Ko e Talanoa ʻo e ʻAloʻí

ʻI he kuonga fuoloá, naʻe mali ha fefine ko Mele pea mo ha tangata ko Siosefa. Ko ha kakai lelei ʻa Mele mo Siosefa ne na fakahoko ʻa e meʻa ne fie maʻu ʻe he ʻOtuá ke na faí.

ʻI he ʻaho ʻe taha ne haʻu ai ha ʻāngelo kia Mele ʻo talaange te ne fanauʻi ha tama! Naʻe talaange ʻe he ʻāngeló ʻoku totonu ke ne fakahingoa ʻa e pēpeé ko Sīsū. ʻE hoko e pēpeé ko e ʻAlo ʻo e ʻOtuá, ko e Fakamoʻuí.

Naʻe pau ke faifononga ʻa Mele mo Siosefa ki ha kolo ko Pētelihema ke totongi ʻena tukuhaú.

Naʻe fuʻu tokolahi e kakai ʻi he koló. Ko ia naʻe nofo ʻa Mele mo Siosefa he pō ko iá ʻi he potu ne tauhi ai e fanga monumanú. Ne ʻaloʻi ʻa Sīsū ʻi he pō ko iá!

Ne ʻasi ha fetuʻu foʻou ʻi he langí.

Naʻe tokangaʻi ʻe ha kau tauhisipi e fanga sipí ʻi ha feituʻu ofi mai. Ne haʻu ha ʻāngelo ʻo talaaange ki he kau tauhisipí kuo ʻaloʻi ʻa e Fakamoʻuí. Ne ō e kau tauhisipí ke kumi mo hū ki he pēpē ko Sīsuú.

Ne mamata ʻa e Kau Potó mei he mamaʻó ki he fetuʻu foʻoú. Ne nau ʻilo ko ha fakaʻilonga ia kuo ʻaloʻi ʻa e Fakamoʻuí. Naʻa nau muimui ʻi he fetuʻú kae ʻoua kuo nau ʻilo ʻa Sīsū. Ne nau foaki ange kiate Ia ha ngaahi meʻaʻofa mo hū kiate Ia.

Hili e mavahe ʻa e Kau Potó, ne ʻaʻahi ha ʻāngelo kia Siosefa. Ne talaange ʻe he ʻāngeló ʻoku ʻi ai ha tuʻi kovi ʻokú ne fie maʻu ke fakalaveaʻi ʻa Sīsū. Ne talaange ʻe he ʻāngeló ʻoku totonu ke mavahe leva hono fāmilí ki ʻIsipite ke nau hao ki ai.

Ne nofo ai ʻa Siosefa, Mele mo Sīsū ʻi ʻIsipite kae ʻoua kuo tokamālie ke nau foki ki ʻIsileli. Ne tupu hake ʻa Sīsū ʻi he kiʻi kolo ko Nāsaleti. Naʻá Ne ako ai ke faʻa tokoni, angalelei, mo talangofua. Naʻá Ne ako ai ʻa e meʻa kotoa pē naʻá Ne fie maʻu ke hoko ai ko hotau Fakamoʻuí. Naʻá Ne muimui maʻu pē ki he palani ʻa e ʻOtuá kiate Iá.

ʻOku tau fakamanatua he Kilisimasí, ʻa hono ʻaloʻi ʻo Sīsū Kalaisí. Tuhu ki he fakatātā ʻo e kakaí ni, ʻa ia ne nau kau ʻi he talanoa ʻo e ʻAloʻí.

Te tau lava ʻo hangē ko Mele mo Siosefá ʻi heʻetau fai ʻa e meʻa ʻoku finangalo e ʻOtuá ke tau faí.

Te tau lava ʻo hangē ko e kau tauhisipí mo e Kau Potó ʻi heʻetau muimui kia Sīsū Kalaisí.

Te tau lava ʻo hangē ko e kau ʻāngeló ʻi heʻetau vahevahe ki he niʻihi kehé e talanoa moʻoni ʻo e Kilisimasí.

Pea te tau lava ʻo hangē ko Sīsuú ʻi heʻetau muimui ki Heʻene sīpingá!