Mga Importanting Panghitabo sa Ika-186 nga Tinuig nga Kinatibuk-ang Komperensya sa Ang Simbahan ni Jesukristo sa mga Santos sa Ulahing mga Adlaw

Ang sesyon sa Sabado sa buntag sa Abril nga kinatibuk-ang komperensya nagsugod sa imbitasyon gikan ni Presidente Henry B. Eyring nga nag-awhag sa mga naminaw sa pag-ampo alang sa mga mamumulong ug sa mga choir, sa dili pa ug atol sa ilang pagpamulong. Ug sa pagtapos sa komperensya sa Dominggo sa hapon, si Elder Jeffrey R. Holland miingon: “Kon sa umaabut nga mga adlaw … ang mga elemento sa inyong kaugalingong kinabuhi nga wala pa mahaum ngadto sa mga mensahe nga inyong nadunggan niining semanaha, ayaw kaguol ug ayaw paghunong … Ang talagsaong butang kalabut sa ebanghelyo mao nga kita magantihan sa pagpaningkamot bisan kon kita dili kanunayng magmalampuson.” (pahina 125, 126).

Ang ilang mga tawag sa paglihok nakatagna ug nakapalig-on sa panawagan ni Presidente Thomas S. Monson nga “sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpili, … kon mopili kita ni Kristo, nakahimo kita og sakto nga pagpili.” (pahina 86).

Ubang mga importanting butang sa komperensya naglakip sa:

• Pagpahibalo ni Presidente Monson sa upat ka bag-ong mga templo: sa Belém, Brazil; Quito, Ecuador; Lima, Peru (ang ikaduha nga templo didto); ug sa Harare, Zimbabwe (tan-awa ang istorya sa pahina 142).

• Pagpaluyo sa 11 ka bag-ong mga General Authorities (ilang mga biyograpiya nagsugod sa pahina 131).

• Pagpaluyo sa bag-ong kinatibuk-ang kapangulohan sa Primary (ilang mga biyograpiya anaa sa pahina 136).

• Pagpahibalo sa bag-ong inisyatibo alang sa mga indibidwal ug mga pamilya sa lokal nga pagtabang sa mga refugee (tan-awa sa mga pahina 13, 111, ug 141).

• Pagtutok sa mga relasyon sa pamilya, ilabi na sa mga tahas sa mga lalaki isip mga bana, mga amahan, ug mga tighupot sa priesthood.

• Pagpasabut sa doktrina gikan sa mga mamumulong sama niini gikan ni Elder Dale G. Renlund: “Samtang mas magpaduol kita sa Dios, ang makaabag nga gahum sa Pag-ula ni Jesukristo moabut sa atong kinabuhi. Ug, sama sa mga disipulo nga padulong sa Emaus, atong makaplagan nga ang Manluluwas kanunay nga anaa ra sa duol” (pahina 42).