Ko ha Meʻaʻofa Liliu-Moʻui ʻi he Falekoloa Maʻamaʻá
ʻOku nofo ʻa e tokotaha naʻá ne faʻú ʻi ʻAlesona, USA.
Naʻe ʻikai te u maʻu ha paʻanga feʻunga ke fakatauʻaki ha meʻaʻofa maʻá e mali ʻeku fineʻeikí, ko ia ne u fai ha lotu, kimuʻa pea mau ʻalu ke fai ʻemau fakataú.
Tā fakatātaaʻi ʻe J. Beth Jepson
ʻI he taʻu ʻe taha ne ʻikai ke mau maʻu ha paʻanga feʻunga ki he Kilisimasí, ko ia ne u lotu ai ki ha tokoni ke u lava ʻo fakatau mai ha meʻaʻofa maʻá e mali ua ʻeku fineʻeikí ko ʻAtiliní (ʻa ia ne ma ui mo hoku taʻoketé ko Uiki). Ko ha paʻanga pē ʻe ua ne ma maʻu mo hoku taʻoketé ke fakatau ʻaki e meʻaʻofá.
ʻI he taimi ne talamai ai ʻe heʻeku fineʻeikí te mau ʻalu ki ha falekoloa maʻamaʻa ofi mai ʻo fakatau e ngaahi meʻaʻofa Kilisimasí, naʻá ku lele ki hoku lokí ʻo lotu ki ha tokoni: “Kātaki ʻo tokoniʻi kimaua ke ma ʻilo ha meʻaʻofa feʻunga mo e paʻanga ʻe uá.”
Naʻá ma fakasio mo ʻIleini ʻi he ngaahi tohí peá ma maʻu ha tohi fakatahaʻi ʻo e ngaahi tohi folofola ʻe tolú (triple combination) ne hangē pē ha tohi foʻoú. Naʻá ma fiefia ʻaupito ʻi heʻema maʻu iá. Naʻá ku puke maʻu ia ʻi heʻema lele atu ki heʻeku fineʻeikí. Naʻá ma hopohopo, peá ma lea fakataha atu, “Ne ma ʻilo ha meʻaʻofa maʻa Uiki!” ʻI hono ʻai ke totongí, ne ʻeke atu ʻe heʻeku fineʻeikí, “ʻOku fiha ʻeni?” Naʻe tali mai ʻe he fefiné, “Paʻanga ʻe ua.” Naʻe tali ʻeku lotú.
ʻI he taimi ko iá ne teʻeki ke kau ʻema tangataʻeikí ki he siasí. Naʻe ʻikai te ne saiʻia ʻi he Kau Māmongá, naʻe ʻikai ke ne tui ki he “tohi Māmongá,” pea naʻe ʻikai ke ne saiʻia ʻi hono ʻave kimaua ʻe he kāingalotú ki he ngaahi ʻekitivitī ʻa e Kau Talavoú mo e Kau Finemuí. Naʻe aʻu pē ki heʻene tuli e kau faifekaú. Ka naʻe ʻikai tuka ai e kāingalotu ʻo e uōtí mo e kau faifekaú.
ʻI he ʻaho Kilisimasí naʻá ma fakatatali pē ʻene meʻaʻofá ke fakamuimui taha. Naʻá ku lea atu mo ʻIleini, “Ko e meʻaʻofa maʻongoʻonga taha eni ʻe lava ʻe ha taha ke ʻoatu maʻau! Te ne ʻai koe ke ke fiefia.” Naʻe mateʻi tā tuʻo lahi mai ʻe Uiki, peá ma kata ʻi heʻene ngaahi talí. Naʻá ma talaange, “Ko ha meʻaʻofa fakaʻofoʻofa! Te ne hanga ʻo liliu hoʻo moʻuí. Naʻá ne liliu ʻema moʻuí.”
Naʻe hohaʻa ʻema fineʻeikí telia naʻá ne lotomamahi heʻema meʻaʻofá, ka naʻá ku ʻilo mo ʻIleini ko e meʻa totonu pē ia ke faí.
ʻI he taimi naʻá ne fakaava hake aí, naʻá ne fakamālō mai kiate kimaua koeʻuhí ko e meʻaʻofá peá ne talamai te ne lau ia.
Koeʻuhí ne ma ʻofa ʻia Uiki, ne ma loto ke ne ʻilo fekauʻaki mo Sīsū Kalaisi mo e meʻaʻofa ʻo ʻEne Fakaleleí. Ne ma loto ke ne tui ʻo hangē ko kimauá, ke lotu mo fakatomala, mo maʻu ʻa e ongoongoleleí ʻi heʻene moʻuí.
Naʻá ne lau mo lotua ʻa e Tohi ʻa Molomoná, pea ʻi he tokoni ʻa e ongo faifekaú mo e kāingalotu ʻo e uōtí, naʻá ne papitaiso pea ʻokú ne hoko ko ha mēmipa ʻo e Siasí. Naʻá ma fiefia ʻaupito ke silaʻi kimautolu ʻi he temipalé, pea ne ma ʻilo te mau toe fakataha maʻu ai pē ʻo taʻengata ko ha fāmili.