Paghimo sa Komperensya nga Kabahin sa Atong Kinabuhi

Ikonsiderar ang paggamit sa pipila niining mga kalihokan ug mga pangutana isip sinugdanan sa panaghisgutan o personal nga pagpamalandong.

Para sa mga Bata

Pahina 86: Presidente Thomas S. Monson naghisgot sa usa ka talan-awon gikan sa Alice’s Adventures in Wonderland aron ipakita nga ang mga desisyon importante. Siya miawhag kanato sa pagpili sa matarung, bisan kon kini mas lisud nga dalan. Isip usa ka pamilya, hisguti ang mga lisud nga mga desisyon nga inyong giatubang. Unsa ang inyong mahimo aron matabangan ang usag usa nga mopili sa matarung? Para sa kalihokan, mag-drawing og usa ka PAM nga taming sa usa ka poster ug isulat ang imong mga ideya niini. Dayon isab-it kini sa dapit nga kanunayng makit-an sa pamilya.
Pahina 101: Presidente Dieter F. Uchtdorf, Ikaduhang Magtatambag sa Unang Kapangulohan, mihulagway sa usa ka siyudad sa Germany nga naguba sa gubat apan sa wala madugay gitukod pag-usab ug nahimo na usab nga matahum. Si Presidente Uchtdorf nagtudlo nga kon kita mobati nga masulub-on, ang Manluluwas ug sa Langitnong Amahan mahimong makausab kanato. Unsa nga mga ehemplo nga nakita sa inyong pamilya nga naguba nga nahimong maanindot ug nalig-on pag-usab? Ikonsiderar ang pagpakigbahin sa inyong pagpamatuod sa Pag-ula ni Jesukristo sa inyong mga anak.
Pahina 53: Si Elder Mervyn B. Arnold sa Seventy miawhag kanato nga “moadto aron sa pagluwas” sa pagtabang sa atong mga higala nga dili kaayo aktibo o dili miyembro sa simbahan. Isip usa ka pamilya, paghunahuna kon sa unsang paagi nga inyong matabangan kadtong taud-taud nang nawala sa simbahan o dili mga miyembro. Unsa ang inyong mahimo aron mapaambit ang ebanghelyo sa uban? Paghunahuna og usa ka makalingawng missionaryo nga plano sa pamilya inubanan sa yano, makab-ut nga mga tumong.
Pahina 13: Si Sister Linda K. Burton, kinatibuk-ang presidente sa Relief Society, midapit kanato nga mainampoong ikonsiderar kon unsaon nato pagtabang ang mga bakwit diha sa atong mga komunidad. Isip usa ka pamilya, bisitaha ang IWasAStranger.lds.org ug tan-awa ang video nga giulohan og “I Was a Stranger: Love One Another.” Unsa ang pipila ka mga butang ang akong mabuhat aron makaserbisyo sa mga silingan nga nanginahanglan?

Para sa mga Kabatan-onan

Pahina 86: Si Presidente Thomas S. Monson miingon, ang ganghaan sa kasaysayan mabukas pinaagi sa gagmay nga bisagra, ug mao usab ang kinabuhi sa mga katawhan. Miingon usab siya, “Ang dalan nga atong subayon niini nga kinabuhi mopaingon sa atong destinasyon sa sunod nga kinabuhi.” Paghunahuna mahitungod sa mahinungdanong mga pagpili nga moabut sa inyong kinabuhi. Hunahunaa kon asa kamo dad-on niadto mga pagpili, ug pagsulat og mga ideya ug mga impresyon nga moabut kaninyo.
Pahina 46: Si Elder Ronald A. Rasband sa Korum sa Napulog Nuha ka mga Apostoles miingon, “Ang Pagpahiuli sa ebanghelyo nagsugod sa usa ka batan-on, si Joseph Smith, nga nangutana.” Si Elder Rasband miingon nga ang mga pangutana nagpakita sa usa ka tinguha sa pagkat-on, pagdugang og mga kamatuoran sa atong mga pagpamatuod, ug “mopadayon sa unahan uban ang pagkamakanunayon kang Kristo” (2 Nephi 31: 20). Ipadangaat ang inyong pangutana ngadto sa Dios pinaagi sa pag-ampo, pagsiksik sa kasulatan ug sa mga pakigpulong sa kinatibuk-ang komperensya, ug tan-awa ug paminawa og maayo ang mga tubag.
Pahina 10: Kamo ba mibati sa kahadlok o nag-inusara? Si Sister Neill F. Marriott, ikaduhang magtatambag sa kinatibuk-ang kapangulohan sa Young Women, mipakigbahin sa unsay nahitabo sa wala pa ang iyang kasal. Layo siya sa panimalay ug mag-estar uban sa usa ka paryente sa iyang pamanhonon kinsa wala pa niya mahimamat. Sa dihang miabut siya sa panimalay sa mga paryente, miingon si Sister Marriott, “Miabli ang pultahan … ug si Ante Carol, miduol ug iya kong gigakos.” Nianang higayona nawala ang iyang mga kahadlok. “Ang gugma naghimo og luna sa inyong kinabuhi para sa uban,” siya miingon. Aduna bay usa ka tawo nga kahatagan ninyo og luna?
Pahina 70: Si Brother Stephen W. Owen, kinatibuk-ang presidente sa Young Men, nagtudlo nga kitang tanan mga lider ug mga sumusunod. Siya mipakigbahin sa iyang kasinatian sa pakighimamat sa usa ka grupo sa batan-ong lalaki kinsa misuporta ug miawhag sa usag usa sa ilang mga korum. Siya miingon, “Ang pagpangulo usa ka pagpahayag sa pagkadisipulo—kini ang pagtabang sa uban nga moduol kang Kristo.” Pagpili og usa ka tawo nga inyong matabangan nga moduol ngadto kang Kristo karong semanaha.

