ha faingamālie ke u tokoni ai ki hoku hoá mo ʻeku fānaú?

ʻOku sai pē ke fakakaukau ki he ngaahi tāpuaki te ke maʻú, ka ʻo kapau te ke ʻilo ʻokú ke fakahehema ki loto ʻo lahi ange ia ʻi tuʻa, feinga ke ke sio hake ki ʻolunga. Naʻe akoʻi mai ʻe Palesiteni Tōmasi S. Monisoni: “Manatuʻi ʻoku ʻikai ko ha ngāue ʻeni ʻataua pē. ʻOku tau lava ʻo sio hake ki ʻolunga pea kakapa atu ki ha tokoni fakalangi” (“Do Your Duty—That Is Best,” Liahona, Nov. 2005, 58).