Joy D. Jones

Kinatibuk-ang Presidente sa Primary

Para ni Joy D. Jones, ang mapinanggaon niyang mga ginikanan mao ang iyang mga bayani.

“Gibati nako nga makahimo ang akong papa sa bisan unsa,” misulti si Sister Jones bahin sa iyang amahan, nga usa ka elektrisyan. Bahin sa iyang mama, miingon siya, “Talagsaong babaye ang akong mama” kinsa mihimo sa tanan gikan sa pagkaon nga gikaon sa pamilya ngadto sa mga saput nga ilang gisul-ob—sukad sa sinugdanan. “Para nako, usa siya ka santos, ug gusto kong magtubo nga sama kaniya.”

Agig dugang sa paghatag og bili sa mga handumanan sa iyang mga ginikanan, nga si Aldo Harmon ug Eleanor Ellsworth Harmon, gihatagan og bili ni Sister Jones ang panumduman sa pagkabata sa pagpaminaw niya ni Elder Robert L. Backman samtang namulong siya sa usa ka district conference sa Oregon, USA. Si Elder Backman, karon usa na ka emeritus General Authority Seventy, maoy mission president niadtong higayona.

“Mibati ko og butang nga labihan ka impluwensyal samtang namulong siya,” miingon si Sister Jones. “Mibati ko og butang nga lahi kaayo kay sa akong gibati kaniadto. … Nagpasalamat kaayo ko gumikan niana tungod kay akong nadawat ang saksi gikan sa Espiritu nga ang iyang mga gisulti tinuod.”

Si Joy Diane Harmon natawo niadtong Hulyo 20, 1954, sa The Dalles, Oregon. Siya ug ang umaabut niyang pamanhunon, si Robert Bruce Jones, nagtubo sa Oregon, apan nagkita sila sa Brigham Young University, sa Provo, Utah, USA. Naminyo sila niadtong Agosto 14, 1974, sa Manti Utah Temple. Duna silay lima ka anak ug 17 ka apo.

Wala madugay human nga nadawat niya ang associate of science degree in family living, namalhin sila sa Portland, Oregon, ug sa dayon sa Santa Rosa, California, USA, diin si Brother Jones nagtrabaho isip usa ka chiropractic nga doktor. Si Brother ug Sister Jones giaghat nga mobalhin ngadto sa Draper, Utah, 22 ka tuig nang milabay. Si Sister Jones nakatagamtam sa panalangin nga magpuyo duol sa templo sukad niadto.

“Ang Jordan River Utah Temple nahimo nakong sagrado nga luna,” miingon siya. “Duna koy pagpamatuod bahin sa gahum sa templo ug sa kalinaw ug direksyon nga gidala niini sa akong kinabuhi.”

Si Sister Jones nakaserbisyo isip ward Relief Society president ug Primary president ug isip counselor sa ward ug stake Relief Society, Young Women, ug mga kapangulohan sa Primary. Sa bag-ohay lang kaayo nagserbisyo siya sa Primary general board.