Para sa mga Young Adult

Pahina 101: Gusto ba ninyong malikayan ang pagkawala sa inyong hugot nga pagtuo? Presidente Dieter F. Uchtdorf, Ikaduhang Magtatambag sa Unang Kapangulohan, mitudlo nga ang pagkamasulundon mao ang tubag? “Ang pagkamasulundon maoy naghatag og kalig-on sa pagtuo,” siya miingon. “Pinaagi sa pagkamasulundon kita makaangon og kamatuoran ug himaya”. Hunahunaa ang panahon sa dihang kamo misunod sa pulong sa Ginoo bisan tuod kini malisud. Sa unsang paagi nga ang inyong pagkamasulundon nakapalig-on inyong hugot nga pagtuo ug motabang kaninyo sa pagdiskubre unsa kamo?
Mga pahina 23, 59 ug 105: Si Sister Mary R. Durham, bag-ohay lang na-release isip ikaduhang magtatambag sa kinatibuk-ang kapangulohan sa Primary, nagpasabut nga ang Espiritu Santo “balaang tinubdan sa kalig-on.” Basaha ang iyang mga pakigpulong ug mga pakigpulong nila ni Elder David A. Bednar, ug Robert D. Hales sa Korum sa Napulog Duha ka mga Apostoles. Timan-i ang daghang mga tahas sa Espiritu Santo ug sa mga paagi nga Siya mopanalangin kaninyo. Paghimo og tumong sa pag-usab sa inyong kinabuhi aron kamo mahimong mas takus sa Iyang impluwensya.
Mga pahina 26 ug 124: Paggahin og panahon sa pagpangutana ni Elder Donald L. Hallstrom sa Kapangulohan sa Seventy: “Kon ang lisud nga mga butang mahitabo sa atong kinabuhi, unsa man dayon ang atong tubag? Ang kalibug ba o pagduha-duha o espirituhanong pagbiya? Usa ba kini ka hampak sa atong hugot nga pagtuo? Basulon ba nato ang Dios o ang uban sa atong mga kahimtang? O ang una ba natong tubag mao ang paghinumdom kinsa kita—nga kita mga anak sa mahigugmaong Dios? Si Elder Jeffrey R. Holland sa Korum sa Napulog Duha ka mga Apostoles miingon, “Ang unang dakong kamatuoran sa tanang kahangturan mao nga ang Dios nahigugma kanato sa tibuok Niyang kasingkasing, gahum, hunahuna ug kusog.” Sa unsang paagi nga ang pagpalig-on sa inyong pagpamatuod sa gugma sa Dios alang kaninyo makatabang ninyo sa paglahutay sa lisud nga mga butang?

Para sa mga Hamtong

Pahina 86: Si Presidente Thomas S. Monson miingon nga kon namalandong sa inadlaw natong mga desisyon, “kon mopili kita ni Kristo, nakahimo kita og sakto nga pagpili.” Unsa ang inadlaw-adlaw nga relihiyosong mga pamatasan nga mahimo ninyong mapalambo o mapalig-on sa inyong kinabuhi ug sa inyong pamilya aron nga si Kristo magpabilin anaa sa sentro sa inyong mga desisyon?
Mga pahina 81 ug 93: Si Presidente Henry B. Eyring, Unang Magtatambag sa Unang Kapangulohan, ug si Elder D. Todd Christofferson sa Korum sa Napulog Duha ka mga Apostoles miawhag sa mga amahan nga himoon ang gikinahanglan nga kausaban aron mangulo sa ilang mga pamilya sa celestial nga gingharian. Isip usa ka amahan, unsa ang inyong mahimo, sa mga pulong ni Elder Christofferson, aron mas “mapakita kon unsa ang kamaunungon ngadto sa Dios sa inadlaw-adlaw nga pagpakabuhi”?
Pahina 77: Pinaagi sa paghangup sa gugma nga putli, gani ang mga pamilya nga may dakong hagit magmalampuson, miingon si Presidente Dieter F. Uchtdorf, Ikaduhang Magtatambag sa Unang Kapangulohan. “Bisan unsang mga problema ang giatubang sa inyong pamilya, bisan unsay inyong buhaton aron masulbad kini,” siya midugang, “ang sinugdanan ug ang katapusan nga solusyon mao ang gugma nga putli.” Sa inyong pamilya, ikonsiderar ang tambag sa kasulatan sa “pag-ampo ngadto sa Amahan … nga kamo unta mapuno niini nga gugma” (Moroni 7:48).
Pahina 63: Si Elder M. Russell Ballard sa Korum sa Napulog Duha ka mga Apostoles miingon nga ang regular nga mga family council, “makabatok sa impluwensya sa modernong teknolohiya nga kasagarang mobalda sa atong paggamit sa dekalidad nga panahon sa usag usa ug usab sa kalagmitan nga modala og dautan sulod gayud sa atong mga panimalay. Ikonsiderar ang pag-implementar sa inyong pamilya sa upat ka mga matang sa mga konseho sa pamilya nga si Elder Ballard misugyot og “makatabang sila kanato sa pagkahimong malampuson ug malipayon sa bililhon natong mga relasyon.”