Fakalakalaka Fakatāutahá ʻi Heʻeku ʻAkau Fāmilí
ʻOku nofo ʻa e tokotaha naʻá ne faʻú ʻi Manau, Palāsila.
Ko au pē mo hoku tokouá ʻi hoku fāmilí ʻokú ma kau ki he Siasí—ʻi he anga ia ʻeku fakakaukaú kimuʻa pea kamata ʻeku ngāue ki heʻeku hisitōlia fakafāmilí.
Ne u faʻa tautoloi maʻu pē hono fakahoko ʻeku tohi hohokó. Ka naʻe tākiekina au ʻe heʻeku holi ke u ʻalu ʻo ngāue fakafaifekaú ke u fokotuʻu ai ha ngaahi taumuʻa ke teuteuʻi au ke u hoko ko ha faifekau lelei ange. ʻI he tokoni mai hano ueʻi fakalaumālie ʻo ha pīsope, ne u fakakaukau ai ke u kamata ngāue ʻi heʻeku Fakalakalaka Fakatāutahá. Kimuʻa peá u lava ʻo ikunaʻi ha ngaahi taumuʻa pau mo ha ngaahi ngāue lelei, ne u fie maʻu ke u tokanga ki he tohi hohokó. Ko ia ne u ngāue leva ki ai.
ʻOku ou ʻilo ne tataki au ʻe he Laumālié, koeʻuhí ʻi ha pō Sāpate ʻe taha, hili pē ia ha houa ʻe tolu ʻeku ngāué, naʻe hoko ha meʻa fakaofo.
ʻI heʻeku kamatá pē, ne u manatuʻi hake naʻe kōvana ʻeku kui tangata tolú ʻi he siteiti ʻo ʻAmasoná, ʻi Palāsila. Ko ia ne u fakahū hono hingoá ki he founga kumi he ʻinitanetí, pea ne u ʻohovale, ne u maʻu ʻi ha peesi he Wikipedia fekauʻaki mo ʻeku kui tangata tolú mo e kui fefine tolú fakatouʻosi. Ne tuaiekemo ʻeku fakatokangaʻi ʻiate kinaua ʻa e ngaahi talēniti mo e ngaahi meʻafoaki ʻoku ou maʻú, pea kamata ke u ongoʻi māfana ʻi hoku lotó. Ka naʻe lahi ange ʻa e ngaahi meʻa ke fekumi ki aí.
ʻI heʻeku vakai holo ʻi he ngaahi fehokotakiʻanga ʻi he peesí, ne u fakatokangaʻi ha taha ʻiate kinautolu ʻoku pehē “ʻakau fāmili.” Ne u lomiʻi ia, pea ne u ʻilo ai ha ngaahi vaʻavaʻa ʻo hoku fāmilí ne ʻikai te u lavelaveʻiloa. Ka ko e meʻa naʻá ne tohoakiʻi lahi taha ʻeku tokangá ko e hingoa e tokoua ʻo ʻeku kui fefine uá, ko Losalina Mealesi, ʻa ia naʻá ne nofo ʻi ʻIutā.
Naʻá ku fakaofoofo ai. Ne u pehē ʻe au ko au pē mo hoku tuongaʻané ʻokú ma kau ki he Siasí. ʻOku toe ʻi ai nai ha niʻihi kehe ʻi hoku fāmilí ne kau ki he Siasí? ʻI heʻeku lomiʻi hono hingoá, ne u vakai ki ha fehokotakiʻanga ki ha peesi Feisipuka, ko ia ne u fetuʻutaki ki ai. Ne u maʻu ha tohi meiate ia ʻi loto ʻi ha ʻaho pē ʻe ua, ʻo ne fakapapauʻi mai ʻokú ma fāmili pea ʻokú ne kau foki mo ia ki he Siasí.
Naʻá ku ongoʻi houngaʻia moʻoni ki he Tamai Hēvaní ʻi heʻeku lava ʻo ongoʻi ʻa e fuʻu fiefia lahi ko ia ne u ongoʻi ʻi he mōmeniti ko iá.
Ne hokohoko atu ʻeku fekumi ki heʻeku ngaahi kui kuo pekiá, pea ne fai tāpuekina au ʻe he Tamai Hēvaní ʻaki ha ngaahi hingoa fakafāmili lahi ke u lava ʻo ʻave ki he temipalé. Ka naʻá Ne toe tokoniʻi foki au ke u ʻilo ha niʻihi hoku fāmilí ʻoku nau kei moʻui mo faivelenga ʻi he ongoongolelei ʻa Sīsū Kalaisi kuo toe fakafoki maí. Naʻe ʻikai mei hoko ʻeni ka ne taʻeʻoua ʻa e Fakalakalaka Fakatāutahá, ngāue ʻi he hisitōlia fakafāmilí, pea mo ʻeku holi ke u ʻalu ʻo ngāue fakafaifekaú.