Folofola maʻa Sipenisā

Fai ʻe ʻEletā Marcus B. Nash

ʻO e Kau Fitungofulú

“ʻOku ou manako he lau ʻa e folofolá, Tupulaki ai hoku laumālié, Mo ʻeku fakamoʻoní” (Tohi Hiva ʻa e Fānaú, 66).

ʻI heʻema mali pē mo hoku uaifí, ne fakalotolahiʻi ʻe Palesiteni Sipenisā W. Kimipolo (1895–1985) ʻa e kāingalotu ʻo e Siasí ke nau lau ʻa e folofolá ʻi he ʻaho kotoa pē mo honau ngaahi fāmilí. Ne ma loto ke mau muimui ki he palōfitá, ko ia ne ma fakakaukau ke ma fakahoko fakataha ia ko ha ongo mātuʻa pea toki fakahoko fakataha leva mo ʻema fānaú ʻi he kahaʻú.

Hili ha ngaahi taʻu mei ai, ne fakatokolahi homa fāmilí ʻaki ha fānau ʻe toko nima, kau ai ʻema siʻisiʻi tahá, ko Sipenisā.

ʻI he taimi ne taʻu ono ai ʻa Sipenisaá, ne ma kiʻi mavahe mo hoku uaifí ʻi ha ngaahi ʻaho pea ne ʻomi ai ha tauhi (babysitter) ke nofo mo e fānaú. ʻI heʻema foki mai ki ʻapí, ne u tangutu hifo mo Sipenisā peá u ʻeke atu ki ai pe naʻe fēfē lolotonga ʻema mavahé.

Naʻa ne talamai kiate au naʻe ʻikai te ne lava ʻo mohe. ʻI heʻeku fehuʻi ange pe ko e hā e ʻuhinga ne ʻikai lava ai ʻo mohé, naʻá ne fakakaukau ki ai peá ne pehē mai ʻoku ʻikai te ne ʻilo ia ʻe ia.

Hili iá ne fakatahataha mai homau fāmilí ʻi he efiafi ko iá ke kamata ʻemau lau Tohi ʻa Molomoná.

Fakafokifā kuo ofongi hake ʻe Sipenisā, “Tā ko hono ʻuhingá ia!” Ne u ʻeke atu pe ko e hā ʻene ʻuhingá. “Ko hono ʻuhinga ia ne ʻikai ai ke u lava ʻo mohe lelei ʻi he poʻulí.”

Naʻá ku ʻeke ange, “Ko e hā hā ne ʻikai ai ke ke lava ʻo mohé?”

“Naʻe ʻikai te mau lau ʻa e folofolá ʻi he poʻulí lolotonga hoʻomo ʻalú, pea ʻoku ou saiʻia ʻi he ongo ʻoku ou maʻu mei he folofolá.”

Ne ʻilo ʻe Sipenisā ʻoku hanga ʻe hono lau ʻo e folofolá ʻi he ʻaho kotoá ʻo ʻomi ʻa e nonga, fiemālie, mo e tākiekina ʻa e Laumālie Māʻoniʻoní.

ʻOku tau lava ʻo ako ke ʻofa ʻi he folofolá ʻi he taimi ʻoku tau lau fakaʻaho aí. ʻI heʻetau fai iá, ʻe tākiekina kitautolu ʻe he Laumālie Māʻoniʻoní pea fakamālohia kitautolu ʻe heʻetau Tamai Hēvaní.